Read Paite Chin NASEPTE 18 Bible Online

NASEPTE 18 - Paite Chin bible

NASEPTE 18

¹Huai thilte zoh in Athen khua a kipan Paul a pawt a, Korinth khua ah a hohta hi.

²Huan a min Akuila, Juda khat a mu a, huai mi Pontus gam a piang ahi a, Klaudia in Judate tengteng Rome khua a kipan pawtthu a piak ziak in a zi Priscilla toh Italy gam a kipan hong tungphet ahi uhi. Paul huai mite kiang ah a tungta hi,

³A nasep uh kibang a hih ziak in amau a kikoppih in na a semkhawm ua; a nasep uh puanin bawl ahi.

⁴Khawlni teng in kikhopnain ah chitaktakin thu a genzel a, Judate leh Grikte thuzoh a tum hi.

⁵Masidonia gam a kipan Sila leh Timothi a hongsuk un, Paul thugen kia in a omta hi, tua Jesu hi Khrist ahi chih Judamite kiang ah a hilhchian zel hi.

⁶Himahleh a kalh un a gensia ua, Paul in a puan a sing a, a kiang uah, “Na sisan mawh uh noumau lutung ah om hen; kei zaw ka hul ahi; tuban Jentelte kiang ah ka pai ding” a chi hi.

⁷Huan huai a kipan a pai a, a min Titas Justa mi khat inn ah a lut a, huai min Pathian a be zel hi, a inn leng kikhopnain toh a kizom ahi.

⁸Huan Krispus pa kikhopnain heutu in a inkuanpihte tengteng toh Toupa a gingta a, Korinth khua a mi tampi’n leng za in a gingta ua, baptisma a tang uhi.

⁹Zan in Toupa’n Paul kiang ah mengmu bang in, “Lau kenla, dai lou in thu genzel in;

¹⁰Kei na kiang ah ka om a kei hiam, sihna ding in kuamah in na tung ah khut a khakei ding uhi; hiai khua ah mi tampi ka nei ngal a” a chi hi.

¹¹Huan Paul huai ah a lak uah Pathian thuhilh in kum khat leh kha guk a omta hi.

¹²Huan Gallio tuh Akaia gamukpa a hihlai in Judate’n kituakin Paul kalh in buaina a bawl ua, vaihawmna tutphah ma ah a pi uhi.

¹³“Huai mi’n danlou bang in a Pathian be ding in mi a khempuk hi” a chi uhi.

¹⁴Paul in a dawn dek leh Gallio in, Judate kiang ah, “Judate aw, hiai thildiklou thu hiam, thil hihkhelh thu hiam bek hileh, pellou in k’on awlmoh ding hi;

¹⁵Himahleh thumalte leh minte, noumau danthu lel zaw noumau kingaihtuah zaw un; ken zaw huchibang thu ngaihtuah ka ut kei” a chi hi.

¹⁶Huan vaihawmna tutphah a kipan in amau a delhkheta hi.

¹⁷Huan Grik mi tengteng in kikhopnain heutu Sostheni a man ua, vaihawmna tutphah ma ah a vua uhi. Gallio in a thilhih uh khawk a sa kei hi.

¹⁸Huaizoh in Paul ni sawttak a tam nilouh a; huai zoh in unaute kampha in a kha a, huai a kipan Suria gam lam ah long in a paita, a kiang ah Priscilla leh Akuila leng a pai sam uhi. Paul in thuchiam a neih ziak in Kenkriai khua ah sam a metphot hi.

¹⁹Huan Ephesa a tung ua, huai ah amau a nuseta; amah bel kikhopnain ah a lut a, Judate kiang ah chitaktakin thu a sutpih hi.

²⁰Huan sawt deuh tam ding in a khou ua, himahleh a ki awi kei hi,

²¹“Pathian in a phal leh na kiang uah ka hong nawn ding” chi in, kampha in a khen a, Ephesa khua a kipan long in a paita hi.

²²Huan Kaisaria khua ah a hong kai a, Jerusalem khua ah a hohtou a, saptuamte chibai a buk hi; huaikhit in Antiok khua ah a hohsukta hi.

²³Huan huai a sawtkuam a om nung in a pai nawn a, nungzuite tengteng hihkip in Galatia gam leh Phrigia gam a tawnsuak vek hi.

²⁴Huan Judami khat, a min Apollos, Aleksandria khua a piang, mi piltak, Ephesa khua ah a hohsuk a; aman Laisiangthou a nak theih mahmah hi.

²⁵Hiai mi’n Toupa Lampi thu zilsa ahi a, lungsim a phatuamngaitak a hih ziak in Toupa thu a hilh zel hi, Johan baptisma thu kia a thei hi.

²⁶Kikhopnain ah hangsantak in thu a gen hi. Huchi in Priscilla leh Akuila in a thugen a zak un, a in uah leh a kiang ah Pathian Lampi thu kichian sem in a hilhchianta uhi.

²⁷Aman Akhaia gam a paikai a tuptakin unaute’n a hanthawn ua, amah a kipahpihna ding un nungzuite kiang ah lai a gelhsak uhi. Huan a tun in, Pathian hehpihna ziak a gingtate nakpitak in a panpih hi.

²⁸Vantang theih in Judate nakpitak in a seldong a, Laisiangthou zang in tua Jesu Khrist ahi chih a theisak hi.