Read Paite Chin NASEPTE 19 Bible Online

NASEPTE 19 - Paite Chin bible

NASEPTE 19

¹Korinth khua a Apollos a om kal in Paul in saklam gamte tawnsuak masa kawm in, Ephesa khua a tung a, nungzui kuate hiam a mu hi.

²Aman a kiang uah, “Na gintak chil ua pan Kha Siangthou na tang uhia?” a chi hi. Amau a kiang ah, “Tanglou, Kha Siangthou a om chih zak leng ka za kei uh,” a chi uhi.

³Aman, “Bang baptisma ahia na tan uh?” a chi hi. Amau Johan baptisma, a chi uhi.

⁴Huan Paul in, “Johan in zaw a nung a hong paipa Jesu gingta ding a mite hilh in kisikna baptisma in a baptist zel ahi” a chi hi.

⁵Huan huai thu a zaktak un Toupa Jesu min in baptisma a tang uhi.

⁶Paul in a tung uah a khut a koih a, Kha Siangthou a tung uah a hongtungta hi. Huchi in paute in thu a gen ua; Pathian thu leng a hilhta uhi.

⁷Avek un piching sawmlehnih vel ahi uhi.

⁸Huan Paul kikhopnain ah a lutzel a, kha thum phial hangsantak in thu a gen hi, Pathian lalgam thu gum in a sel a, mi a thuzoh zel hi.

⁹Himahleh a khen a chihmawh ua, a gingta nuam kei ua, mipi ma a Lam a gensiat tak un, aman amaute a paisan a, nungzuite a pituam a, niteng in kisinsakna mun Tairanas ah thu hilh in a sutpih zel hi.

¹⁰Huchibang ngen in kum nih phial a hih a; huchi in Asia gam a om tengteng, Judate leh Grikte’n leng Toupa thu a zata uhi.

¹¹Pathian in Paul khut in thillamdang taktak a hihsak hi.

¹²Huchi in a taksa sukha kinulna puan neu, puan tungsilh damloute kiang ah a hontawi ua, a natnate uh a damzel hi, asung ua kipan dawite leng a pawt uhi.

¹³Huan Judami dawi hawlkhia chi a vakvai dawithu thei kuate hiam in, “Paul in a thu a tangkoupih Jesu Khrist min in k’on vau hi, chi in, dawimatte tung ah Toupa Jesu min a lou uhi.”

¹⁴Judami siampu lian khat Skeva in huchibang hih tapa sagih a nei hi.

¹⁵Himahleh dawi in a kiang uah, “Jesu ka gingta hi, Paul leng ka thei hi, nou kuate na hi ua?” a chi a, a dawng hi.

¹⁶Huan dawipai in a boh a, avek un a zou a, a nuaisiahta hi, huchi in huai mipa inn a kipan vuaktang leh liam in a taikheta uhi.

¹⁷Huchi in Ephesa khua a om tengteng, Judate leh Grikte kiang ah huai mi thu a thangta hi. Huan avek un a lau ua, Toupa Jesu min a lianta hi.

¹⁸Huan a gingtate leng a khen tampi a hong ua, a thilhih khelhte uh thupha a tawi ua, a kipulak uhi.

¹⁹Mitkhialdawi hihmi a khen tampi in leng a laibute uh a hontawi khawm ua, mi tengteng mitmuh in a halta uhi; huan a man a sut ua dangka sing nga hi in a thei uhi.

²⁰Huchi lawmlawm a thupi in Toupa thu a dalh a, a zouzel hi.

²¹Huan huaikhit in, Paul in Masidonia gam leh Akhaia gam tawtsuak takdih a, Jerusalem khua a hoh a tum hi. “Huai a ka hohkhit chiang in Rome khua ka sik sam ding hi” a chi hi.

²²Huchi in amah nasepsakte nih Timothi leh Erasta Masidonia gam ah a paisak phot a, amah bel Asia gam ah a tam tadih hi.

²³Huailai in Lam ziak in mi buai petmah in a buaita uhi.

²⁴Mi khat a min Demetrias, dangka siksek a Diana milim bawlpa a om a, khutsiamte ading in kilohna tampi a pia hi.

²⁵Hiai mi in amaute a samkhawm a, a nasep bang uh semte toh; huan a kiang uah, “Pute aw, hiai nasepna i hauhna uh ahi chih na thei uhi.

²⁶Hiai Ephesa khua kia hilou in, Asia gam khokim teng phial ah leng, Paul in khut a bawl pathiante Pathian ahi kei uh chi in mi tampi thuzoh in, a kiheisak khinta chih noumau ngei in na mu un na za uhi.

²⁷Huchi in i nekzonna un a thuak ding chih a lauhuai kia hilou in, pathiannu thupitak Diana biakin leng a hon ngaineu ding uh. Asia gam a mi tengteng leh khovel a min a biak zel uh, a thupipi toh, a neu ding chih a lauhuai hi” a chi hi.

²⁸Huai thu a zaktak un, a heh mahmah ua, “Ephesa khua a Diana thupitak ahi” chi in a kikou uhi.

²⁹Huchi in a khua in a pumbuai vekta ua, Gaias leh Aristarkhas, Masidonia gam a mi, Paul nungzuite, a man ua, kituaktakin etnop inn ah a taipih kheukhou uhi.

³⁰Paul in mipi lak a lut a tup leh nungzuite’n a phalkei uhi.

³¹Asia gam a heutupente lak a khenkhat kuate hiam Paul lawmte ahi ua, a kiang ah mi a sawl ua, etnop inn ah lut teitei lou ding in a kun uhi.

³²Omkhawmte a buai ua, mi tamzaw in a kikhop san uh leng a theikei uh, khenkhat thukhat in a kikou ua, khenkhat thudang in a kikou uhi.

³³Mipi lak a mi khenkhat in Alexander a siamna thu gendan ding a hilhta ua, Judate’n amah mailam ah a sawnphei uhi. Huan Alexander in a khut in a zapa, mi tengteng kiang ah a siamna thu gen a tum hi.

³⁴Himahleh amah Judami ahi chih a theihtakun, dakkal nih sung aw kituak tak in, “Ephesa khua a Diana thupitak ahi” chi ngen in a kikou uhi.

³⁵Huan khosung laigelhpa’n mipi a sukdaih khit in, “Ephesa khua a mite aw, Diana thupitak biakin leh van a kipan a milim kia, Ephesa khuate a kem na hi uh chih, kua ahia theilou om?

³⁶Huchi in hiai thu selvual ahihlouh nung in, na daidide ding uh ahi, thunung venglou in bangmah na hih ding uh ahi kei hi.

³⁷Hiai mi hiai n’on pite uh, biakin lokmi ahi kei ua, i pathiannu gensete leng ahi kei uh.

³⁸Huchi in Demetrias leh a lawm khutsiamte’n leng kua lak ah leng thubuai a neih uleh, thubuai genna innte honsa in a om vele, gam ukpate leng a om uhi; kihek uhen.

³⁹Thil dang buaina nei him na hih uleh, kikhopna ngeina ah a lem ding uh.

⁴⁰Tuni a thu vengvung ziak in salh lauhuai in i omta uhi, a thu om ngellou buaina bawl a ngohtheih i hi ngal ua, hiai kikhopna san bangmah gen ding theilou ding i kei uhiam” a chi hi.

⁴¹Huan huchibang thu a genkhit in omkhawm heutute a kikhenzak sakta hi.