Read Paite Chin NASEPTE 2 Bible Online

NASEPTE 2 - Paite Chin bible

NASEPTE 2

¹Pentikost ni a hongtun in, avek un mun khat ah a omkhawm uhi.

²Thakhat in van a kipan ging huihpi nung bang in a hongom guih a, huchi in huai in a tutna inn uh a hihdim vekta hi,

³leite amah leh amah mei bang a kihawm in, a lutung uah a hong tuang chiat hi.

⁴Huchi in avek un Kha Siangthou in a luahdimta a, Kha in hihtheihna a piak a a pausak bangzel in pau dang in a pauta uhi.

⁵Huan van nuai namchih lak a kipan Pathian limsak Juda kulmutte Jerusalem khua ah a om uhi.

⁶Huan ging husa a zaktak un mipi a hong kikhawm ua, michih in a pau uh amau pau chiat a a zak ziak un a lungsim uh a hong buai hi.

⁷Huan avek un a mangbang ua, lamdang a sa mahmah uhi, En dih uh, hiai a pau tengteng Galili gam a mi ahi kei ua hia?

⁸Bangchi’n ahia i vek ua pianpih pau chiat a i zak uh?

⁹Eite Parthai nam, Medai nam, Elamitai nam; khenkhat Mesopotamia gam a om, Judia gam a om, Kapadosia gam a om, Pento gam a om, Asia gam a om,

¹⁰Phrigia gam a om, Pamphilia gam a om, Aigupta gam a om, Kurini khaw kiang a Libia gam a om i hi ua; khenkhat Rome apan mikhualte, Judate leh a phungkaite utoh i hi ngal ua;

¹¹Khenkhat Krit tuikulh leh Arab gam a i hi ngal ua; himahleh, Pathian thilhih thupite a gen uh eimau pau chiat in i za ngal ua! a chi uhi.

¹²Huan avek un lamdang a sa mahmah ua, a khiakna dan theilou in, “Hiai bangchidan ahia?” a kichi uhi.

¹³Khenkhat in “Uain thak a kham ua hi” chi in a nuihsan uhi.

¹⁴Himahleh Peter in sawmlehkhatte toh ding khawm in, aw ngaihtak in a kiang uah a gen a, nou Judia gam a mite aw, nou Jerusalem khua a om tengteng aw, hiai thei unla, ka thu leng ngaikhia un,

¹⁵Hiaite na gin bang un a khamkei uh, dak thumna hun ahi.

¹⁶Hiaite zawlnei Joel in a gen ahizaw:

¹⁷‘Pathian in, ni nanungte ah hichi ahi ding, mi tengteng tung ah ka kha ka sungbaw ding a; na tapa leh na tanute’n ka thu a hilh ding uh; na tangvalte un kilaknate a mu ding ua, na putekte un mang a nei ding uh.

¹⁸Ahi, huai ni’n ka sikhapate, ka sikhanute tung ah leng ka Kha ka sungbaw ding a, ka thu a gen ding uhi.

¹⁹Huan tunglam van ah thillamdang nuailam lei ah chiamtehna ka musak ding a; sisan, mei, meikhu hu toh:

²⁰Ni mial a suak ding a, kha sisan a suak ding, Toupa ni thupitak leh lauhuaitak a hongtun ma in.

²¹Huan hichi ahi dia, Toupa min lou peuhmah hotdam in a om ding hi.’

²²“Nou Israel mite aw, hiai thu za un: Nazaret Jesu, Pathian in amah zang in na lak uah thil thupite, thillamdangte, chiamtehnate a hih in a hon theichiansak hi; nou ngei in tuate na theichian uhi.

²³Huai mi Pathian vaihawm tel leh theihkholh bang in na mansak ua, nou migiloute khut in Kros ah kilhden in na hihlumta uhi.

²⁴Amah, Pathian in sihna thuaknatna phelsak in, a kaithouta a; amah sihna letden vual a hihlouh ziak in.

²⁵Huan David in a thu a gen a, ‘Ka ma ah chiklaipeuh in Toupa ka mu gige hi. Ka mangbat louhna ding in ka taklam ah a om hi;

²⁶Huaiziak in ka lungtang a nuam a, ka lei leng a kipak a, ka sa lamentak in a om behlap lai hi.

²⁷Misi khua ah ka kha na nuse kei ding a, muatna na Mi Siangthou na musak sam kei ding hi.

²⁸Nangman hinna lampite n’on theisak a; nangman na mel in kipak in n’on hihdim ding,’ chi in.

²⁹“Unaute aw, chikhahpa David thu laulou in na kiang uah ka gen thei hi; amah zaw a si a, vui leng a vuikhin ua, a han leng tutan in i kiang ah a omlai hi.

³⁰Amah tuh zawlnei ahi a, Pathian in a khal a mi kuahiam sadan a a chite lak a mi khat Khrist mangtutphah a tu ding in a kaithou ding chih kichiam in a gen chih a thei hi.

³¹Huchi in huai tuh a theihkholh him ziak in Khrist thohnawn ding thu a gen hi, ‘Misi khua a nutsiat in a omkei a, a luang leng a muat sam kei hi,’ chi in.

³²Pathian in Jesu a kaithouta chih theihpihte i vek un i hi uhi.

³³Pathian khut taklam ah pahtawi in a om a, Kha Siangthou chiam Pa kiang a kipan in a mu a, na muh uh leh na zakte uh a hon sunbuak ahi uhi.

³⁴David zaw van ah a kahtou kei, amah ngei in, ‘Jehovah in ka Toupa kiang ah,

³⁵“Na melmate na khepek ngakna dia ka bawl masiah, Ka taklam ah tu kinken in” a chi a na chi hi.

³⁶Huchi in Jesu, na kilhden uh, Pathian in Toupa leh Khrist hi khawm in a bawlta chih Israel inkuan chih in kichiantak in thei uhen” a chi hi.

³⁷Huan huaithu a zak un a lungtang ua sutbang a honghi ua, Peter leh sawltakdangte kiang ah, “Unaute aw, bangchi’n ka hihta ding ua?” a chi ua.

³⁸Peter in a kiang uah, “Na khelhnate uh ngaihdamna ding in lungsim khek unla, Jesu Khrist min in baptisma tangchiat un; huchi in Kha Siangthou thawnpiak na tang ding uhi.

³⁹A chiam nou ading, na tate uh ading, gamlapi a mi tengteng ading leh Toupa i Pathian in a kiang a a sap peuhmahte ading ahi” a chi hi.

⁴⁰Huan thudang tampi in a hilhchian a; tulai khang thulimloute lak ah kihumbit un, chi in a hanthawn hi.

⁴¹Huan a thu zuipeuh in baptisma a tang ua, huai ni’n mi sang thum vel behlap in a om uhi.

⁴²Huan sawltakte thusinsakte sin in, kithuah in, tanghou balkham in, thum in, phatuamngaitak in a omkhawm uhi.

⁴³Huan michih in a lauta ua: sawltakte’n thillamdang leh chiamtehna tampi a hih uhi.

⁴⁴A gingta peuhmah in bangkim a kikop khawm uhi.

⁴⁵A goute uh, a thilneihte uh a zuak ua, a deihdong chinglel chiat in avek ua kiang ah a hawmzel uhi.

⁴⁶Huan niteng in, lungsim munkhat in, Pathian biakin ah phatuamngaitak in a om zelzel ua, a innte uah leng tanghou balkham in, nuam leh lungkim in, a an uh a ne zel uhi.

⁴⁷Pathian a phat ua, mi tengteng deihsak in a om uhi. Huan a hotdam lel peuhmah Toupa’n niteng in a kiang uah a behlap sakzel hi.