Read Paite Chin NASEPTE 20 Bible Online

NASEPTE 20 - Paite Chin bible

NASEPTE 20

¹Buaina a vennungin, Paul in nungzuite a samsaka, a hanthawn a, kampha in a kha a, Masidonia gam a pai ding in a pawtta hi.

²Thu tampi a nungzuite hanthawn in huai gam a tawnsuaka, Grikte gam a tungta hi.

³Huan huai ah kha thum a tam hi. Suria gam a long a zindek kuan in, Judate’n amah thah a sawm ziak un, Masidonia gam tawn a kilehkik a tum zawta hi.

⁴Asia gam tana amah zuite, Pirha tapa Sopater Beriah khomi, Thessalonika khua apan Aristarkhas leh Sekunda te, Darba khomi, Gaias, Timothi leh Asia gam a Tikika leh Trophimas te ahi uhi.

⁵Huaite’n ka ma uh a kai ua, Troas khua ah a hon na ngak uhi.

⁶Kou bel tanghou silngou sohlouh ni a bei in Philippi khua a kipan long in ka pawt ua, ni nga nung in Troas khua ah a kiang uh ka tung uhi; huai ah ni sagih ka tam uhi.

⁷Huan ni sagihni masapen in, tanghou balkham ding a ka kikhoplai un, Paul in a kiang uah thu a gen hi; aman a zingchiang a pai a tup ziak in zankim tanhial thu a gen hi.

⁸Huan indan tungnung ka omkhawmna uah khawnvak tampi a om hi.

⁹Huan a min Eutikas tangval khat tohlet ah a tu a, a na lusu hi. Huan Paul in thu a gen sawttak ziak in aman a ihmut suak a thuakzouta kei a, insawng thumna a kipan in a keta a, a sisa in a phong uhi.

¹⁰Himahleh Paul a kumsuk a a bohkhum in a angpom a, “Lunglau kei un, a laitat kei lai hi” a chi hi.

¹¹Huan Paul a kahtou nawn a, tanghou balkham in an a ne a, sawtpi khovak pha hial in a kiang uah thu khotang a gen a, huai nung in a paita hi.

¹²Huan valnoupa dam in a pi ua, a khamuang petmah uhi.

¹³Huan koute Assos khua zuan in long in ka na pai masa ua, Long ah Paul tuansak ka tum uhi; aman khe a paina lam tot a tup ziak in huchibang tuh amah geldan ahi.

¹⁴Huan Assos khua a a hontuah chiang in, long ah ka tuangsakta ua, Mitilini khua ka tung uhi.

¹⁵Huan huai a kipan in long in ka pai nawn ua, a zing in Khios tuikulh zawn ka tung ua; huan a zingnawn in Samo tuikulh ka tung ua, Troguliam ah ka giak uhi. A zingnawn in Mileta khua ka tung nawn uhi.

¹⁶Huan Paul in Asia gam a omsawt a utlouh ziak in, Ephesa khua long in khen a tupsa him ahi a, a hih theih leh Jerusalem khua ah Pentikost ni huam tum in a kin pai hi.

¹⁷Huan Mileta khua a kipan in Ephesa khua ah mi a sawl a, saptuam upate a kiang ah a samsak hi.

¹⁸Huan a kiang a hongtun un, aman a kiang uah, Asia gam ka tot chil ni a kipan na kiang ua ka omsung teng in ka omdan na thei uhi.

¹⁹Thunuailut pen kawm leh Judate’n hon sawm ziak ua khitui kai leh thilhaksa ka tung a tungte thuakkawm in Toupa na ka sem hi,

²⁰Huchibang in a phatuam ding thu na kiang uah bangmah im ka neikei a, vantang lak leh inn teng ah thu k’on hilh zel hi,

²¹Judate leh Grikte kiang ah leng Pathian lam a lungsim ngat thu leh, i Toupa Jesu Khrist lam a ginna thu ka theisak zel hi.

²²Ngai un, tuin Kha in honsawl teitei a ka theih ziak in, Jerusalem khua a hoh dia kisa ka hi, huai ah ka tung a thil hongtung ding bangmah ka theikei hi;

²³Kha Siangthou in, henna leh haksatna in nang hon dawn hi, chi in, khaw teng ah a honhilh zel hi, tuate kia ka theih ahi.

²⁴Himahleh ka kitaitehna lam ka maban tun ding leh Toupa Jesu kiang a huai nasepna ka muh pen semkhin phot leng, ka hinna leng khiaklah tham in ka sep kei hi.

²⁵“Huan thei un, noute tengteng, Pathian lalgam thu tangkoupih a ka vakvaknate’n ka mel na mu nawnta kei ding uh chih ka thei hi.

²⁶Huaiziak in mi tengteng sisan ah ka hul ahi chih tuni in k’on theisak hi.

²⁷Pathian vaihawm tengteng avek in na kiang uah im ka neikei hi.

²⁸Pathian saptuamte, amah sisan a a leite, vak ding in noumau leh na heute uh tengteng tung ah pilvang un, Kha Siangthou in a tung uah nou heutu in a honbawl hi.

²⁹Ka pai nung in ngehangte na lak uah a honglut ding ua, pawlte a hawikei ding uh chih ka thei hi.

³⁰Noumau lak a mi nangawn, nungzui pawlte amau lam a kaimang ding in thu tuam gen na hongom ding uhi.

³¹Huaiziak in limsak unla; kum thum hilhial khitui kekawm a, sun leh zan a michih taihilh ka tawplouh dan, theigige un.

³²Tuin noute Pathian leh a hehpihna ah k’on kemsak hi, tua in noute hon bawllian thei a, mi lungsim siangthoute kiang ah goutan a hon neisak theilai hi.

³³Kuamah dangka, dangkaeng leh puansilh ka eng ngeikei hi.

³⁴Hiai khutte’n keimah leh ka lawmte taksap a sepkhiak zel dan, noumau ngei in na thei uhi.

³⁵Bangkim ka hih peuhmah na chin ding ua ka hih ahi, huchibang a semgim leh, Toupa Jesu thu theigige kawm in mihatloute na panpih ding uh ahi; amahmah in, ‘laksang in piak in lukhong a neizaw’ a chih” a chi hi.

³⁶Huai thu a genkhit in a khukdin a, avek un a thum uhi.

³⁷Huan avek un a kap huphup ua, Paul ngawng ah kawi in a tawp uhi.

³⁸A mel a muhnawn taklouh ding thu a gen a lungkhamna pen uh ahi. Huan long pha in amah a va kha uhi.