Read Paite Chin NASEPTE 21 Bible Online

NASEPTE 21 - Paite Chin bible

NASEPTE 21

¹Huan hichi a honghi a, amaute toh ka kikhen ua, long in ka pawt ua, huaikhit in tangtak in Kos tuikulh ka tung ua, a zing in Rodi tuikulh ka tung nawn ua, huai a kipan in ka pai zel ua, Patara khua ka tung uhi.

²Phoinisia gam paiding long khat ka mu ua, ka tuang ua, ka pai zel uhi.

³Huan Kupra tuikulh ka mu ua, veilam pang ah ka kheng ua, Suria gam ah ka pai zel ua, Tair khua ah longvan nawnkhiak ding a om manin ka kumphot uhi.

⁴Nungzuite ka zongkhia ua, huai ah ni sagih ka tam uhi; huan Kha theihsak in Paul kiang ah, Jerusalem khua a hohtou lou ding in a chi uhi.

⁵Himahleh huai nite khitin ka pawt ua ka paita ua, unaute’n avek un, a zi a tate utoh khopi pua dong a hongkha ua; tuipi piau ah ka khukdin ua, ka thum uhi.

⁶Huan Mangpha ka kikhak zohun, long ah ka tuang ua, amau bel a inn uah a pai nawnta uhi.

⁷Tair khua a kipan long a ka paikhit un Ptolema khua ka tung ua, unaute chibai ka buk uhi, a kiang uah ni khat ka nituang uhi.

⁸Huan a zing in ka pawt ua Kaisaria khua ka tung ua huai ah Tanchinhoih genpa, Philip inn ah ka lut ua, amah tuh sagihte lak a khat ahi a, a kiang ah ka tam uhi.

⁹Huai mi’n tanu li, nungak siangthou ngen a nei a, amau zawlnei bang in thu a genkhol zel uhi.

¹⁰Huai ah ni tampi ka tam ua, huailai in Judia gam a kipan a min Agaba zawlnei khat a hongsuk hi.

¹¹Ka kiang uah a hong a, Paul kawnggak a la a, a khete, a khutte amah in a kigak a, “Jerusalem khua a Judate’n hichibang in hiai kawnggak neipa a gak ding ua, Jentelte khut ah a pelai ding uhi, Kha Siangthou in a chi” a chi hi.

¹²Huan huai thu ka zaktak un, kou leh huai khua a mite’n Paul Jerusalem khua a hohlou ding in ka khou chiat uhi.

¹³Himahleh Paul in a dawng a, “Bangchi na hi ua, na kahkah uh, n’on khasiatsak uh? Toupa Jesu min ziak in Jerusalem khua a hen kia hilou in, sih leng ngap ka hi” a chi hi.

¹⁴Huan khouhzoh vual ahihlouh tak in, ka tawpta ua, “Toupa thuthu hi hen aw” ka chi uhi.

¹⁵Huai nung in ka van uh ka bawl ua, Jerusalem khua ah ka hohtou uhi.

¹⁶Kaisaria khua a mi nungzuite kuate hiam, ka kiang uah a pai ua, amau, a min Mnason inn, nungzui masa pawl Kupra tuikulh a mi khat ka tunna dingpa uh a pi sam uhi.

¹⁷Huan Jerusalem khua ka tun un unaute’n nuamtak in a hon na kipahpih uhi.

¹⁸A zing in Paul toh Jakob kiang ah ka lut ua; huai ah saptuam upate tengteng leng a om uhi.

¹⁹Paul in amau chibai a buk khit in, a nasepna zang a Pathian in Jentelte lak a thil a hihsak peuhmah avek in a gen hi.

²⁰Unaute’n huai thu a zak un Pathian a pahtawi uh; huan Paul kiang ah, “Unaupa, Judate lak a gingtami tamdan na mu a; avek un dan lam ah phatuam a ngailai uhi.

²¹Nang Jentelte lak a Juda omte tengteng kiang ah a tate uh zeksum louh ding leh dan bang a omlouh ding chi in, Mosi dan paihkhiakna ding na thuhilh zel chih mi kam ah na thu a thei vek uhi,” a chi uhi.

²²Bangchi hita ding ahia le? Na hongtung chih a za ngal ding uhi.

²³Huaiziak in na kiang a ka gen bang un hih in; thuchiam nei pasal li ka kiang uah a om uhi;

²⁴Huai mite pi in la, a kiang uah kisiangsak sam inla, a sam uh a met theihna ding un amau din sum seng in; huchi in mi tengteng in mi kam a na thu a zak teng uh gentham ahi kei chih a thei ding ua, nangmah mah Dan zui in kichiantak in na omzaw chih a thei ding uhi.

²⁵Jentelte lak a gingtate thu zaw, milim biakna thil neklam ah, sa sisan nek thu ah, sa heklup neklam ah, kingaihlam a kipan in a kihulsak ding uh ahi, chi in, ka gen ua, ka gelhta uhi” a chi uhi.

²⁶Huan a zing in Paul in pasalte a pia, a kiang uah a kisiangsak a, Pathian biakin ah a lut a, amau dia sagoh ding a piaksak chiat masiah kisiansakna ni a neiphot ding uh chih, siampu kiang ah a hilh hi.

²⁷Kisiansuahna ni sagih a chin dektak in Asia gam a Judate’n Pathian biakin ah Paul a mu ua, mipi tengteng a hanthawn ua, amah a man ua, a kikou uhi;

²⁸“Israel mite aw, hong huh un! Hiai mi, gam teng a mi tengteng kiang a Judamite dante, hiai innte gensepa ahi; huailou leng, Pathian biakin ah Grik mite a lutpih a, hiai in siangthou a hihbuah khin” a chi uhi.

²⁹Huai ma in khua ah Ephesa khua a mi Trophimas a kiang ah a mu ua, Paul in huai mi Pathian biakin ah a lutpih a gingta uhi.

³⁰Huan a khua in a kising kheukhou ua, mite a taikhawm ua; Paul a man ua, Pathian biakin a kipan a kaikhia ua; kongkhakte a khakpah ngal uhi.

³¹Amah hihlup a tup laitak un Jerusalem khua a mi tengteng a buai uh chih sepaih pawl heutu lianpen kiang a tungtou hi.

³²Aman sepaihte leh sepaih za heutute a pipah a, a kiang uah a taisuk uhi; heutu lianpen leh sepaihte a muhtak un Paul vuak a tawpta uhi.

³³Sepaih heutu lianpen in a honnaih a, Paul a len a, khainiang nih butsak ding thu a pia a; kua ahia a hih a bang ahia a hih a dong hi.

³⁴Mipite a khen thukhat in a kikou ua, a khen thu dang in a kikou ziak un, buaina ziak diktak a theikei a, kulh a pilut thu a pia hi.

³⁵Paul kalbi a tunlai in mipi a hiamgam ziak un sepaihte’n amah a pumzawn uhi;

³⁶Mitengteng in, “Hih mangthang un” chi a kikou in, a zui uhi.

³⁷Sepaihte’n kulhsung a a pilut deklai un Paul in, sepaih heutu lianpen kiang ah, “Na kiang ah thu kamkhat ka gen thei diam?” a chi hi.

³⁸Huan aman, “Grik pau na thei maw? Tuma a mite hanthawn a, gamdai mun a mihing sang li suam a thatte heutupa Aigupta mi na hi kei maw?” a chi hi.

³⁹Paul in, “Silisia gam a Tarsa khua a om Judami ka hi, khopi neu liailou khat khua leh tui ka hi; hon hehpih inla, mi tengteng kiang ah thu hon gensak in” a chi hi.

⁴⁰Huan a lemsaktakin kalbi ah Paul ading a, mi tengteng daihna ding in a khutvan a; huan a daih duam tak un Hebru pau in a kiang uah thu a gen hi.