Read Paite Chin NASEPTE 22 Bible Online

NASEPTE 22 - Paite Chin bible

NASEPTE 22

¹“Unaute aw, pate aw, tun ah na kiang uah ka siamna thu k’on hilh ding hi, ngaikhia un, a chi hi.

²Huan Hebru pau in a kiang uah thu a gen chih a zaktak un, a dai nawnsem ua; huan aman:

³“Judami ka hi a, Silisia gam a Tarsa khua a piang ka hi. Himahleh hiai khua ah Gamaliel khebul a zila khanglian ka hi, i pipute Dan omdan kimtak zilzel a om ka hia, tuni a noumau tengteng bang in Pathian ading a phatuam ka ngaisam hi.

⁴Hiai Lam a mite that hial khop in ka sawizela, numei pasal ka hen a, suangkulh ah ka khumsak hi.

⁵Siampu Lianpen leh upate tengteng in leng huai thu hon theihpih ua, amau a kipan in leng unaute piak ding in lai ka mu hi, huan Damaska khua a omte sawi ding leh hensa a Jerusalem khua a pi ding in ka hoh hi.

⁶“Huan hichi a honghi a, ka pai a Damaska khaw kiang ka tun in, sunlai in, thakhat in van a kipan vak thupitak ka kim ah a hongvak hi.

⁷Huan lei ah ka puk a, ka kiang ah, Saul, Saul, nang bang a chia honsawi? chi in aw ka za hi.

⁸Huan ken Toupa kua na hia? chi in, ka dong hi. Aman ka kiang ah, Nazaret Jesu na sawi ka hi, a chi hi.

⁹Ka lawmte’n vak a mu ua, hon houpihpa aw a za kei uhi.

¹⁰Ken, Toupa, bang ka hihdia? ka chi a. Toupa’n ka kiang ah, thou inla, Damaska khua ah lut in, thil tengteng na hihding a chih peuhmah a honhilh ding uh, a chi hi.

¹¹Huan huai vak thupi ziak in khua ka mu theita kei a, ka lawmte’n khut in a honkai ua, Damaska khua ah ka lutta uhi.

¹²“Huan mi khat, Ananias Dan lam a Pathian limsak leh huai a Judate tengteng lak a min hoih,

¹³amah a hong a ka kiang ah ading a, ‘Unau Saul, mitvakna nei in,’ a honchi hi. Huaitak in amah ka mu theita hi.

¹⁴Aman i pipute Pathian in a deihlam thei ding in hondeih a, Diktatpa hon musak a, a kamsuak za ding a honsep ahi, a chi hi.

¹⁵Na muh leh na zak thu ah mitengteng kiang ah amah thu theihpihpa na hi ding.

¹⁶Huan bangdia om maimai na hia? Thou inla, amah min in baptisma tang inla, na khelhna hihsiang tanla, a honchi hi.

¹⁷“Jerusalem khua a ka pai nawn nung in, Pathian biakin a ka thum lai in, mengmu bang in ka om hi.

¹⁸Huan kin inla, Jerusalem khua a kipan pawt in; ka tanchin na gen ding a pomtuak kei uh a hon chihlai ka mu hi.

¹⁹Huan ken, Toupa kikhopnain teng a nang gingta peuhmah ka hentasak a, ka vuak zel dan a thei uhi.

²⁰Huan na thu theihpihpa Stephen sisan a suahlai un kei leng a kiang uah ka ding a, a sihding lem ka nasa a, a hihlumte puante leng ka nakem hi, ka chi hi.

²¹Huan aman, pai in, hiai a kipan in gamla tak a Jentelte kiang ah k’on sawl ding ahi, a hon chita hi, a chi hi.

²²Huan huai thutan in a ngaikhia ua; aw ngaihtak in a kikou ua, “Mi hichibang hingtak ahi kei, khovel a kipan hih mangthang un” a chi uhi.

²³A kikou ua a puan uh a lem ua, a pai ua, leivui a vik uhi,

²⁴huchi in sepaih heutu lianpen in Paul kulhsung a pilut thu a pia a, a tung ah huchitel a a kikouna uh a theihna ding in vuak kawm a dottel ding, a chi hi.

²⁵Savun khau a a leh hensawm khit un, Paul in a kiang a ding sepaih zaheutu kiang ah, “Siamlouh tansak louh Rome mi vuak ding dan toh kituak hia?” a chi hi.

²⁶Sepaih zaheutu in huai a zaktak in, sepaih heutu lianpen kiang ah a hoh a, “Na thilhih ding pilvang dih aw; hiai mi Rome mi a na hi” a chi a, a hilh hi.

²⁷Sepaih heutu lianpen a hong a, a kiang ah, “Rome mi na hi maw? honhilh in” a chi hi.

²⁸Aman “Hi e” a chi hi. Sepaih heutu lianpen in, “Hiai khomi hihna ken sum tampi a ka lei ahi” chi in, a dawng hi. Paul in, “Kei zaw Rome mi a piang him ka hi” a chi hi.

²⁹Huchi in, dottel tumte’n amah a paisan pah ngal ua; sepaih heutu lianpen in Rome mi ahi chih a theih in a kihta a, a hen ziak in a lau hi.

³⁰A zing in Judate’n bangziak a Paul a hek uhiam chih theihtel tum in, sepaih heutu lianpen in amah a phel a, siampu liante leh vaihawm tengteng kikhop ding thu a pia a, Paul pisuk in, a ma uah a dingsak hi.