Read Paite Chin NASEPTE 23 Bible Online

NASEPTE 23 - Paite Chin bible

NASEPTE 23

¹Paul in vaihawmte a en kilkel a: “Unaute aw, tunitan in Pathian mitmuh a hoihlam a ka theih peuhmah hih in ka om hi” a chi hi.

²Huan siampu lianpen Ananias in, Paul kiang a dingte kiang ah, a kam betsak ding in thu a pia hi.

³Paul in a kiang ah, “Nang bang nuhngou bang lelpa, Pathian in a honbeng zaw ding hi, nang Dan bang a vaihawm ding a tu a, Dan lou bang a mibet ding na chi vial maw?” a chi hi.

⁴Huan a kiang a dingte’n, “Pathian siampu lianpen bangdia tai?” a chi uhi.

⁵Paul in, “Unaute aw, siampu lianpen ahi chih ka theikei a ahi; na chipihte tung vaihawmte tung ah thu hoihlou gen ken, chih gelh ahi ngal a” a chi hi.

⁶Paul in a khen Saddukaite, a khen Pharisaite ahi uh chih a theih in vaihawmte lak ah a kikou a, “Unaute aw, Pharisai ka hi, Pharisai tapa leng ka hi; misi lametna leh thohnawnna thu ah vaihawmte mai a dinsak a om ka hi” a chi hi.

⁷Huai a gentakin, Pharisaite leh Saddukaite a nakisel ua, vaihawmte a kilangta uhi.

⁸Saddukaite, misi thohnawnna a omkei, angelte, khate leng a om tuankei, a chi uhi; Pharisaite’n huai tegel a om chih a gen uhi.

⁹Huai thu in nakpitak in a buaita uhi; Pharisaite lam a mi laigelhmite khenkhat ading ua; a sel ua, “Hiai mi bangmah a gitlouhna i mu kei uhi; Kha hiam Angel hiam in a kiang a thugen hileh eite Pathian dou suak ding ihi uh” a chi uhi.

¹⁰Huan kituahlouhna lianpi a hongom tak in, sepaih heutu lianpen in Paul a bohzan uh a lau a, sepaihte kiang ah, a va hohsuk a, a lak ua kipan kulh a va pitou teitei ding a chi hi.

¹¹Huan a zanin “Toupa Paul kiang ah ading a, “Khamuangtak in om in, Jerusalem khua a ka thu na theihsak bang in Rome khua ah leng na theisak ding hi,” a chi hi.

¹²Huan ni a suah in Judate a panghuan ua, Paul a thah masiah uh bangmah ne a dawnlou ding in a kichiamta uhi.

¹³Huai thubawlte sawmli sang a tamzaw ahi uhi.

¹⁴Amau siampu liante leh upate kiang ah a hoh ua, “Paul ka thah masiah uh bangmah chiamlou ding in ka kichiam uh a chi uhi.

¹⁵Huaiziak in, nou vaihawmte toh a thu kichian nawnsem a ngaihtuah tum bang in, na kiang ua pekhe ding in sepaih heutu lianpen kiang ah a hem deuh in va gentou un; na kiang nai uh a tunma in kou amah that ding in ka mankhin uhi” a chi uhi.

¹⁶Himahleh Paul sanggam nu tapa in a thusawm uh a naza a, kulh ah a valut a, Paul a vahilhta hi.

¹⁷Paul in sepaih zaheutu khat a sam a, “Hiai tangval sepaih heutu lianpen kiang ah pi in, a kiang ah thu banghiam gending nei a hihtuak” a chi hi.

¹⁸Huchi in sepaih heutu lianpen kiang ah a pi a, “Paul, hentapa’n, honsama, hiai tangval na kiang a honpi ding in a honsawla, na kiang ah thu banghiam gen ding a nei a hihtuak” a chi hi.

¹⁹Sepaih heutu lianpen in a khut in a len a, a simin a tuam paipiha, “Bang ahia honhilh ding na neih?” chi in a dong hi.

²⁰Aman, “Paul thu kichian nawnsema na ngaihtuah ding mah bang in, zingchiah vaihawmte kiang ah pisuk ding in Judate’n honnget hoih a sa chiat uh.

²¹Himahleh a thu uh na gingta ken; a lak ua mi sawmli sang a tamzaw in thah a sawm ua, huai mite’n amah a thah masiah uh bangmah ne a dawn lou ding in a kichiam uh; tuin na thu ngakin mansa in a om uhi” a chi hi.

²²Sepaih lianpen in tangval a paisaka, “Hiai thute n’on theisak chih kuamah hilh ken” a chi bikbek hi.

²³Huan sepaih zaheutu nih a sam a, “Zan ihsip hun in Kaisaria khaw pha a pai ding in sepaih za nih toh, sakol tungtuangmi sawmsagih toh, teitawimi za nih toh bawl un, a chi hi.

²⁴Gamukpa Felik kiang bita a tunsak theihna ding in Paul a tuanna ding un sakol na bawl ding in leng” a chi hi;

²⁵Huan hichibang in lai a gelhta hi.

²⁶“Klaudia Lisia in Felik Gamukpa hoihpa chibai a buk hi.

²⁷Hiai mi Judate’n a mu ua, a thah deklai un a kiang uah sepaihte pi in ka hoh a, Rome mi ahi chih ka theih in ka honkheta hi.

²⁸Huan a hekna uh theih ut in, vaihawmte kiang ah ka pisuk hi,

²⁹huchi in a danthu uh banghiam a hek ahi chih ka thei a, himahleh a hekna thu uah sihna leh henna ding bangmah ka theikei hi.

³⁰Huan Judate’n amah a tang uh chih min a hon theihsaktak un, na kiang ah amah k’on sawl ngal ahi, a hekte leng a tung a thubuai a neih peuh uh na ma a gen ding in thu leng ka pia hi” a chi hi.

³¹Huchi in sepaihte’n a thupiak bang in Paul a zanzan in a pi ua, Antipatri a tunpih uhi.

³²Huan a zing in sakol tungtuangmite a kiang a pai zel ding in a kiksan ua, kulh ah a hoh nawnta uhi;

³³Huan amau Kaisaria khua a tung ua, Gamukpa kiang ah lai a pia ua, Paul leng a ma ah a dingsak uhi.

³⁴Gamukpa’n a simkhit in, Paul omna gam a dong hi. Huan Silisia gam a ahi chih a theih in,

³⁵“Nang hon hekte a hongtun chiang un na thubuai ka ngaihtuah ding” a chi hi. Herod thukhenna inn a vending thu a pia hi.