Read Paite Chin NASEPTE 24 Bible Online

NASEPTE 24 - Paite Chin bible

NASEPTE 24

¹Huan ni nga nung in siampu lianpen Ananias a hong tungsuk a, Upa kuate hiam toh, a min Tertulla thugensiam khat toh; Paul tung a thubuai Gamukpa kiang ah a gen uhi.

²Paul a sapkhiak nung un Tertulla in amah a hek pan a: “Felik hoihpen, nangmah vanga khamuang petpet a ka om ziak un leh n’on kepna ziak a hiai chite ading a giloute kham hoih a om zel ziak in,

³Chiklaipeuh in koipeuh ah leng lungkimtakin ka pom gige uhi.

⁴Abang abang hitaleh, nang adia chimtakhuai hih ka ut kei hi, na migitna in thu kamkhat ahihleh hon ngaihkhiak sak ding in k’on ngen hi.

⁵Hiai mi huathuai pi, khovel a Judate tengteng tokbuaipa leh, Nazarit mite pawl a a makaipen khat uh a hih ka thei uhi.

⁶Pathian biakin hihbuah leng a tuma; huaiziak in ka man uhi,

⁷Ka dan bang ua a tung a vaihawm tum hi ung a, himahleh sepaih heutu lianpen Lisia hong kuan a, ngongtat kawm in amah ka khut ua kipan a lamang a, a tung a thubuai neite na kiang a hongpai ding in thu a pia hi.

⁸Nangmah ngei in amah dongtel in ka hekna tengteng uh na theithei ding hi” a chi hi.

⁹Huan Judate’n leng huai thu huchibang ahi, chi in, a panpih uhi.

¹⁰Huan Gamukpa’n thugen ding a Paul khut a a zaptakin: “Aman nang kum tampi hiai chite vaihawmsakpa na hih ka theih ziak in kipaktak in ka siamna thu ka gen ding ahi.

¹¹Jerusalem khua a Pathian be ding a ka hohtouh nung ni sawmlehnih a val naikei ding chih nana thei ding hi.

¹²Pathian biakin ah leh kikhopnain ah leng khua ah leng kuamah ka sel leh mipi ka hanthawn amau zong a hon mu kei uh.

¹³Tun ah leng a honhekna thu uh na theih in a bul a suikhe theikei ding uh.

¹⁴Himahleh hiai thu na kiang ah ka genkhe ding, Dan leh zawlneite thugelh tengteng gingta in, Lam dan, pawl tuam a chihte uh bang in ka pipute uh Pathian ka be zel hi.

¹⁵Mi diktatte leh diktatloute thohnawnna a om ding chih Pathian ah ka lamen a, hiai khawngte’n leng huai tuh a gingta sam uhi;

¹⁶Tua ziak in Pathian leh mihing tung a hihkhiallou ding in sialehpha siangtak nei ding in ka kibawl gige hi.

¹⁷Huan kum tampi nung in ka chipihte kiang ah thilpiak ding leh thillat ding hontawi in ka honghi.

¹⁸Huai thil ka piaklai in, Asia gam a kipan Judami khenkhatte’n Tempul ah mipi panglou leh buaina omlou a, Pathian biakin ah kisiangsak in a honmu uhi.

¹⁹Hiai mite’n ka tung a thubuai nei hile uh na ma ah hongpai in a hong hekkhinta ding uhi.

²⁰Ahihkeileh hiai mite ngei in vaihawmte ma a ka din lai in, ka hihkhelh bang ahia a muh uh, gen uhen.

²¹Hiai thu kam khat ziak houh a hih kei ngal leh, a lak ua ding in, Misi thohnawnna thu ah tuni’n na ma uah salhin ka om ahi, ka chih a chi a, a dawng hi.

²²Huan Felikin Lam thu a theihchet ziak in, “Sepaih heutu lianpen Lisia a hong tunsuk hun chiah na thu uh ka lem ding” chi in, a koih tadih hi.

²³Sepaih zaheutu kiang ah, Paul zalentak leh a lawmte a hongveh leh nektak a bawlsak utte khamlou a, vensak ding in thu a pia hi.

²⁴Huan ni bangzah hiam nung in Felik a hong nawn a, a zi Drusilla Judanumei toh, Paul a samsaka, Khrist Jesu ginna thu a ngaikhia hi.

²⁵Paul in diktatna thu, kidek thu, thukhen vaihawmna hongtung dingte a suipih detdet lai in, Felik in lauhuai a sa mahmah a, “Pai nawn phot inla, hunlem ka neih hun chiang in k’on sam ding” a chi hi.

²⁶Paul in dangka a piak peuh a lamen a, huaiziak in a sam mun sim a, a houpih zihzeh hi.

²⁷Himahleh kum nih a kivei sung in Porsia Festa in Felik a hon khengta hi; Felik in Judate lak a minhoih deih in, Paul hensa in a nuseta hi.