Read Paite Chin NASEPTE 25 Bible Online

NASEPTE 25 - Paite Chin bible

NASEPTE 25

¹Huchi in Festa in gamukna a lak in; ni thum nung in Kaisaria khua a kipan Jerusalem khua ah a hohtou hi.

²Siampu liante leh Juda makaite’n a kiang ah Paul tungtang thu a selam in a na theisak uhi.

³Jerusalem khua a pitouh sak ding in hehpihna leng a na ngen ua; lampi a na buka thah a tum uhi.

⁴Himahleh Festa in, “Paul Kaisaria khua a kep ding leh amah leng huailam a ka hohpah ding.” a chi hi.

⁵Huaiziak in “Huai mi’n gitlouhna nei ahihleh na lak ua thunei peuhmah in hon zuisuk in honghek uhen” chi in, a dawng hi.

⁶A lak ua ni sawmval a tam nung in, Kaisaria khua ah a paisuka; a zing in thukhenna tutphah a tuin, Paul honpi ding in thu a pia hi.

⁷Paul a hongtun phet in, Jerusalem khua kipan Juda hongsukte a kim ah ading ua, suikhiak vuallouh ding thubuai tampi giktak tak a gen uhi.

⁸Paul in a siamna thu a gen a, “Judate Dan hi in Pathian Biakin thu hi in, Kaisar tung ah leng bangmah hihkhelh ka neikei” a chi hi.

⁹Himahleh Festa in Judate lak a min hoih a deihman in Paul kiang ah, “Jerusalem khua a hohtouha, huailai a ka ma a hiai thute lepsak na deih hia?” chi in a dong hi.

¹⁰Paul in, “Kaisar thukhenna tutphah ma a, vaihawmsak a om ding in ka ding hi. Judate tung ah thil bangmah ka hihkhial kei chih nangmah in leng na theichian mahmah hi.

¹¹Migilou ka hih a, sihna khophial khelhna ka hihleh, sih leng ka nial kei; himahleh hiaite honhekna a bul bangmah a omkei leh, kuamah in a kiang uah hon pekhe theikei ding. Kaisar kiang ah ka tun ding” a chi hi.

¹²Huan Festa in a vaihawmpihte a houlimpih kimvel nung in, “Kaisar kiang ah thu natuna: Kaisar kiang ah na pai mahmah ding” chi in a dawng hi.

¹³Ni bangzah hiam nung in kumpipa Agrippa leh Barnisi Kaisaria khua a hongtung ua, Festa chibai a buk uhi.

¹⁴Huaia ni tampi a tam ziak un Festa in Paul thubuai kumpipa kiang ah a gen a, “Felik in mitang kuahiam a nusia hi

¹⁵Jerusalem khua a ka omlai in siampu liante leh Juda upate’n a tungtang thu a honhilh ua, siamlouh tansak a hon ngen uhi.

¹⁶Ken amaute kiang ah, a hekpa uleh a hekte a kimaituah ua, a hekna thu ua a siamna thu genna hunlem a neih ma in, mi kuahiam thah ding a piakkhiak Rome mite dan ahi kei hi, chi in, ka dawng hi.

¹⁷Huchi in hiai lai ka hongtun un, sawt hallou in a zing in thukhenna tutphah ah ka tu a, huai mi tuh honpi ding in thu ka pia hi.

¹⁸A hekte a dinlai un, ka muanmoh dan ngohna a tung ah gitlouhna thubuai a genkei uhi.

¹⁹A sabiak thu ua, Jesu, mi khat sisa, Paul in a hingnawn ahi, chi a a gup ziak in a tung ah thubuai a nei uh a na hi zaw hi.

²⁰Ken huai thute ngaihtuah ding dan ka theikei a, Jerusalem khua a hoh a, huailai a huai thu lepsak a ut leh utlouh ka dong hi.

²¹Himahleh Paul in Kumpipa lepdia sit a ngen zawta hi. Huaiziak in Kaisar kiang a ka hohsak theih masiah veng ding in thu ka pia hi” a chi hi.

²²Huan Agrippa in Festa kiang ah, hiai mi thu keimahmah in zak ka ut gige ahi, a chi hi. Aman, zingchiah a thugen na ngaikhe ding, a chi hi.

²³Huchi in a zing in Agrippa leh Barnisi thupitak in a hong ua, thugenna in ah a lut ua, sepaih heutuliante toh, khua a milian deuhte toh; huan Festa thu in Paul a pilut sak uhi.

²⁴Huan Festa in, “Kumpipa Agrippa leh hiai lai a om tengtengte aw, hiai mi na muh uh ahi, a tungtang thu a Judate tengteng in, hingtak nawnlou ding chi a kikou a, Jerusalem khua leh hiai lai a ka kiang a a hek uh ahi.

²⁵Himahleh sihna ding khop bangmah ahihkei chih ka thei hi. Huan aman Kumpipa kiang a tut a tup ziak in sawl ka tum ahi;

²⁶Himahleh a thu ginatakin bangmah gelh ding ka theikei hi. Huaiziak in na ma uah k’on pikhia hi, Kumpipa Agrippa nangmah ma a honpi tuanse ka hi a, etchet nung in banghiam bek gelh ding ka muh theihna ding in.

²⁷Hekna kiteltak omloupi a henta kuahiam Kumpipa kiang a sawl thil haihuai hi in ka thei hi” a chi hi.