Read Paite Chin NASEPTE 26 Bible Online

NASEPTE 26 - Paite Chin bible

NASEPTE 26

¹Huaizoh in Agrippa in Paul kiang ah, “Na siamna thu na genthei hi, a chi hi. Huan Paul in a khutvan a, a siamna thu a gen hi.

²“Kumpipa Agrippa, Judate’n a hon hekna tengteng uah ka siamna thu gen ding a tuni a na ma a ka din theih hampha ka kisa hi.

³Judate tawndan leh pupa ngeinate theisiam leh pil mahmah na hih ziak in ka kipak tuanse hi. Huaiziak in thuakzou tak in ka thugen hon ngaihkhiak sak ding in k’on ngen hi.

⁴“Ka tuailai hun a kipan ka chipihte lak leh Jerusalem khua a ka omdan Judate tengteng in a thei uhi.

⁵A tung a kipan ka tanchin theite ahi ua, huchi a ka sabiak dan ua ngentel pen a khosa Pharisai ka hih dan a ut ua leh a hon genpih thei uhi.

⁶Pathian in ka pipute uh kiang a thu a chiam lametna ziak in hiai ah tuin vaihawmsak in ka ding hi.

⁷Huai thuchiam lametna ziak in ka nam uh sawmlehnih in, sun leh zan in Pathian na phatuamngai tak a sem in muh a lamen uhi. Kumpipa aw, huai lametna tungthu ah Judate’n a hon hek uhi.

⁸Pathian in misite a kaithou ding chih bangchidan a thil hitheilou a ngaihtuah na hi ua?

⁹“Kei mahmah in Nazaret Jesu min kalh a hihtheih teng hih thil hoih in ka na ngaihtuah hi.

¹⁰Huai bang Jerusalem khua ah leng ka hih zel hi; siampu liante kiang a thu mu in, misiangthoute lak a mi tampi suangkulh ah ka khum zel hi; a hihlup lai un lemsa lam ah leng ka na pang zel hi.

¹¹Huan kikhopnain teng ah ka sawi gige a, Jesu thu gensiatsak ka tum teitei hi. Huan a tung uah ka gilou mahmah a, gamdang khua tanpha in leng ka sawi zel hi.

¹²“Huchibang a hih ding in siampu liante thu mu in leh a sawlna lai uh tawi in Damaska khua ah ka hoh hi.

¹³Kumpipa aw, huchi a ka pailai in sunlaitakin, nivak sang a vakphazaw van a kipan in keimah leh ka paipihte kim ah hongvak ka mu hi.

¹⁴Ka vek un lei ah ka puk ua, Hebru pau in, Saul, Saul, nang bang a chia honsawi? Sutna chiangzum tot nang dia na ahi, chi in ka za hi.

¹⁵Ken Toupa, kua na hia? ka chi hi. Toupa’n, na sawi, Jesu ka hi a chi hi.

¹⁶Himahleh thou inla ding in; hiai na thilmuhte leh na kiang a k’on lahlai dingte semding leh theihpih dia sikha a nang honbawl ding in na kiang ah ka hong kilak ahi;

¹⁷Mitengteng leh ka honsawlna mite, Jentelte khut a kipan k’on humhing ding hi;

¹⁸A mit uh hihvak ding in a kiang uah k’on sawl ahi, huchi in mial apan vaklam a nga ding ua, Setan thuneihna Pathian lam a ngatsan ding uhi, khelhna ngaihdamna a muhna ding uleh a hon gintak ziak ua sehtuam siangthoute lak a goutan a neihna ding un, a chi hi.

¹⁹“Huaiziak in kumpipa Agrippa aw, van a kilakna ka selkei hi,

²⁰A tung in Damaska khua a mite kiang ah, huan Jerusalem khua a te kiang ah, Judia leh gamchih a mite kiang leh Jentelte kiang ah leng kisik minpu a thilhih a kisik a, Pathian lam a ngatna ding un ka hilhzaw hi.

²¹Huaite ziak in Judate’n Pathian biakin ah a hon man ua, hon hihlup a tum uhi.

²²Himahleh Pathian kiang a kipan a panpihna ka muh ziak in tunitan in mi neute leh mi liante kiang a thu theisak in ka omlai hi, zawlneite leh Mosi in hongtung ding a chih thu kia uh loungal thu dang genlou in.

²³Huchi a, Khrist in gim a thuak ding a, misi lak a kipan a thohnawn ziak a mi tengteng kiang leh Jentelte kiang a vak musakpa masapen ahi ding a chih thu uh, a chi hi.

²⁴Huchibang a a siamna thu a genlai in, Festa in, aw ngaihtak in, “Paul, hai na hi; na theih tamna in nang hon haisak hi” a chi hi.

²⁵Himahleh Paul in, Festa hoihpen, “Hai kei veng e; thu diktak leh thu piltak ka genzaw ahi.

²⁶Hiai thute kumpipa’n a thei vaw oi, a kiang ah leng laulou in ka gen hi; hiai thil bangmah a kiang ah im ahi kei chih diktak in ka thei hi. Hiai thu inkil kawm peuh a a guk a hih ahi kei hi.

²⁷Kumpipa Agrippa, zawlneite na gingta hia? Na gingta chih ka thei” a chi hi.

²⁸Agrippa in Paul kiang ah, “Sawtlou chik sung in Khristian n’on suaksak zoudek” a chi hi.

²⁹Paul in, “Sawt in sawt kei leh, nang kia ka chi kei, tuni a ka thu za tengteng leng keimah bang a om ding in Pathian kiang ah ka ngen ahi, kolbun tuanse lou in” a chita hi.

³⁰Huan kumpipa toh, gamukpa toh, Barnisi toh, a kiang ua tute toh ading chiat uhi;

³¹A paituam ua a kihou ua, “Hiai mi’n sihna leh kolbutna khop hial thil bangmah a hih kei” a chi uhi.

³²Agrippa in Festa kiang ah, “Hiai mi’n Kaisar kiang a tut ding na chikei leh pawt mai ding hiven” a chi hi.