Read Paite Chin NASEPTE 27 Bible Online

NASEPTE 27 - Paite Chin bible

NASEPTE 27

¹Italy gam a long a pai ding thu a hihpuk tak un, Paul leh henta dang kuate hiam Augusta pawl a sepaih zaheutu a min Julia a kemsak uhi.

²Huan Adramittium khaw long, Asia gam tuipi piau a khaw omte tawn ding ah ka tuang ua, tuipi ah ka paita uhi; Masidonia gam a mi Aristarkhas, Thessalonika khaw mi ka kiang uah a om hi.

³A zing in Sidon khua ka tawn uhi. Julia in Paul a limbawl ngial a, kihihhalh ding in a lawmte kiang ah a pawtsak hi.

⁴Huai a kipan in tuipi ah ka pai nawn ua, huih in a hilou lam a honmut ziak in Kupra tuikulh zul huih hatlouhna lam ah ka tai uhi.

⁵Silisia gam leh Pamphilia gamzul tuipi ka khennung un, Lidia gam a Mira khua ka tung uhi.

⁶Huai ah sepaih zaheutupa’n Aleksandria khaw long Italy gam tawn ding a mu a; huai ah ahon tuangsak hi.

⁷Ni tampi, awlawl in ka pai ua, Knidas khaw zawn haksapi in ka tung teitei ua, huih in hon sawnkik ziak in Salmoni zuan in Krit tuikulh zul huih hatlouhna lam ah ka tai uhi.

⁸Haksatak in tui geigei ah ka pai ua, Long khawlna Kilawm a chih mun uh ka tungta uhi; huai kiang ah Lasia khua a om hi.

⁹Huan ni tampi a beitak ziak in leh long a pai a lauhuai ziak in, Anngawlni a khengta ngal a, Paul in amau a thuhilh a, a kiang uah,

¹⁰“Pute aw, tua long a tuangte siatna leh manthatna thupitak i tung ua tung ding ahi chih ka thei a, a sum leh long tung ah kia ka chi kei a, eimah tung ah leng ka chi ahi” a chi hi.

¹¹Himahleh sepaih zaheutu in Paul thugen sang in longpu leh long neipa thu a gingta zaw hi.

¹²Phalbi douna ding in longkhawlna a ginat louh ziak in a tamzaw in huai a kipan a tuipi a paikhiak a, Phinisi khua tun teitei a, huailai a phalbi dou a sawmpih ua; Phinisi tuh Krit tuikulh a longkhawlna khat ahi, malsak leh simsak lam ahi.

¹³Sim huih awlawl a a hong nuntakin a deihlam uh mu a kisa ua, sikkip a khai khia ua, Krit tuikulh zulzul ah ka pai uhi.

¹⁴Himahleh sawtlou nung in gam lam a kipan in huih hattak a hong nungsukta a, huai huih tuh Euroklidon a chi zel uhi.

¹⁵Long a hon mutkhata a, huihlam a ngat theihlouhtakin ka khahta ua, hon mutleng hon mutlengta hi.

¹⁶Kauda tuikulh neuchik petmah pansan in huih hatlouhna lam ah ka tai ua, haksatak in long neu ka bitsak thei uhi;

¹⁷A kaihkhiak nung un panpihna khaute khong a zang ua, long nuailam ah vialkawm in a khih uhi. Puanzakna bangkim a puksak ua, huchilou in zaw Sirti a lenlut a lau ua, huchi in a hon mutleng lengta hi.

¹⁸A zing in, tuikihawt in honsep ek ziak in, long a vante tui lak ah a paikheta uhi.

¹⁹Huan a ni thumni in, amau khut in long vante a paikhe nawnta uhi.

²⁰Huan ni tampi ni leh aksi leng a kimu kei a, huihpi hat petmah in honnuai a, hin himhim ka lamen nawn kei uhi.

²¹Huan an nelou a sawttak a om nung un, Paul a lak uah ading a, “Pute aw, Krit tuikulh a kiphellou dia, ka thuman a, hiai siat leh manthatna tuahlouh ding hizen a.

²²Himahleh tun ah leng khamuangtak a om ding in k’on hanthawn hi. Na lak uah kuamah in hinna na mangsak kei ding uh, long zaw a mangthang ding.

²³Amah Pathian a ka hih a a nna leng ka sep, amah angel tuzan in ka kiang ah a hongdinga, ka kiang ah,

²⁴“Paul, lau ken, Kaisar ma ah na ding ding. Ngai in, long a na kiang a zin tengteng leng Pathian in a honpia hi, a honchi hi.

²⁵Huaiziak in Pute aw, khamuangtak in om un, Pathian ka gingta hi, honhilh bang in a om ding hi.

²⁶Himahleh bang tuikulh hiam ah hon lenkhe ding ahi” a chi hi.

²⁷Zan sawmlehli a chin zan in Adria tuipi ah huih in a langlang ah a hon mutleng leng lai hi. Zankim lai in, long mite’n koi gam hiam tungdek in a kithei uhi;

²⁸Huchi in tui thukdan a teh ua, lam sawmnih in a thei ua, huan sawtlouchik in a tehnawn ua, lam sawmlehnga in a thei uhi.

²⁹Huan longmei lam ah sikkip li a khia ua, huchilou in zaw suang se mun ah hon lenkhe zenzen kha ding chih a lau ua; huan khovak kal a ngaklahta uhi.

³⁰Huan longmite’n long malam a sikkipte khiak ding bawl a kineih in longneu tuh tuipi ah a khia ua long taisan a tum uhi.

³¹Hiai lai in Paul in, sepaih zaheutu leh sepaihte kiang ah, “Hiaite long a om gige kei uleh a bit kei ding uh” a chi hi.

³²Huchi in sepaihte’n longneu khaute a at tat ua, a khahta uhi.

³³Khovak kuan in, Paul in an ne ding in mi tengteng a sawl a: Tuni ni sawmlehli ahita, bangmah nelou in na om ua, an na ngawl nilouh uhi.

³⁴Huaiziak in, an ne ding in k’on sawl chiat ahi; na damna ding uhi; na lak uah kuamah a samzang khat leng a mangthang kei ding” a chi hi.

³⁵Huai thu a genkhit in tanghou a la a, Pathian kiang ah kipahthu a genkhit in, mi tengteng ma ah a balkham a, a ne panta hi.

³⁶Amau leng khamuangtak in a om ua, an a ne samta uhi.

³⁷Long a mite kavek un za nih leh sawmsagih leh guk ka hi uhi.

³⁸An a nekkham khit un, buh tuipi ah a pai ua, long a hihzang deuh uhi.

³⁹Huan ni a suah in, koilai gam ahia chih a theikei ua; himahleh, koilai longkhawlna hiam piautak nei khat a mu ua, huai tung ah a hih theih uleh long taikhiak sak a tum uhi.

⁴⁰Huan sikkip khihnate a attat ua, tuipi ah a nusia ua; tua lai mah in kaihheina khihnate a phel ua, malam puanzak huih mut ding dan in a kaitou ua; piautak a zuanta uhi.

⁴¹Himahleh tuikihawt khauh nih kituahna mun ah ka lutkha zenzen ua, long in lei het in, huchi in, long mailam a tang bikbekta a, hihtat zoh louh in a om hi, long meilam bel tuikihawt a hat ziak in a kekgawpta hi.

⁴²Huan hentate tuiliau galkai khattou a om kha ding ua, a taimang kha ding uh chih a lauh manun sepaihte’n amaute hihlup mai a sawm uhi.

⁴³Himahleh sepaih zaheutu in Paul humhing a ut a, a thiltup uh a khama; tuiliau siam peuhmah tuipi ah tawmkhiaka gam na kaimasa ding leh,

⁴⁴Midang a khen singpek tung leh a khen long van tung a kitholh galkai ding in thu a pia hi. Huchi in, avek un gam ah bittak in a galkai vek uhi.