Read Paite Chin NASEPTE 28 Bible Online

NASEPTE 28 - Paite Chin bible

NASEPTE 28

¹Huan gam a ka suahtak un, tuikulh min tuh Malta ahi chih ka theita uhi.

²Tuikulh gammite’n hehpih in hon na hehpih ua; vuah a hongzuk ziak leh khovot ziak in mei a toh ua, ka vek un a hon na kipahpih uhi.

³Paul in singlom khat a toma mei ah a chih a, a sat ziak in gul a hong vakkhia a, a khut a tuin a tangden hi.

⁴Tuikulh gammite’n ganhing a khut a kikhai den a muh un, “Hiai mi tualthat ahi ding, tuipi a kipan in taikhe mahleh diktatnain a hin a phalta lou ahi” a chi uhi.

⁵Himahleh aman gul mei ah a singkhia a, bangmah a chi kei hi.

⁶Amau bel a bawk hiam, thakhat a puk paha si ding in a gingta uhi; hunsawtpi a ngak nilouh ua, bangmah a chi kei chih a theih un a lungsim uh a kheng ua, Pathian ahi a chi zaw uhi.

⁷Huai mun kiang ah huai tuikulh a hausapa a min Publia a om a, huai mi in a hon na kipahpih a, ni thum siamtakin a hon tungsak hi.

⁸Publia pa khosik leh santen vei in a na lum a; Paul a kiang ah a lut a, a thum a a tung ah a khut a koih in a hihdamta hi.

⁹Huai a hihdam khit in tuikulh a midang natna nei peuhmah a hong ua; a dam chiatta uhi.

¹⁰Huai mite’n nakpitak in a hon na pahtawi ua; ka pai ding un ka vante uh long ah a hong koih uhi.

¹¹Huan kha thum nung in, Aleksandria khaw long, phalbi a tuikulh a omsa, pathian phik, Kastor leh Pollux lutang kisuanna long ah ka pai uhi.

¹²Sirakasi khua ka tawn ua huai ah ni thum ka tam uhi.

¹³Huai a kipan ka paikawi ua, Rejiam khua ka tung ua; ni khat nung in sim huih a hongnung a, a zingnawn in Puteoli khua ka tung nawn uhi;

¹⁴Huai ah unaute ka mu ua, a kiang uah ni sagih tam ding in a hon khou ua; huchibang in Rome kholam ah ka pai zelta uhi.

¹⁵Huan unaute’n ka Tanchin uh a zaktak un huai a kipan in Appii dawl leh Khualbuk thumte omna chiang ah hong dawn ding in a hong kuan ua; Paul in huai mite a muh in Pathian kiang ah kipahthu a gen a, a lungmuang mahmahta hi.

¹⁶Rome khua a ka lut un Paul bel a vengpa sepaih kiang a amah kia a om a phal uhi.

¹⁷Ni thum nung in, Paul in Juda heutu deuh peuhmah a samkhawm a; a kihoukhawm ua, a kiang uah: “Unaute aw, mi tengteng leh i pipute dan tung ah bangmah ka hihlouh in leng Jerusalem khua a kipan in Rome khua a mite kiang ah a hon hentasak uhi.

¹⁸Amau a hon etchet khit un sihna khop hial ka tung ah bangmah a muhlouh ziak un khah a hontum uhi.

¹⁹Himahleh Judate’n huai a sel ziak un Kaisar kiang tunlou thei ka hita kei a; himahleh ka chipihte hekna nei a hihbel ka hi kei hi.

²⁰Huailam thu a noumau honmu a hon houpih ding in ka honsam ahi; Israelte lamet thilte toh kisai a khainiang bun ka hi ngal a” a chi hi.

²¹Amau a kiang ah, na tanchin Judia gam a kipan lai in ka mu kei ua, unaute hiai a hong omte kuamah in na tungtang thubuai bangmah a pulak kei ua, gen leng a gen ngeikei uhi.

²²Himahleh hiai pawl zaw gam teng ah gensiat ahi ngal ua, nang bangchi’n ahia na ngaih chih theih ka ut uhi” a chi uhi.

²³Huan ni a chiam ua, huai a tunna ah a kiang ah mi tampi a hong ua; zing a kipan nitaklam pha in a kiang uah huai thu a hilhchian a, Pathian gam thu a theisak a, Mosi dan laibu thu leh zawlneite laibu thu in Jesu lam ah amau a thuzoh zel hi.

²⁴Khenkhat in a thugen a gingta ua, a khen in a gingta kei uhi.

²⁵Huan a kituakta kei ua, Paul in thu a genkhit in a paikheta uhi. A thugen tuh hiai ahi, “Kha Siangthou in zawlnei Isai kam a na pipute uh kiang a a thugen a dik mahmah hi chi in:

²⁶‘Hiai chite kiang ah vagen in, Bil in zaw na za na ding ua, a ngaihna zaw na theikei hial ding ua; muh zaw na mu ding ua, theih zaw na theikei hial ding uh:

²⁷Hiai chite lungtang a takta a, a bilte uh a na ngong deuh a, a mit uh leng a si ua, huchilou in zaw a mit un a mu ding ua, a bil un a za ding ua, a lungtang un leng a thei ding uh, a kiheikik ding ua, ken ka hihdam kha ding hi’ a chi, a chihpen ahi.

²⁸Huaiziak in Pathian hotdamna thu Jentelte kiang a khakkhiak ahi chih thei un, amau zaw ngaih leng a ngaikhe ding uh” a chi hi.

²⁹Huchi a hiai thute a genkhit nung in, Judate tuh a pawtkheta ua, amau lak ah nakpitak a kiselna a nei uhi.

³⁰Huchi in Paul kum nih vengveng amah inluah ah a om a, a kiang a hoh peuhmah a na kipahpih hi,

³¹Pathian gam thu a hilh a, Toupa Jesu Khrist thu hangsantak in a gen zel a, kuamah in amah lah a kham kei uhi.