Read Paite Chin NASEPTE 3 Bible Online

NASEPTE 3 - Paite Chin bible

NASEPTE 3

¹Huan Peter leh Johan, dak kua na ah thum hun lai in Pathian biakin a lut ding in a hohtou uhi.

²Piching kuahiam a piantung apat khebai a hon zawng ua, biakin a lutte kiang a khutdoh ding in, biakin kongkhak, Kilawm, bul ah niteng in a lumsak uhi.

³Peter leh Johan Pathian biakin a lutding mu in khut a doh hi.

⁴Peter in amah a en gegu a, Johan in leng; huan Peter in, “Hon en in” a chi hi.

⁵Aman amau apan banghiam muh a lamen a, a enpah hi.

⁶Himahleh Peter in, “Dangka leh dangkaeng bangmah ka neikei; himahleh ka neihsun ka honpe ding, ‘Nazaret Jesu Khrist min in khe in paita in’ ” a chi hi.

⁷Huan a khut taklam a len a, a kaithouta a; huchi in thakhat in a khete leh a siakmit guhte a hong hatpah hi.

⁸Amah a tawmtou a, ading a, khe in a paipah hi. Khe a paipai, diangdiang leh, Pathian phat kawm in biakin ah a lut hi.

⁹Huan khe a pai leh Pathian a phat mi tengteng in a muh un;

¹⁰Biakin Kongkhak Kilawm bul a khutdoh a tupa ahi chih a thei ua; a tung a thiltung lamdang a sa mahmah ua, a buaipih uhi.

¹¹Huan aman Peter leh Johan a letlai in, mi tengteng in lamdang a sa mahmah ua, inlim Solomon a a chih uah a kiang uah a hong taikhawm uhi.

¹²Peter in huai a muh in, mite a houpih a, “Nou Israel mite aw, hiaite bangdia lamdang sa? Koumau thilhihtheihna leh Pathian ka limsak ziak ua amah ka paisak bang zen ua bang a chia hon en gige?

¹³Abraham, Isak, leh Jakob Pathian, i pipute Pathian in, a sikha Jesu a pahtawita ahi; amah na mansak ua, Pilat in khah a tup in leng a ma ah na ut kei uhi.

¹⁴Mi Siangthou leh Dik na deihkei ua, tualthatpa na kiang ua piak na ngen zawta uhi.

¹⁵Hinna Siampa tuh na that ua; himahleh Pathian in amah misi lak apat a kaithou nawn a; huai theihpihte ka hi uhi.

¹⁶Amah min gintak ziak in a min in hiai mi na muh uh leh na theih un a hihhatta hi; Amah ziak a ginna a hongom in na vekua mitmuh in a hihdam vilvelta hi.

¹⁷“Himahleh unaute aw, na heutute un a theihlouh ziak ua a hih bang un, na theihlouh ziak un hiaite na hih uh ahi chih ka thei uhi.

¹⁸Himahleh Pathian in zawlnei tengteng kam in, Khrist in gim a thuak ding thu a theikholsak hi, huchibang in a tungsak zawta hi.

¹⁹Huaiziak in na khelhna te uh thaimangna ding in kisik unla, kihei nawn un, huchi in Toupa apat halh hun hongtung ding hi.

²⁰Khrist Jesu nou adia a seh mah leng, a honsawl ding hi;

²¹Himahleh Pathian in thil bangkim a bawlhoih hun a hongtun masiah amah van a a om ding him ahi; huai bawlhoih ding thu Pathian in leilung piantung a kipan a zawlnei siangthoute kam a a gen khit ahi.

²²Mosi ngei in Toupa Pathian in keimah a honbawl bang in na unaute lak ah zawlnei khat a hon bawlsak ding; aman thu tengteng na kiang ua a gen peuh na ngaihkhiak sak ding uhi.

²³Huan mi kuapeuh huai zawlnei thu ngaihkhiak saklou tuh, milak a kipan a hih mangthang ahi ding, a chi hi.

²⁴Ahi, Samuel om a kipan zawlnei tengteng, a nung ua mite toh, thugen peuhte’n, tulai tanchin a genkhol uhi.

²⁵Noute zawlneite leh thukhun tate neive ua; Pathian in Abraham kiang ah, Na suante ziak in khovel a namchih a vualzawl ding uh, chi in, na pipute uh kiang ah a chiam hi.

²⁶Pathian in a Tapa Jesu, misi lak a kipan kaithou in, na khelhnate uh kiheisanna ding leh kisikmite vualzawl ding in noumau kiang ah a honsawl masapen hi” a chi hi.