Read Paite Chin NASEPTE 4 Bible Online

NASEPTE 4 - Paite Chin bible

NASEPTE 4

¹Huan Peter leh Johan in mite kiang a thu a genlai un, siampute, biakin heutute leh Saddukaite a kiang uh a hongtung guih ua;

²mite a sinsak uh leh Jesu ziak a misi lak a kipan thohnawnna thu a hilh ziak un a lungkimkei uhi.

³Huan a man ua nitaklam a hih ziak in a zingsang pha in suangkulh ah a khumta uhi.

⁴Himahleh thungaikhete a khen tampite’n a gingta ua; a tamlam uh piching ngen leng sang nga vel a ching uhi.

⁵A zing in a heutute uh, upate, laigelhmite,

⁶Siampu lianpen Ana leh Kaiapha, Johan, Alexander, siampu lianpen tanau tengtengte leng Jerusalem khua ah a omkhawm uhi.

⁷Peter leh Johan a lai ah a dingsak ua, “Bang thilhihtheihna in ahia, kua min in ahia hiai na hih uh?” chi in a dong uhi.

⁸Huchi in Peter Kha Siangthou in a dim a, a kiang uah, “Nou mipite vaihawmte leh Israel upate aw,

⁹hiai mi damlou tung a na hoih ka sep thu uah, hiai mi bangziak in ahia a hong damtak chi in tuin salh leh dot a om ka hi umaw;

¹⁰Nou tengteng leh Israel mi teng in leng thei hen, Kros a Nazaret Jesu Khrist na kilhden uh, Pathian in misi lak a kipan in a kaithou nawn a, amah min ngei in hiai mi hiai ah na ma uah dam in a dingta ahi.

¹¹‘Nou inlammite aw, na suangpaih uh, a ning a, suang phatuampen a hong hita, huai amah ahi a chi uhi.’

¹²Midang kuamah kiang ah hotdamna a omkei, van nuai a mihing sak lak ah, hon hondam ding min dang a omkei” a chi hi.

¹³Peter leh Johan hansan dan a muh un, laisiamlou mi leh namtom maimai ahi uh chih a theih un lamdang a sa mahmah uhi; huchi in Jesu kiang ah a omkhinta uh chih a thei uhi.

¹⁴Huan mi a hihdam uh a kiang ua ding a muh un, bangmah a gense thei tuankei uhi.

¹⁵Huchi in a vaihawmna ua pat a a paituamsak nung un, a kihou ua,

¹⁶“Hiai mite bangchi’n i hihdia? Thillamdang minthang a hih uh Jerusalem khua a om tengteng in teltak in a theita uh; en leng i sel thei tuankei hi.

¹⁷Himahleh midang kiang a a than semsem louhna ding un tunung siah kuamah kiang ah hiai min a thu a genlouhna ding un i vau ding uh” a chi uhi.

¹⁸Huchi in amau a sam ua, Jesu min a thugen hetlou ding leh hilh hetlou ding in a chi chiltel uhi.

¹⁹Himahleh Peter leh Johan in a kiang uah, “Pathian mitmuh in Pathian thuman sang in noumau thuman a dikzaw hia ngaihtuah un.

²⁰Kou zaw ka thilmuh uh leh ka zakte uh genlou in ka om theikei uh” a chi uhi.

²¹Huan amau tuh a vau semsem ua, a khahta uh, mipi ziak in gawtna lemtang a mu kei uhi; a thilhih ziak un mi tengteng in Pathian a pahtawi uhi.

²²Thillamdang a a hihdam uh kum sawmli sang a tamzaw ahi.

²³Huan Peter leh Johan a pawt un amau lawmte kiang ah a vahoh ua, siampu liante leh upate’n a kiang ua a gen peuh uh a hilh vek uhi.

²⁴Huchi in a ngaikhete’n a kituak in aw ngaihtak in Pathian kiang ah “Toupa, nang tuh van leh lei, tuipi leh asung a omte tengteng Bawlpa na hi;

²⁵Nang Kha Siangthou in, ka pu uh na sikha David kam in, hiai thu na gen ahi: ‘Jentelte bangchi’n eita a heh uh? Namchih in bangchi’n ahia thil phatuamlou a ngaihtuah uh?

²⁶Khovel kumpipate ading ua, heutute leng a kikhawm ua, Toupa leh a Khrist kalh in,’ chi in.

²⁷Hiai khua ah na sikha siangthou, na thaunilh Jesu tung ah, Herod leh Pontia Pilat toh, Jentelte leh Israel mite toh a kikhawmta uhi.

²⁸Na khut leh na lungsim a hongtung ding a na sehkholh peuh hih ding in.

²⁹Huchi in tun ah, Toupa, a honvau dan uh ngai in; na sikhate kiang ah na thu hangsantak a gen theihna pia in.

³⁰Damsak ding a na khut na zak a, na sikha Jesu min a chiamtehnate leh thillamdangte hih ahihlai in” a chi uhi.

³¹Huan a thum khit un a omkhawmna uh a hongling a, avek un Kha Siangthou in a dim ua, hangsantak in Pathian thu a hilhta uhi.

³²Huan a gingta mipite lungsim munkhat leh ngaihtuah munkhat in a om ua: a lak ua khat in leng a thil thilneihte, kei a tuam ahi, a chi kei ua, thil tengteng a kikop uhi.

³³Sawltakte’n thilhihtheihna thupitak in Toupa Jesu thohnawn thu a hilhhilh ua; avek ua tung ah hehpihna thupitak a om hi.

³⁴Huan a lak uah leng tasam kuamah a omkei uh; gam leh inn nei peuh in a zuak ua, a thilkhotte uh a man a hontawi uhi.

³⁵Huan sawltakte khe bul ah a koih zel ua, amau deihdong ching hun chiat in a hawmchiat zel uhi.

³⁶Huan Levi chi a mi khat, Kupra tuikulh a kipan, Joses, sawltakte’n Barnaba a chih uh, huai min omdan, “Khamuanna Tapa” chihna ahi.

³⁷Hiai mi in a gam neih a zuak a, a man a hontawi a, sawltakte khebul ah a koih hi.