Read Paite Chin NASEPTE 5 Bible Online

NASEPTE 5 - Paite Chin bible

NASEPTE 5

¹Himahleh mi khat a min Ananias, a zi Sapphira toh a om ua; Ananias in a neih uh a zuak hi.

²Huan a zi theih in a man a khen a im a, a khen tawi in sawltakte khebul ah a koih hi.

³Himahleh Peter in, “Kha Siangthou khem ding leh gam man a khen im ding in bangdia Setan in na lungtang hihkhauh ahia?

⁴A omlai teng nang a ahi gige ka hia? Na zuak nung in leng na thuthu in a om ka hia? Bang a chia hiai thute na lungtang a ngaihtuah? Mihing khem na hi kei a, Pathian khem na hi zaw” a chi hi.

⁵Ananias in huai thu a zaktak in a puk a, a sita hi; a zakha peuh in a lau mahmah uhi.

⁶Tangvalte a thou ua, tuam in a zawngkhia ua, a vuita uhi.

⁷Dakkal thum ding hiam nung in, thil omdan theilou in a zi a honglut hi.

⁸Peter in a kiang ah, “Honhilh in, gam hiai zahphet in maw na zuak uh?” a chi hi. Aman “He, hiai zah phet in ahi” a chi hi.

⁹Huan Peter in a kiang ah, “Bang a chia Toupa Kha ze-et ding a kithutuak na hi ua? Ngai in, kongkhak bul ah na pasal vuite khepek a hong omta, nang leng a hon zawngkhe ding uh” a chi hi.

¹⁰Huchi in thakhat in a khebul ah a pukpah a, a si hi; tangvalte a honglut ua, amah si in a hong mu ua, a zawngkhia ua, a pasal kiang ah a vuita uhi.

¹¹Huan saptuamte leh huai thu za peuhte’n a lau mahmah uhi.

¹²Huan milak ah Pathian in sawltakte khut in chiamtehna leh thillamdang tampi a hihzel hi. Huan amaute avek un lungsim munkhat in Solomon inlim ah a kikhawm zel uhi.

¹³Midang bel kuamah a lak uah a pang ngamta kei uhi; himahleh min amaute a phat uhi.

¹⁴Huan Toupa lam ah numei leh pasal gingthak tampi behlap semsem in a om uhi.

¹⁵Huchi in mi damloute kongzing ah a lumsak ua, Peter paikawm a a lim bek in a lak ua khat bek a liah theihna ding in, a chi uhi.

¹⁶Jerusalem khokim a kipan mipite leng huai damloute dawinin hihgimte honpi in a hong khawm ua; huaite leng a hong dam chiat uhi.

¹⁷Huan siampu lianpen a kisa a, a kiang a omte tengteng toh, a lawmte tuh Saddukai pawl ahi uhi; amau hazatna in a dim uhi.

¹⁸Sawltakte a man ua, vantang khumna ah a khumta uhi.

¹⁹Zankim in Toupa angel khat in kongkhakte hawng in, a pikhia hi.

²⁰Pathian biakin ah vading unla, mite kiang ah hiai hinna thu vagen un, a chi hi.

²¹Huan huai thu a zak un khovak hunlai in, Pathian biakin ah a valut ua, thu a vagen uhi. Himahleh, siampu Lian leh a lawmte a hong ua, vaihawmte leh Israel suante upate tengteng a samkhawm ua, sawltakte honpi ding in suangkulh ah mi a sawl uhi.

²²Himahleh heutute suangkul ah a vahoh ua, amau a mu kei uhi; huchi in a kiknawn uhi.

²³“Suangkulh bittak a kikhak in, a vengte leng kongkhak bul ading a mu uhi, himahleh ka hong ua, asung ah kuamah ka mu kei ua” chi in a gen uhi.

²⁴Huan Pathian biakin Upa leh siampu liante’n, huai thute a zak un, hiai bangchiphet in a thang diam aw? chi in, a thu ah a mangbang petpet uhi.

²⁵Huan mi khat a hong a a kiang uah, “Ngai un, suang kulh a na mi khumte un Pathian biakin ading in thu a gen uh” chi in a hong gen hi.

²⁶Huchi in Tempul vengte heutupa leh sepaihte a vapai ua, vantang a kihtak ziak un hiamgamna omlou in sawltakte a honpi ua, huchi hi kei leh suang a den ahi kha ding uhi.

²⁷Huan a pitung un, vaihawmmite ma ah a dingsak uhi. siampu lianpen in a kiang uah,

²⁸“Huai min in thu hilhlouh ding k’on chita ua; thei un na thuhilh un Jerusalem khua a hihdim vekta hi, hiai mipa sisan hon khuksak tum neive ua” chi in a sal hi.

²⁹Himahleh Peter leh sawltakte’n, “Mihing thu sang in Pathian thuman a kiphamoh zaw hi a chi uhi.

³⁰Nou sing ah Jesu khaikang in na that ua, i pipute Pathian in a kaithou nawnta hi.

³¹Amah mah Pathian in Kumpipa leh Hondampa a om ding in a taklam ah a hihlianta hi. Israelte khelhna apan kiheisak ding leh ngaidam ding in.

³²Huai thute kou a theihpihte ka hi ua; Kha Siangthou, Pathian in a thuzui peuhte kiang a a piaktak, a theipa ahi nawnlai” chi in a dawng uhi.

³³Amau huai thu a zak un a sin uh a thak mahmah a, hihlup a tumta uhi.

³⁴Himahleh vaihawmte lak ah, a min Gamaliel, Pharisai, Dansiammi, mi tengteng lak a minthangpi mi khat a dingtou a, huai mite inn pawlam a omsak takdih ding thu a pia hi.

³⁵Huan vaihawmte kiang ah, “Nou Israel mite aw, hiai mite tung a na thilhih tup uah pilvang un.

³⁶Tuma lam in Theuda kichi, mi khat a hongom a, huai mipa kiang ah mi tampi, za li phial, a awn uhi, amah tuh hihlup in a omta a; a thuzui peuhmah avek un a dalhzakta ua bangmah ahita kei uhi.

³⁷Huai mi om nung in kisimpi lai in, Galili gam ah mi khat Judas kichi a hongom nawn hi; a lam ah mi khenkhat a hip nawn hi; himahleh amah leng a sita a, a thuzui peuhmah avek un a dalhzakta uhi.

³⁸Huaiziak in tuin k’on hilh ahi, hiai mite khoih kei unla, amau omom in omsak un; hiai a thiltup uh leh a thilhih uh mihing a kipan ahihleh a mang ding hi.

³⁹Himahleh Pathian a kipan ahihleh amau na hihmang theikei ding uh; huchilou in zaw Pathian dou na hi zaw kha ding uh” a chi hi.

⁴⁰Huan a gen lem a sata ua; huchi in, sawltakte tuh a sam ua, a vua ua; a vuakkhit un, Jesu min a thu genlou ding chi bikbek in a khahta uhi.

⁴¹Huchi in vaihawmte lak a kipan a pawtkhia ua, Khrist min ziak a daina thuaktak a seh a hih ziak un a kipak mahmah uhi.

⁴²Huan niteng in Pathian biakin leh amaute inn ah, Jesu Khrist ahi, chi in, thuhilh leh sinsak a tawp kei uhi.