Read Paite Chin NASEPTE 7 Bible Online

NASEPTE 7 - Paite Chin bible

NASEPTE 7

¹Huan siampu lianpen in, “Hiai thute a dik ahi na hia?” a chi hi.

²Stephen in, “Unaute aw, pate aw, ngai un. I pu Abraham, Haran khua a a omma a, Mesopotamia gam a a omlai in, thupina Pathian a kiang ah a hong kilak in, a kiang ah,

³Na kholam leh na chite lak a kipan pawt inla, gam k’on etsak ding lam ah pai in, a chi hi.

⁴Huan amah tuh Kaldaite gam a kipan a paikhia a, Haran khua ah a va omta hi; huan a pa sihnungin huai a kipan in tua na omna kholam uah Pathian in a pemlut sak hi.

⁵Huan hiai ah zaw bangmah munluah ding, khengakna tham leng, a pekei hi. Himahleh tapa a neihma nangawn in amah gou ding leh a nung a a suante gouluah ding in gam piak a chiam hi.

⁶Pathian in hichibang in a gen; A suante mi kholam ah kum za li a tam ding ua min sikha in a bawl ding ua, a sawi behlap ding uh.

⁷Pathian in, sikha a nei dingte nam keiman ka ngaihtuah ding a, huaikhit chiang in a hongpawt ding ua, hiai mun ah ka na a sem ding uh, a chi behlap hi.

⁸Pathian in a kiang ah tua zeksum thu a khung hi; huchi in, Abraham in Isak a suang a, a ni giat ni’n a zek a sum a, huan Isak in Jakob a suang a; Jakob in chisuang ding sawmlehnihte a hon nei hi.

⁹“Tua chisuang dingte’n Joseph a haza ua, Aigupta gam ah a zuak ua; himahleh Pathian a kiang ah a om hi.

¹⁰A gimthuak tengteng ah a honkhe zel a, Aigupta gam kumpipa Pharo leng a hehpihsak a, mipiltak ahi chih a theisak behlap hi; huchi in aman Aigupta gam leh a in a mi tengteng tung ah gamukpa in a bawlta hi.

¹¹Aigupta leh Kanan gam tengteng ah kial a hongtung a, gimthuakna thupitak a hongtungta hi; i pipute’n nekding himhim a muta kei uhi.

¹²Himahleh Jakob in Aigupta gam ah buh a om chih a zaktakin i pipute a sawlkhia a; tua bel a hoh pattungna pen uh ahi.

¹³Huan a nihvei hohna uah, Joseph a unaute kiang ah kitheisakta a, huchi in Joseph chite tuh Pharo kiang ah a kitheisakta uhi.

¹⁴Huan Joseph in a pa Jakob leh a unau tengteng mi sawmsagih leh nga a samsak hi.

¹⁵Huchi in Jakob Aigupta gam ah a hohsuk a; amah leh i pipute a sita uhi.

¹⁶Sekem khua ah a pawtung ua, Abraham in Sekem khua a Emmor tapate lak a dangka sum a a lei han ah a vuita uhi.

¹⁷“Pathian in Abraham kiang a a thuchiam a hongtun ding in mite Aigupta gam ah a hongpung ua, a hongtam deuhdeuh uhi.

¹⁸Huan Aigupta gam ah Joseph theilou kumpi dang khat hong lal hi.

¹⁹Huai mi in i chipihte a zekhem a, i pipute a sawi a, a naungekte uh hinglou ding in a paikhe saksak hi.

²⁰Huailai in Mosi a hongpiang a, Pathian muh in melhoih mahmah ahi; a pa inn ah kha thum a kem uhi.

²¹A koihkhiak un Pharo tanu in amah tapa ding a la in a kem hi.

²²Huan Mosi Aigupta gam a pilna tengteng a hilh ua, thu ah leh a thilhih ah a thupi mahmah hi.

²³“Huan amah kum sawmli a chin kuan in, a unau, Israel suante a veh hi.

²⁴Huan a lak ua mi khat gimthuaklai a mu a, a panpih a, a hihgimpa Aigupta mi a that a, phu a laksakta hi.

²⁵Mosi in amah khut in Pathian in amaute a hondam chih a unaute’n theina uhiam a sa a, himahleh a theikei uhi.

²⁶Huan a zing in a lak ua mi nih a kilai un a kiang uh a vanaih a, Pute aw, unau neive ua; bangdia diklou tak a kibawl na hi ua? chi in, lep a tum hi.

²⁷Himahleh a invengpa tung a thugilou bawl zaw pen in Mosi tuh a sawnhang a, koute tung a heutu leh vaihawm ding in kuan a honbawl a?

²⁸Zan a Aigupta mi na thah bang a, honthah tum na hi maw? a chi hi.

²⁹Huai thu ziak in Mosi a taimangta hi, Midian gam ah a tam nilouhta hi, huai ah tapa nih a vanei hi.

³⁰“Huan kum sawmli nung in Sinai tang gamdai ah; loubuk ah meikuang lak ah angel khat a kiang ah a hong kilak hi.

³¹Mosi in a muh in, a thilmuh tuh lamdang a sa mahmah a; huan en ding a a pailai in, Toupa aw in:

³²Kei na pipute Pathian, Abraham Pathian, Isak Pathian, Jakob Pathian, ka hi a na chi hi. Huchi in Mosi a ling a a en ngamta kei hi.

³³Huan Toupa’n a kiang ah, Na khepek a kipan na khetuam suah in; na dinna Mun Siangthou ahi a chi hi.

³⁴Aigupta gam a om ka mite gimdan ka mu gige hi, a thum uh leng ka za gige, amau honkhe ding in ka hongsuk ding hi. Hong in, Aigupta gam ah k’on sawl ding, a chi hi.

³⁵“Kou tung a heutu leh vaihawm ding a kuan honbawl ahia, chi a a deihlouh uh, Mosi, loubuk a angel kilak tungtawn in, Pathian in amah mah heutu leh honkhepa hikhawm ding in a sawlta hi.

³⁶Aman Aigupta gam ah Tuipi San leh gamdai mun ah, kum sawmli sung in thillamdang leh chiamtehnate a musak phot a, amaute a pikheta ahi.

³⁷Israel suante kiang ah, Pathian in keimah bang in, na unaute lak ah mi zawlnei khat, a thu na ngaihkhiak ding uh a hon bawlsak ding chipa Mosi ahi.

³⁸Huai mi gamdai a saptuamte lak a ompa, Sinai tang a angel in a houpihpa leh, i pipute kiang a ompa ahi; huai mi eite hon piaksawn ding a thuhingte lasawnpa mah ahi.

³⁹“I pipute’n amah thu a mangkei ua, a hua ua, Aron kiang ah,

⁴⁰I makai ding in pathiante hon bawlsak in; Aigupta gam a kipan a hon pikhepa Mosi lah a tanchin ka thei nawnta kei uhi, chi in, a lungtang uh Aigupta gam lam ah a nga nawnta uhi.

⁴¹Huailai in bawngnou lim a bawl ua, a mai a kithoihna a lan ua amau khutsuak milim tung ah a kipak uhi.

⁴²Huchi in Pathian in a lehngatsan a, van a aksi chibai a buk theihna ding un amaute a tawpsanta hi; Zawlnei laibu a, ‘Aw nou Israel inkawte aw, gamdai ah kum sawmli sung in gan sisan a kithoih in thillat toh in kei n’on bia ua eita?

⁴³Molok biakna maitam leh na pathian uh, Remphan aksi leh, na milim bawltawmte uh, vialpuak in chibai buk ding in na zong ua huaiziak in Babulon khaw khenlam ah sal in k’on pawmang ding,’ chih gelh bang in.

⁴⁴“I pi leh pute’n gamdai ah theihpihna biakbuk, Mosi kiang a a theihsaka om bang leh a lim a muhsak a om bang in a na bawl uhi.

⁴⁵Huai biakbuk mah i pipute suansawnte’n leng a neisawn zel uhi, Pathian in i pipute ma a Jentel a delhkhiakte gam a luahlai un, Joshua makaih in biakbuk a lutpih ua; David hongom tan in huai ah a om gige hi.

⁴⁶David Pathian mitmuh in deihsaktakin a om a, Jakob Pathian ading in inn bawlsak a ngen hi.

⁴⁷Himahleh Solomon in huai inn tuh a lamsak zawta hi.

⁴⁸Himahleh zawlnei gen bang in Tungnungpen tuh khut a bawl innte ah a omkei hi;

⁴⁹‘Toupa’n van ka tutphah ahi, lei ka khepek ngakna ahi: inn bangchibang n’on lamsak ding ua? Ka khawlna mun ding koi mun ahia?

⁵⁰Hiai thilte keimah khut in ka bawl kei ahia?’ chi a, a gen bang in.

⁵¹“Mi genhakte, lungtang leh bil a zeksumlouhte aw, chiklaipeuh in Kha Siangthou na dal gige uh; na pipute uh hihbang in na hih nilouhlouh uhi.

⁵²Na pipute un zawlneite lak ah kua ahia a sawilouh uh? Mi Diktak hongding thugen khawlte a that ua; huai midiktak mansakte leh thatte noumau na hi uhi.

⁵³Dan angelte piaksawn mu masa a zuiloute aw” a chi hi.

⁵⁴Huan huai thu a zak un a sin uh a thakta a, Stephen tung ah a ha uh a gawita uhi.

⁵⁵Himahleh amah Kha Siangthou in a dim a, vanlam a en a, Pathian thupina leh Pathian taklam a Jesu ding a mu hi;

⁵⁶“Ngai un, van kihong ka mu a, Pathian taklam a Mihing Tapa ding leng ka mu” a chi hi.

⁵⁷Huchi in amau aw ngaihtak in a kikou ua, a bil uh a hum ua,

⁵⁸Kituaktakin a pang ua, khua a kipan a delhkhia ua, suang in a deng ua, a theihpihte’n tangval khat a min Saul khebul ah a puante uh a koihkhawm chiat uhi.

⁵⁹Amaute’n Stephen suang in a dengta uhi; aman Pathian sam in, “Toupa Jesu, ka kha la in” a chi hi.

⁶⁰Huan khukdin in aw ngaihtak in a kikou a, “Toupa, hiai a khelhna tung uah mawh pawsak ken” a chi hi. Huchi in, huai a gen zoh in, a ihmuta hi. Saul in leng a sih hoih a sa hi.