Read Paite Chin NASEPTE 8 Bible Online

NASEPTE 8 - Paite Chin bible

NASEPTE 8

¹Huai ni’n Jerusalem khua a saptuam omte, min nakpitak in a sawi panta ua; sawltakte kia loungal Judia leh Samaria gam khoteng ah a dalhzak vekta uhi.

²Huan Pathian limsak kuate hiam in Stephen a vui ua, nakpitak in a sun uhi.

³Saul in bel saptuam pawlte a sawi a, inn teng a lut in, numei pasal a kaikhia a, suangkulh ah a khum hi.

⁴Huan a dalhzakte khoteng ah a paita ua, thu a gen zel uhi.

⁵Samaria khua ah Philip a hohsuk a, a kiang uah Khrist thu a tangkoupih hi.

⁶Huan a thillamdang hihte a zak ua, a muh un, mipite’n lungsim mun khat in, Philip thugente a limsakta uhi.

⁷Dawininte mi tampi a matte sung ua kipan in aw ngaihtak a kikou a pawt leh, zaw leh khebai tampi hihdam a a om ziak un.

⁸Huchi in tua khopi ah nakpitak a kipahna a om hi.

⁹Huan mi khat a min Simon a om a; aman mi thupi ka hi, chi in tuma lam in huai khua ah mitkhialdawi in Samari khomite lamdang satakin a bawl nilouh hi.

¹⁰Mi tengteng, a neupen apan a lianpen tan in “Hiai mi Pathian thilhihtheihna thupi a chih uh ahi” chi in, a thu a limsak chiat uhi.

¹¹A mitkhialdawi in sawtpi lamdang satak a a bawlnak ziak in a thu a limsak uhi.

¹²Himahleh amau Pathian gam Tanchinhoih leh Jesu Khrist min Philip gen a gintak un, numei leh pasalte’n baptisma a tangta uhi.

¹³Huan Simon nangawn in leng a gingta a, baptisma a tanzoh in Philip kiang ah a om gige a, chiamtehna leh thillamdang thupite a mu a, lamdang a sa thei mahmah hi.

¹⁴Huan sawltak Jerusalem khua a omte’n Samari khua a mite’n Pathian thu a gingtata uh chih a zak un, a kiang uah Peter leh Johan a sawl uhi.

¹⁵Huai mite a vatun suk uleh Kha Siangthou a tan theihna ding un a thumsak uhi.

¹⁶Huai ma in a lak uah kuamah tung ah a tung naikei hi; Toupa Jesu min in baptisma a tang phet uhi.

¹⁷Huan sawltakte’n a tung uah a khut uh a koih ua, Kha Siangthou a muta uhi.

¹⁸Huan sawltakte khutngakna ziak a Kha Siangthou piak ahi chih Simon in a muh in; dangka piak a sawm hi.

¹⁹“Hichibang thuneihna hon pesam un, kua peuh tung a leng khut ka koihna in Kha Siangthou a tansamna ding in” a chi hi.

²⁰Himahleh Peter in a kiang ah, “Na dangka nang toh mang hen, Pathian thilpiak dangka sum a lei na tup ziak in.

²¹Hiai thu ah nang zaw na pang kei, tan leng na neikei hi; na lungtang Pathian ngaih in a dikkei hi.

²²Huaiziak in, hiai na gitlouhna tawpsan inla, Toupa kiang ah thum in, huchi in na lungtang a na ngaihtuah a hon ngaidam kha mawh ding hiam.

²³Thil khakna sinkha ah leh gitlouh gaklopna ah na om chih ka thei hi” a chi hi.

²⁴Huan Simon in, “Na thilgen uh bangmah ka tung a hong tunlouhna ding in noumau in Toupa kiang ah hon thumsak un” a chi a, a dawng hi.

²⁵Huchi in amau Toupa thu a theihsak ua, a gen zohnung un, Jerusalem a kiknawn in, Samari mite tenna khua tampi ah Tanchinhoih a gen zel uhi.

²⁶Huan Toupa angel khat in Philip a houpih a, “Thou inla, simlam a Jerusalem a kipan a Gaza khaw sunsuk lampi huai gamdai ah hoh in,” a chi hi.

²⁷Huchi in a thou a, a paita hi: huan ngai in, Ethiopia gam a mi khat, Ethiopia kumpinu Kanda gou tengteng kempa, michilgeh thuneitak, Jerusalem khua ah Pathian be ding in a hohtou hi.

²⁸A paikik lam kangtalai a tuin zawlnei Isai laibu a sim hi.

²⁹Huchi in Kha in Philip kiang ah, “Huai kangtalai vanaih inla, ki thuahpih in” a chi hi.

³⁰Philip michilgeh kiang ah a vatai a, zawlnei Isai laibu a sim a za a, “Na sim a omdan na thei hia?” a chi hi.

³¹Aman “Kuamah hon hilhchet louh in bangchi’n ka thei dia?” chi in a kiang a kaltou a tutpih ding in Philip tuh a chialta hi.

³²Laisiangthou a simlai tuh hiai ahi: ‘Goh ding belam bang in amah a pi ua; Belamnou a mulmetpa ma a a dai dinden bang in aman leng a kam a ka kei;

³³A vuallelh lai in a tung ah thugen a phal kei ua; a suante tanchin kua’n a hon gen ding ua? Khovel a kipan in a hinna a laksak ngal ua,’ chi in.

³⁴Michilgeh in Philip a houpih a a kiang ah, “Zawlnei in hiai thu kua thu a genna ahia, amah thu hia, midang thu? k’on dong hi” a chi hi.

³⁵Huan Philip in a dawng a, Laisiangthou thu a bul apan in, a kiang ah Jesu thu a hilhta hi.

³⁶Huan lampi a a paikawm un koimun hiam tui omna a tung ua; huan michilgeh in, “En dih, hiai ah tui a om, baptisma tanna ding bang in a hondal a ahia?” a chi hi.

³⁷Philip in, “Na lungtang tengteng a na gintak leh na hi thei” a chi hi. Aman “Jesu Khrist Pathian Tapa ahi chih ka gingta” chi in a dawng hi.

³⁸Huchi in kangtalai a khawlsak ua, a nih un, Philip leh mi chilgeh, tui ah a hoh khawm suk ua; Philip in amah a baptista hi.

³⁹Huan tui apat a paitouh un Toupa Kha in Philip a lamangta hi; huan michilgeh in amah a mu nawn takei hi, nuamsatak in a pai zel hi.

⁴⁰Himahleh Azota khua ah Philip muh in a om nawnta hi; a paisuak a, Kaisaria khua a tun masiah khoteng ah Tanchinhoih a gen zel hi.