Read Paite Chin NASEPTE 9 Bible Online

NASEPTE 9 - Paite Chin bible

NASEPTE 9

¹Saul in Toupa nungzuite vau leh thah a tupthu a gen lailai man in siampu lianpen kiang ah a vahoh hi.

²Damaska khua a kikhopnain tengteng a mite kiang a piak ding in lai a ngen a, hiai Lampi zuimi kuapeuh a muh leh, numei leh pasal leng, hen a Jerusalem a honpi theihna ding in.

³A pailai in, Damaska khua a tunkuan in, thakhat in van a kipan vak a kim ah a hongvak puap hi.

⁴Huan lei ah a puk a, a kiang ah, “Saul, Saul, Bang a chia nang honsawi na hia?” chi in, aw a za hi.

⁵Huan aman “Toupa, kua na hia?” a chi hi. Toupa’n a kiang ah, na sawi Jesu ka hi; kilhna sikzum tot nang din a haksa hi” a chi hi.

⁶Huan ling leh lamdangsa kawm in, “Toupa bang sem ding a hondeih na hiam?” a chi hi. Toupa’n a kiang ah “Thou inla, khopi ah lut in, huchi in na hih ding hilh in na om ding hi” a chi hi.

⁷A tonpihte gen ding theilou in ading ua, aw zaw a za ua, himahleh kuamah a mu kei uhi.

⁸Huan lei a kipan in Saul a thou a; a honghaka kuamah a mu theita kei hi; huchi in a khut in a kai ua, Damaska khua ah a pilut uhi.

⁹Huan ni thum khomulou in a om a, bangmah ne in a dawn kei hi.

¹⁰Huan Damaska khua ah a min Ananias nungzui khat a om hi. Toupa’n mengmu bang in a kiang ah, “Ananias” a chi hi.

¹¹Huan aman, “En in, Toupa, hiai ah ka om” a chi hi. Toupa’n a kiang ah, “Thou inla, kongzing Tang a chih uah hoh inla, Judas inn ah, Tarsa khua a mi, a min Saul kichi kankhia in. Ngai in, a thum laitak ahi.

¹²Aman mengmuhna in mi khat a min Ananias a kiang a valut a, a mit hihvakna ding a a tung a khutnga in a muta hi” a chi hi.

¹³Ananias in, “Toupa huai mi Jerusalem khua a na misiangthoute tung a a tatsiat thu mi tampi kam ah ka za hi.

¹⁴Huan hiai ah na minlou peuhmah hen ding in siampu liante a kipan thuneihna toh hongpai ahi” a chi a, a dawng hi.

¹⁵Himahleh Toupa’n a kiang ah, “Hohmai in; Jentelte, kumpipate, leh Israel suante kiang a ka min puaklutna dia ka belseh ahi;

¹⁶Ka min ziak in gimna bangchi a thupi ahia a thuak ding a kiang ah ka theisak ding” a chi hi.

¹⁷Huan Ananias a vahoh a, inn ah a lut a, huan a tung ah a khut a nga a, “Unau Saul, na mitvakna ding leh Kha Siangthou dim a na om theihna ding in, Toupa, na hongpaina lampi a na kiang a kilak Jesu’n honsawl ahi” a chi hi.

¹⁸Huan thakhat in a mit a kipan lip bang a keta a, a mit a vak nawnta a; a thou a, baptisma a tangta hi.

¹⁹Huan an a ne a, a halhta hi. Huan Damaska khua a nungzui omte kiang ah ni bangzah hiam a tam hi.

²⁰Kikhopnain ah Jesu, Pathian Tapa a hihdanthu a tangkoupih zui ngal hi.

²¹Huan a thuzate tengteng in lamdang a sa uhi, hiai mi Jerusalem khua a hiai minloute sawi zelpa ahi ka hia? Huai mite siampu liante kiang a hensa a piak a hongna pen ahi, a chi uhi.

²²Saul bel a hong hattuam a, huai mi Khrist ahi taktak chih a hilhchiana, Damaska khua a Juda omte gen ding bei in a koih hilhial hi.

²³Huan ni sawttak nung in Saul that ding in Judate a kihou uhi;

²⁴Himahleh aman a thiltup uh a na thei hi. Huan that ding in kulh kong teng ah sun leh zan in a tang uhi.

²⁵Himahleh a nungzuite’n amah zan in a pi ua, kulh tohlet ah bawm in a khaikheta uhi.

²⁶Huan Saul Jerusalem khua a tuntakin nungzuite kithuahpih a tuma; amau bel avek un amah a kihta uhi, nungzui a hihsam a gingta kei uhi.

²⁷Barnaba in amah a pi a, sawltakte kiang ah a hon paipih a, lampi a Toupa a muh a, a houpih dan bang, Damaska khua a Jesu min a hangtak a thu a hilh dan bang leng a kiang uah a genta hi.

²⁸Huchi in Jerusalem khua ah Saul tuh a kiang uah lutzel pawt zel in a omta hi, Toupa min in hangsantak in thu a gen zel hi.

²⁹Huan Grik pauzang Judate kiang ah thu a gen a, a sel a; amau bel amah hihlup a tum uhi.

³⁰Huan unaute’n huai a theihtak un, Kaisaria khua ah a pisuk ua, Tarsa khua ah a sawlmangta uhi.

³¹Huchi in saptuamte Judia, Galili, leh Samari gam kimvel ah a kip deuhdeuh ua, muangtakin a omta uhi; huan Toupa laudansiam in, Kha Siangthou khamuan in a om ua, a hong pung deuhdeuh uhi.

³²Huan Peter in khokim a totvial vial kawm in, Lidda khua a Mi Siangthou omte kiang ah leng a hohsuk hi.

³³Huai ah mi khat a min Ainisi a zawt ziak a kum giat lupna a lum nilouh a mu hi.

³⁴Huan Peter in a kiang ah, “Ainisi aw, Jesu Khrist in a hon hihdam, thou inla, na awngphah zial in,” a chi hi. Huchi in a thou pahta hi.

³⁵Huan Lidda khua leh Saron phai a omte tengteng in Ainisi a mu ua, Toupa lam a nga duam uhi.

³⁶Huan Joppa khua ah a min Tabitha nungzui khat a om a, Tabitha minkhiakna tuh Dorka ahi, huai numei in thilhih hoih leh thilpiak a hau mahmah hi.

³⁷Huailai in, a chi a na a, a sita hi; huchi in a silsiang ua, indan tungnung ah a sial uhi.

³⁸Huan Lidda khua tuh Joppa khaw kiang a hih ziak in, nungzuite’n Peter huai ah a om chih a za ua, “Sawt hallou in ka kiang uah hongpai in” chi a vathum ding in a kiang ah mi nih a sawl uhi.

³⁹Huan Peter a thou a a kiang uah a paita hi. Huan a tuntakin indan tungnung ah a pi ua; meithai tengteng ding in Dorka a kiang ua a omlai a a puanak bawlte a puan bawlte lak kawm in a kap chiat uhi.

⁴⁰Himahleh Peter in avek un a pawtsak a, a khukdin a, a thumta hi; huan luanglam a nga a, “Tabitha, thou in” a chi hi. Huchi in a mit a honghaka, Peter a muhtak in a tutou hi.

⁴¹Huan Peter in a khut a pia a, a kaithou hi, misiangthoute leh meithaite a sam a, dam in a peta hi.

⁴²Huan huai Joppa khua tengteng in a thei vek ua; mi tampi in Toupa a gingta uhi.

⁴³Huan Joppa khua ah savun bawlpa Simon inn ah ni tampi tak Peter a tam nilouh hi.