Read Paite Chin ROMTE 10 Bible Online

ROMTE 10 - Paite Chin bible

ROMTE 10

¹Unaute aw, ka lungtang deihlam leh amau adia Pathian kiang a ka thumna pen zaw, hotdam a hong hihtheihna ding uh ahi.

²Pathian lam ah phatuam a ngai uh chih ka theihpih ahi, himahleh theihna ahihvak in zaw ahi kei uh.

³Pathian diktatna theilou in, amau diktatna lamkhiak a tum ua, Pathian diktatna ah a kipe lut sam kei uhi.

⁴Khrist bel a gingta peuhmahte adin diktatna a muh theihna ding un dan tawpna ahi.

⁵Mosi in, “Dan a diktatna zui zaw, huai diktatna ziak in a hing ding” chi in a gelh hi.

⁶Ginna a diktatna in bel huchi in a gen: “Na lungsim in, kua ahia van ah kah ding? Hiam, ‘tunglam a kipan Khrist va pisuk ding’ chihna ahi;

⁷Kua ahia khukthuk a hohsuk ding? Hiam, ‘huai bel misi lak a kipan Khrist pitou nawn ding’ chihna ahi, chi ken” chi in.

⁸Ahihleh, bang ahia a gen? “Thu in a honnaih hi, na kam leh na lungtang ah a om” chi in, a gen ahi; huai ginna thu ka gen pen uh ahi.

⁹Na kam a Jesu Toupa ahi chih na gup a, misi lak a kipan Pathian in a kaithou chih na lungtang a na gintak leh hotdam in na om ding.

¹⁰Min lungtang in a gingta ua, diktatna a mu uhi; kam in a gum ua, hotdamna leng a mu nak uh ahi.

¹¹Laisiangthou in, “Kuapeuh amah gingta a zahlak kei ding” a chi hi.

¹²Juda leh Grik mite bangmah ah a lamdang tuankei ua, Toupa khat avek ua tung ah Toupa ahi a, a minlou peuhmahte tung ah hoihna a hau ngal a.

¹³“Kuapeuh Toupa minlou tuh hotdam in a om ding” chih ahi.

¹⁴Ahihleh, a gintaklouhpi uh bangchi’n a lou ding ua? A thu a zaklouhpi uh bangchi’n a gingta ding ua? Thuhilhmi omlou in bangchi’n a za ding ua?

¹⁵Sawl ahihkei uleh bangchi’n thu a hilh ding ua? “Thil hoih tanchin kipahhuai tunte khe kilawm natel e!” chih gelh bang in.

¹⁶Himahleh Tanchinhoih avek un a ngaikhe kei uhi. Isai in “Toupa, ka thugen uh kuan ahia gingta?” a chih bang in.

¹⁷Huchi in ginna tuh zakna ziak in a hongom a, zakna Khrist thu kigen ziak in a hongom hi.

¹⁸Ahihleh a bil un a za kei ua hia? Za nake; “A husa uh gamchih ah a thang a, a thu uh kawlmong pha in a thangsuakta” chih ahi.

¹⁹Ahihleh, Israel mite’n a za kei ua hia? “Mipi dia gentham louhte k’on haza sak dia; nam pilloute zang in k’on hehsak ding,” chi in, Mosi in a gen masapen hi.

²⁰Huan Isai in hangsantak in, “Hon zongloute muh in ka omta; hon kanloute ka kimusakta” a chi hi.

²¹Himahleh Israel mite thu ah, “Mi chihmawh leh selhatte din sun nilouh in ka ban ka zak hi” a chi hi.