Read Paite Chin ROMTE 11 Bible Online

ROMTE 11 - Paite Chin bible

ROMTE 11

¹Ahihleh Pathian in a mite a paikhia ahia? Paikhelou hial. Keileng Israel mi, Abraham suan, Benjamin nam ka hi ngal a.

²Pathian in a mi a theihkholhte a paikhe kei hi. Laisiangthou in Elijah thu a gen na theikei ua hia? Aman Israel mite tungthu Pathian kiang ah a tun a,

³“Toupa na zawlneite a that ua, na maitamte a hihchim ua; keimah kia nutsiat in ka om, keileng hon hihlup a hontum uhi” a chih.

⁴Himahleh Pathian in bangchi’n a dawng a? “Baal ma a khukdin ngeilou mi sang sagih keimah ading in ka hawi hi” chi in, a dawng hi.

⁵Huchibang in tulai in leng a sibang, hehpihna a tel a om uhi.

⁶Hehpihna ziak ahihleh, nasep ziak ahita kei, huchi ahihkei leh, hehpihna tuh hehpihna ahita kei ding.

⁷Bangchi ahita dia leh? Israel mite’n a zon uh a mu kei uh. Telte’n bel a mu uh, a dangte tengteng a nang gawp ta uhi.

⁸“Pathian in tunitan in a kiang uah lusukna kha a pia a, muh theihlouhna mitte, zak theihlouhna bilte toh” chih gelh bang in.

⁹David in, “A dohkan uh amau a ding in thang leh pial, pukna leh phulakna honghi hen;

¹⁰A theihlouhna ding un a mitte uh hong mial hen, nang a nungzang uh kunsak gige in” a chi hi.

¹¹Ahihleh a kisuih uh a kipuk den na ding uhia? Hilou hial ding. A puk ziak un Jentelte kiang ah hotdamna a hongtung zawta hi, Israel mite hazat ding in.

¹²Huchi in a pukna u bawn khovel hih hauhsakna a hih a, a kiamna uh bawn Jentelte hauhsakna ahihleh, a buchin nawnna uh bangchi phet a hamphatna lianzaw in a zui diam aw!

¹³Huchi in nou Jentelte kiang ah ka gen ahi. Kei Jentelte kiang a sawltak ka hih ziak in, ka nasepna pen ka pahtawi ahi,

¹⁴Huchi a ka chipihte ka hazat saktheih teitei na ding leh a lak ua khenkhatte ka hotdam theihna ding in.

¹⁵Amau paihkhiakna bawn khovel toh kituahnawnna ahihleh, amau deih nawn na ding sihna a kipan hin nawnna loungal bang ahi dia?

¹⁶Huan, gah masa thillat, tangbuang mekthem a sianthou leh huchi mah bang in a beupi a siangthou hi; a zungpi a siangthou leh a hiangte leng huchi mah bang ahi uhi.

¹⁷Hiang khenkhat te hihtan a a om in, nang olive taklou, amau lak a phuhlut in na om a, olive sing a hauhna zung kikoppih sam na hihman in,

¹⁸Hiang dangte lak ah kisathei ken. Kisathei mahle chin nang a zung vakpa na hi kei a, huai a zung nang honvakpa ahizaw hi.

¹⁹Huan nang “Phuhlut a ka om theihna ding in hiangte hihtan in a om khinta vaw oi” na chi dia.

²⁰Ahi a gintaklouhna ziak un hihtan in a om ua, nang na ginna ziak in na ding ahi, uang kenla, lau zaw in:

²¹Pathian in hiangtakte pen bawn a hawi kei ngal leh, nang leng a honhawi tuankei ding hi.

²²Huchi in Pathian hoihna leh a thukhauhna ngaihtuah in: a pukte ading a a thukhauhna; nang ading in bel a hoihna, hoihna a na om gige leh; huchi ahihkei leh nang leng satkhiak in na omsam ding.

²³Huan amau leng gingtalou a a om nilouh kei uleh, phuhlut in a om nawn ding uh; Pathian in amau a phutlut nawn thei hi.

²⁴Nang piandan a olive taklou a kipan a satsup bawn, piandanlou bang a olive sing hoih a phutlut a na om leh, tua a hiangtakte, amau olive sing ngei ah phutlut hina tel un chia!

²⁵Unaute aw, hiai thuguk na theihlouh uh ka utkei a, huchilou in zaw na kipilsak ding uh: Jentelte buchinna a hongtun masiah Israel mi khenkhatte tung ah siatna a hongtung tadih hi.

²⁶Huchi in Israel mi tengteng hotdam in a om ding uh: “Zion a kipan in Hondampa a hongsuak ding a, Jakob kiang a kipan Pathian limsaklouhna a hihmang ding”

²⁷“Hiai a kiang ua ka thukhun ding hiai ahi, a khelhnate uh ka lakmang chiang in” chih gelh bang in.

²⁸Tanchinhoih lam ngaihtuah in, nou ziak in melma ahi ua; tel thu lam ngaihtuah in bel a pipute uh ziak in deihtakte ahi uhi.

²⁹Pathian in a thilthawnpiak ah leh a sapna ah a lungsim a khel ngeikei hi.

³⁰Nidanglai in Pathian thu na gingkei ua, himahleh tuin amau a ginlouh ziak un zahngaihna na mu ngal ua.

³¹Huchi mah bang in tuin, Pathian in nou a hon hehpihna ziak a, zahngaihna a muhtheihna ding un amau leng ginglou eita ve ua.

³²Pathian in a hehpih vek theihna ding in mi tengteng ginlouhna ah a khumvekta hi.

³³Pathian pilna leh theihna hauhdanthuk hina tel e! A vaihawmnate theihtheih vual leh, a lampite suizoh vual hi keina tel e!

³⁴“Toupa lungsim kua’n ahia thei? Kuan a vaihawm sak a?

³⁵“A ditnawn ding in leng a kiang ah kuan ahia thil pe masa?”

³⁶Amah a kipan leh amah ziak leh amah ading in thil tengteng a hongom ahi ngal a; amah kiang ah tangtawn in thupina om hen. Amen.