Read Paite Chin ROMTE 12 Bible Online

ROMTE 12 - Paite Chin bible

ROMTE 12

¹Huchi in unaute aw, Pathian zahngaihna ziak in, kithoihna hing, siangthou leh Pathian lungtuak ding in na sapum uh lan ding in k’on ngen ahi; huai na biakna dan ding him uh ahi.

²Hiai khovel dan bang in omkei unla; Pathian deihlama hoih leh, lungtuahhuai tak leh hoihkim na theihtel theihna ding un, na lungsim uh a thaka om in hong lamdang zawta un.

³Na lak uah kuamah na kilet sak ding hun val ua kiliansak lou in, Pathian in michih kiang a ginna hun a piak bangzel a diktak a ngaihtuah zaw ding in Pathian in honpiak hehpihna ziak in k’on chi chiat ahi.

⁴Sapum khat ah hiang tampi i nei ua, hiang tengteng nasep bel a kibang kei hi,

⁵huchi mah bang in, eite tampi himah lehang Khrist ah sapum khat ihi ua: a tuamtuam in i ki hiangtuah chiat uhi.

⁶Hehpihna a honpiak dan bangzel in thilthawnpiak tuamtuam i neichiat uhi: thugen ding ahihleh i ginna toh kihun in i gen ding uhi;

⁷Nasep ding ahihleh na i sem chiatchiat ding uh; thuhilhmi’n leng hilh hiathiat hen;

⁸Taihilhmi’n leng taihilh geihgeih hen; thilpemi’n itlou in pia hen; vaihawmmi’n thanuam tak in hawm hen; mi hehpih in kipaktak in hehpih hen.

⁹Itna ahihleh lepchiahna tellou in hi hen. Gilou hua unla, hoih lam len chinten un.

¹⁰Unaute it lam ah ittak in kilainat tuahchiat un; pahtawi lam ah, kideihsak tuah chiat un.

¹¹Thanop lam ah, thadah kei un; Kha a vakna toh phatuamngai in Toupa nna sem un.

¹²Lametna ah kipak unla; gimthuakna ah kuhkal unla; thumna ah thum teitei unla;

¹³Misiangthoute taksapna ah taksap awnghu unla; mikhualte kipahpih in om nilouh un.

¹⁴Honsawite vualzawl unla, vualzawl unla, hamsiat kei un.

¹⁵Kipakte kipahpih unla, kapte kahpih un.

¹⁶Ngaihtuah kibang in omchiat un, kingaihtuah sang lawkei unla, mi neuneu kithuahpih zaw un. Kipilsak kei un.

¹⁷Kua gitlouh leng gilou in thuk kei un. Mi tengteng muh in thil kilawm ngaihtuah un.

¹⁸A theih liai leh noumau lambek, mi tengteng toh kituak in om un.

¹⁹Deihtakte aw, phu kila kei unla, Pathian hehna awn zaw un, “Phulak himhim keimah lak ding ahi, ken ka thukna ding, Toupa’n a chi” chih gelh ahi.

²⁰Huaiziak in, “Na melma a gilkial leh nekding pia inla; a dangtak leh dawn ding pia in; huchibang a na hihleh a lutung ah mei am na sekkhawm ahi ding hi.”

²¹Gitlouh zoh in om kenla, hoihna in gilou zou zaw in.