Read Paite Chin ROMTE 13 Bible Online

ROMTE 13 - Paite Chin bible

ROMTE 13

¹Michih a tung ua vaihawmte thuthu in om hen. Pathian thu lou in kuamah vaihawm a om ngalkei ua; vaihawmmite Pathian seh ahi uh.

²Huaiziak in kuapeuh vaihawmmi sel Pathian seh kalh ahi; a selte’n amau tung ah vaihawmna a mu ding uhi.

³Vaihawmte thil hoih hihte ding in kihtakhuai ahi kei uhi; thil hoihlou hihte ding in bel kihtakhuai ahi uhi. Ahihleh vaihawmmi kihtalou a om na ut uhia? Thil hoih hih le uchin phat na loh ding uh;

⁴Amah tuh na hoihna ding ua Pathian nasemmi ahi ngal a. Himahleh kihta un, namsau lah a mawktawi ngalkei a; amah Pathian nasemmi, thil hihkhialmi tung a heh a phulami ahi.

⁵Huaiziak in Pathian hehna kihtakna ziak kia hilou in, na sialehpha theihna ziak un leng vaihawmmi thuthu in na om ding him uh ahi.

⁶Hiaiziakin siah leng na liau zel ve ua leh; huchibang thil ngei hih teitei ding in Pathian nasemmite ahi uhi.

⁷Mi tengteng kiang ah piak ding peuhmah pia un; leiman piakna ding kiang ah leiman pia unla, siah liauna dingpa kiang ah siah liau unla; kihtak dingpa leng kihta unla; zahtak dingpa leng zahtak un.

⁸Ki-ittuahna loungal, kuamah bangmah ba kei un; amau mihinpih itpa’n dan a zuikimta hi.

⁹Hiaite, “Angkawm ken, Tualthat ken, Gu ken, Eng ken” chih leh, thupiak dang omlai himhimte, “Nangmah na ki-it bang in na invengte na it ding hi” chih in a khaikhawm vek hi.

¹⁰Itna in a invengte a hihse ngeikei a; huaiziak in itna zaw dan zuih kimna ahi.

¹¹Huailou in, tu bang hun ahia chih na thei ua, ihmu khanloh a hun mahmahta chih na thei uhi. Tun zaw i gintak tunglai sang in i hotdamna a nai zawta ngal a.

¹²Zan a bei dekdek ta a, khua a vak dekta hi; huaiziak in mial a thilhihte paikhia in vak thuam in i kithuam ding uh.

¹³Sun a om bang in kilawm tak in i om ding uh, zu dawn buai leh zu kham a omlou in, huk leh kingaihhat a omlou in, kilai leh ki haza a omlou in.

¹⁴Toupa Jesu Khrist in kithuam zaw unla, na sa duhgawlna uh pichin ding in bangmah kibawl kei un.