Read Paite Chin ROMTE 14 Bible Online

ROMTE 14 - Paite Chin bible

ROMTE 14

¹Huan ginna hatlou mi, a ngaihdante gense lou in ngai un.

²Mi khat in thil bangkim nethei din a kigingta a, mi hatlou inbel anteh louhing kia a ne hi.

³Bangkim nete’n a neloute simmawh kei henla; a neloute’n leng a nete gense kei heh; Pathian in amah a kipahpih khin ngal a.

⁴Midang sikha gensepa kua na hia? A din leh a puk amah pu ading ahi. Himahleh amah zaw dinsak in a om ding, Toupa’n a dingsak thei hi.

⁵Mi khat in ni khat nidang sang in a sep thupi tuam a, midang in ni tengteng kibang chiat in a sep. Michih amah lungsim ah kitheichian hen aw.

⁶Ni tangpan Toupa pahtawina ding in a tang hi. Huan bangkim nepa’n, Pathian kiang ah kipahthu a gen ziak in, Toupa pahtawina ding in a ne a; a neloupa’n leng Toupa pahtawina ding in a ne kei a, Pathian kiang ah kipahthu a gen hi.

⁷Kuamah eimah a dia hing i hi kei ua, kuamah eimah a dia si leng i hi sam kei hi.

⁸I hin leh Toupa ading in i hing a; i sih in leng Toupa adia si i hi ngal a: huaiziak in i hin in leng, i sih in leng Toupa a i hi uhi.

⁹Khrist sihna leh a hinnawnna pen, mihing leh misi Toupa a hih theihna ding ahi.

¹⁰Himahleh nang bang a chia na unau gensia na hia oi? Ahihkeileh nang bang a chia na unau simmawh na hia oi? Pathian thukhenna tutphah ma ah i vek un i ding ding uhi.

¹¹“Toupa’n mi tengteng ka ma ah a kun ding ua, lei tengteng leng Pathian kiang ah a kipulak ding uh chi in, ka chiam ahi” a chi, chih gelh ahi.

¹²Huchi in, i vek un Pathian kiang ah eimah tanchin i gen chiat ding uhi.

¹³Huaiziak in, kigense nawn keini, kuapeuh in a unau lampi ah kisuihna hiam dalna hiam koihlouh tum zaw hen.

¹⁴Amah mawngmawng ah sianglou bangmah himhim a omkei chih Toupa Jesu ah ka thei mahmah hi; bangkhat sianglou a seh pen bel a seppa ading in a sianglou ahi hi.

¹⁵Na banghiam nek ziak a na unau lungsim a nat leh, itna dan in na gamta kei ahi. A sih sik a Khrist in a sih sakpa na thilnek in hihmang kei hen;

¹⁶Huchi in nou adia hoihna gilou lam a gen in omkei hen.

¹⁷Pathian gam nek leh dawn thu hilou in Kha Siangthou a diktatna, kituahna leh kipahna ahizaw hi.

¹⁸Kuapeuh huai thu ah Khrist nasem Pathian kipahpih leh mihing phat in a om hi.

¹⁹Huchi in kituahna ding leh kihihhat tuahna ding thilte i delh ding uh.

²⁰Na thilnek ziak in Pathian nasep hihse ken. Thil tengteng a siangthou ngei a, himahleh na banghiam nek in mi a hihpuk leh a nepa ading in gilou ahi.

²¹Na unau pukna ding ahihleh, sa neklouhte, uain dawnlouhte, thil bangpeuh hihlouh a hoih ahi.

²²Ginna na neih Pathian ma ah nangmah kia theih in nei mai in. Amah hoih saklam a siamlouh kitangsak lou tuh a hampha hi.

²³Himahleh in ginglelpa’n a nek leh, ginna a a neklouh ziak in, siamlouh a tang hi; bangpeuh ginna lou a hih zaw khelhna ahi.