Read Paite Chin ROMTE 15 Bible Online

ROMTE 15 - Paite Chin bible

ROMTE 15

¹Huchi in ei a hatte’n, eimah kipahna zong lou in, a hatloute hatlouhnate i thuak pih ding uh ahi.

²Eimah invengte hih phattuamna ding in a hoihna ding un kipahsak i tum chiat ding uh.

³Khrist in leng amah kipahna a zong ngal kei a; “Nang hon taite taina ka tung ah a tuta” chih gelh bang in ahizaw.

⁴Laisiangthou a kuhkalna leh khamuanna mu a lametna i neih theihna ding un, nidanglai a gelh peuhmahte eite hon hilhna ding a gelh ahi uhi.

⁵Tuin kuhkalna leh khamuanna Pathian in, Khrist Jesu ah noute lungsim leh ngaihtuahna munkhat pu in hon omsak hen:

⁶Huchi a, lungsim munkhat leh kituaktak a Toupa Jesu Khrist Pa, leh Pathian na pahtawi theihna ding uh ahi.

⁷Huaiziak in Khrist in Pathian thupina ding a noute a hon kipahpih mah bang in, khat leh khat kipahpihtuah chiat un.

⁸Tuin, pipute kiang a thuchiamte hihkipna ding in Khrist Pathian thutakdan theihsakna ding in zeksumte nasempa a hong hita chih na kiang uah ka gen hi:

⁹A hehpihna ziak a Jentelte’n Pathian a pahtawina ding un, “Huaiziak in Jentelte lak ah k’on phat dia, na min pahtawina ding in la ka sa ding,” chih gelh bang in.

¹⁰“Huan nou Jentel tengtengte aw, a mite toh kipak un” a chi nawn hi.

¹¹“Nou Jentel tengtengte aw, Toupa phat un, mi tengteng in amah phat uhen” a chi nawn hi.

¹²Isai in: “Jesse zungzam a hong khang ding a, Jentelte tung a vaihawm dingpa a hong dingkhe ding hi; amah ah Jentelte’n a lametna uh a koih ding uhi” a chilai hi.

¹³Kha Siangthou thilhihtheihna ziak a lametna na hauh theihna ding un, lametna Pathian, na gintak ziak un, kipahna leh kituahna chiteng in honhih dim hen.

¹⁴Huan ka unaute aw, nou tungthu zaw noumau mah hoihna in na dim ua, na ki hanthawn tuahthei uh chih keimahtakin leng diktak in ka thei hi.

¹⁵Himahleh Pathian in a honpiak hehpihna ziak in nou hon theihpih ding in koi kalkal hiam ah hangsantak in ka gelh hi,

¹⁶Jentelte kiang a Khrist Jesu nasempa a ka om theihna ding in, Jentelte Kha Siangthou a hih siangthou a hih ua, pomtak a hih theihna ding un Pathian Tanchinhoih lam ah siampu na ka sem ahi.

¹⁷Huchi in Pathian na ka sep lamthu ah Khrist Jesu ah kisaktheihna ding ka nei ahi.

¹⁸Khrist in Jentelte thumangsak ding a ka thugen leh nasepnate zang a a sepkhiakte loungal bangmah ka gen ngam ngal kei hi.

¹⁹Chiamtehnate leh thillamdangte, thilhihtheihna ah, Kha Siangthou thilhihtheihna in Jerusalem khua leh a kim gam a kipan in, Illirikum gam pha in, Khrist Tanchinhoih gamchih ah ka hilh kimta; keimah hon zang a a thilhih tuh huchitel ahi.

²⁰Ahi, midang suangphum tung a lem ka hihlouhna ding in, Tanchinhoih Khrist min lohkhitna mun a genlou in.

²¹“A tanchin gen ngeilouhnate’n a mu ding ua, za ngei nailoute’n a za ding uh” chih gelh bang in, gen ka tum zaw ahi.

²²Huaiziak in ahi, na kiang ua hong ka kikhel sak naknak.

²³Tuin bel hiai gam kim ah sepna mun himhim ka neita kei a, kum tampi na kiang ua hong ut in leng ka omta hi;

²⁴Spain gam a ka hoh chiang in ka pai kawm a nou honmuh ka kilamen ngal a, noumau toh kithuah khawm phot in, maban ka paina ding ah noute’n n’on vakhak suk uh leng ka lamen ahi.

²⁵Tuin bel, misiangthoute nasem ding in Jerusalem khua ah ka hoh tadih ding hi.

²⁶Masidonia leh Akhaia gam a mite’n kipaktak in Jerusalem khua a misiangthoute lak a gentheite adin thilpiakte a pe chiat uhi.

²⁷Hiai thilpiak in amau nakpi’n kipaksak hi; amau ding in leng bat ahi him hi; Jentelte’n Judate khalam Vualzawlna a kikoppih ua leh, salam thil a amaute taksap awng a huksak sam uh a kilawm him ahi.

²⁸Huaiziak in huai ka hih a, gah leng amaute diktak a ka muhsak nung in, noute hontawn in, Spain gam ah ka pai zel ding hi.

²⁹Huan na kiang ua ka hong chiang in, Khrist tanchinhoih vualzawlna kim pu in ka hongding chih ka thei hi.

³⁰Unaute aw, Pathian kiang a n’on thumsak na uah, hon thumpih teitei ding in Toupa Jesu Khrist leh Kha Siangthou itna in nget petmah in k’on ngen ahi;

³¹Juda gam a gingloute lak a ka bit theihna ding leh, Jerusalem khua adia huhna ka tawi misiangthoute kipahna lamtak a hihtheihna ding in.

³²Pathian hoihsak bang a nuamtak a na kiang ua ka hong a, i halh khawm vek theihna ding in.

³³Lemna Pathian na vek ua kiang ah om hen. Amen.