Read Paite Chin ROMTE 16 Bible Online

ROMTE 16 - Paite Chin bible

ROMTE 16

¹I sanggamnu, Phoebi, Kenkriai khua a saptuamte nasem,

²Toupa min a misiangthoute bang a nana kipahpihna ding uleh, na huh uh a kiphatmohna peuh a nana huh ding un hon kimeltheihsak ka ut ahi. Amahmah in leng mi tampi a na huh a, kei ngei leng a hon huhzel hi.

³Khrist Jesu a hon huhte Priscilla leh Akuila chibai honbuk sak un.

⁴Amau ka hinna humbitna ding in amau ngawngtan a ngap ua: amau tung kia ah kipahthu ka gen kei a, Jentel saptuam tengteng tung ah leng ka gen sam hi.

⁵A inn ua saptuam kikhawmte leng chibai honbuk sak un. Ka deihtak, Epanita, Asia gam a Khrist gingta masapen, chibai honbuk sak un aw.

⁶Mari nou dia semgim, chibai honbuk sak un aw.

⁷Ka chipih leh ka hentakpih, Andronika leh Junia, chibai honbuk sak un; amau sawltakte lak a minthang tak ahi ua, kei sang a Khrist a om masa zaw ahi uh.

⁸Amplias, Toupa a ka deihtak, chibai honbuk sak un aw.

⁹Khrist a i naseppih uh Urbane leh ka deihtak Stakhis chibai hon buksak un.

¹⁰Khrist a mitak, Apelle, chibai honbuk sak un. Aristobula inkuanpihte lak a mite chibai honbuk sak un.

¹¹Ka chipih, Herodion, chibai honbuk sak un. Narkissa inkuanpihte lak a mi, Toupa a om, chibai honbuk sak un.

¹²Triphaina leh Triphosa Toupa a semgimte, chibai hon buksak un aw. Deihtak Persi, Toupa a semgim mahmah sa chibai hon na buk sak un.

¹³Toupa tel Rufas leh a nu, kei nu sam leng, chibai hon na buk sak un.

¹⁴Asinkaraita, Phligon, Hermas, Patroba, Hermes te a kiang ua unau omte toh, chibai hon na buksak un aw.

¹⁵Philologas leh Julia, Nerias leh sanggamnu, Olimpa leh, a kiang ua Mi Siangthou om tengteng, chibai hon na buksak un.

¹⁶Tawp siangthou in chibai kibuk un. Khrist saptuam pawl tengteng in chibai honbuk chiat uhi.

¹⁷Huan unaute aw, thuhilhna thu noumau hilhlouh lam a kikhenna leh pukna omsakte apan kiveng ding leh kiheisan ding in k’on ngen ahi.

¹⁸Huchibang mite’n i Toupa Khrist na a sem kei ua, amau gilpi nna a sem zaw uhi; a kamphat uleh a kamsiam un mi pilloute lungtang a zekhem nak uhi.

¹⁹Na omdan uh mi tengteng lak ah a thangkheta ngal a. Huaiziak in noumau tungthu ah ka kipak hi; himahleh, hoihlam a na pil ua, gilou lam a na pillouh uh ka deih ahi.

²⁰Huan lemna Pathian in na khepek nuai uah Setan a hon sikdensak pah ding hi. I Toupa Jesu Khrist hehpihna na kiang uah om hen.

²¹Ka naseppih Timothi leh ka chipih Lusias leh Jason, Sosipaterte’n chibai a honbuk uhi.

²²Kei Tertia, hiai laigelhtu in, Toupa min in chibai ka honbuk hi.

²³Ka tunnapa Gaias leh saptuam tengteng in chibai a honbuk uhi. Huai sum kempa Erata leh unaupa Kuartas in chibai a honbuk uhi.

²⁴I Toupa Jesu Khrist hehpihna na vek ua kiang ah om hen. Amen.

²⁵Tuin Amah, ka Tanchinhoih gen bang leh thuguk kilakna bangbang a Jesu Khrist ka tangkoupih bang a noute hon hihhattheipa, huai thuguk tanglai sawtpi mahmah sung selguk a na om mahleh,

²⁶tun bel ginna thumanna piangsak ding in zawlnei laibute zang a nam tengteng kiang a theihsak leh tangtawn Pathian thupiak bang in taklat in a hong omta hi.

²⁷Pilna Pathian kiang kia ah, Jesu Khrist tawn in thupina tangtawn dong in om hen! Amen.