Read Paite Chin ROMTE 2 Bible Online

ROMTE 2 - Paite Chin bible

ROMTE 2

¹Huaiziak in mihing aw, mi selhat kuapeuh himahlechin paulam himhim na neikei hi. Midang na selna mah ah nangmah leh nangmah siamlouh kitangsak na hi. Nang selhat in leng huchibang thilte na hih sam ngal hi.

²“Huchibang thilhih nakte tung ah Pathian vaihawmna diktak in a tung” chih i thei uhi.

³Mihing aw, huchibang thilhih nakte gensia, nang leng huchibang na hihsam ngal nak a, Pathian vaihawmna pelh na kigingta ahia?

⁴Ahihkeileh Pathian hoihna kisikna a nang hon pidinga om ahi chih theilou in, a hoihna, a thuaktheihna leh, a dohtheihna hauhnate na ngaineu ahia?

⁵Himahleh na lungtang khauh leh kisik utlouhnate ziak in, na tung ah thangpaihna na kholkhawmte Pathian vaihawmna diktat hong kilatna, thangpaihna ni chiang a ding in kholkhawm ahizaw hi.

⁶Pathian in michih a thilhih bangzel un a hawmsak ding;

⁷Thil hoih hih teitei a, thupina leh pahtawina leh manthat theihlouhna zong mite kiang ah tangtawn hinna a pe ding hi.

⁸Himahleh genhakte, thutak zuilou a, gitlouhna zui zawte tung ah, hehna leh thangpaihna, haksatna leh lungkhamna thupitak a om dia;

⁹Mihing thil hihkhial tengteng kha tung ah a om ding, Judami kha tung ah a om masa dia, huan, Grik mi kha tung ah a om nawn ding hi.

¹⁰Himahleh, thil hoih hih peuhmahte kiang ah thupina, pahtawina, khamuanna piak ahi ding, Judami kiang ah piak ahi masa dia, huan, Grik mi kiang ah ahi nawn ding hi.

¹¹Pathian in mi deihsaktuam a nei ngal kei hi.

¹²Kuapeuh dan neilou a thil hihkhial, dan lou in a mangthang ding hi; kuapeuh dan nei a thil hihkhial dan a vaihawm in a om ding.

¹³Dan zami phette Pathian mitmuh in midik ahi kei ua; dan zuite midik ahizaw ding uhi.

¹⁴Dan neilou Jentelte’n amau pianpih a dan thilte a hih un, amau dan neikei mahle uh, amau leh amau dan in a kinei tawm uhi.

¹⁵A lungtang uah dan thilhih gelh ahi chih langsak ding in a sialehpha theihna un a theihpih hi; a lungsimte un leng theihpih ahihman in a ngaihtuahna un siamlouh a tangsak hiam siam a tangsak zel hi;

¹⁶Ka Tanchinhoih gen bang in, Pathian vaihawmni chiang in mihing thugukte, Jesu Khrist tawn in a ngaihtuah ding hi.

¹⁷Himahleh nang Juda kichi na hi a, dan a kinga in Pathian na suang hi.

¹⁸A deihlam na thei a, thil hoihzawte hoih na sa a, dan a hilh in na om hi,

¹⁹Nangmah mittawte pipa, miallak a omte vakna hi in na kigingta hi.

²⁰Dan ah pilna leh thutak omdan na theih ziak in, mipilloute hilhpilpa, naungekte hilhpa in na kigingta hi;

²¹Huchibang na hih ngal leh nang midangte hilhpa, nangmah na kihilh ka hia? Nang mi guta lou dia hilhpa, nang na gu nak maw?

²²Nang angkawm lou dia hilhpa, nang ang na kawm maw? Nang milim hawpa, nang milim biakin a thilte na gu nak maw?

²³Nang dan suangpa, nang dan a na tatlek ziak in Pathian na hihminse zel ahi maw?

²⁴“Pathian min noumau ziak in Jentelte lak ah gensiat in a omta hi” chi a kigelh bang in.

²⁵Dan zuipa na hihleh zeksum a phatuam ngial hi; dan a talekpa na hih lebel, na zeksum sum louh bang phet a hong hita hi.

²⁶Huaiziak in, zeksum lou mi in danthusehte a zuih leh a zeksum louh sum bang a sim ahi kei dia hia?

²⁷Huan amau sa a zeksum louh in dan a zuih kim uleh, nang danthu gelh leh zeksum nei ngal a dan a talekpa a hon mawhpaih kei ding ua hia?

²⁸A lang lel a Judami hi zaw Judami tak ahi kei hi; a lang a sa lel a zeksum zaw zeksum tak leng ahi sam kei hi.

²⁹Himahleh a lang lel hilou a, Judami hi, Judami tak ahi; huan zeksum tak, lungsim a sum ahi, laithu phet ah hilou in, kha ah ahi; huai mi’n mihing phat a loh kei a, Pathian phat a loh zaw ahi.