Read Paite Chin ROMTE 3 Bible Online

ROMTE 3 - Paite Chin bible

ROMTE 3

¹Ahihleh Juda mi’n hamphat tuamna bang ahia a neih tuan? Zeksum leng bang ahia a phattuamna?

²Koi lam peuh ah a phatuam hi; Pathian thute a kiang ua kep sak a a om ziak ahi pen.

³Mi khenkhatte’n ginna neikei mahle uh, bang ahi tuan a eita? A gintak louhna un Pathian muanhuaina bangmahlou in a bawl tuan ahia?

⁴Bawl tuan lou hial; Pathian mi diktak hita hen, michih zuauthei hi uhen: “Nang na thugen in siam na tanthei a, vaihawma na om in leng na zoh theihna ding in,” chih gelh bang in.

⁵Himahleh i diktatlouhna in Pathian diktatna a hihlat hoih sem leh, bang i gen dia? Pathian in mi a gawt in, mi diktatlou ahi hia? Mihing dan bang in ka gen ahi.

⁶Hilou hial: huchibang hihleh, Pathian in khovel vai bangchi’n a hawm dia?

⁷Himahleh ka zuauthu gen ziak a Pathian thu dik dan amah hihthupi khop hial a a latsem ngal leh, bang a chia keileng mikhial bang a siamlouh tansak a omlai ka hia?

⁸Bang a chia, hon hek ua, mi khenkhat in genlouhpi hon gensak bang un. “Thil hoih hongtun theihna ding in thil gilou i hih ding uh” chi a i gen zawk louh? Huchibang ching mite’n siamlouh a tan uh a dik him ahi.

⁹Ahihleh amau sang in i hoihzaw khol ua hia? Hoihzaw lou hial; Judate leh Grikte khelhna sikha a omvek in tuma in leng i ngohta vele;

¹⁰“Kuamah mi diktat himhim a omkei uh, khat leng a omkei uh;

¹¹Kuamah theisiam himhim a omkei uh, kuamah Pathian zong himhim a omkei uh.

¹²A hilou lam ah a pialkhinta ua, bangmah phatuamlou in a om khinta ua, kuamah thil hoih hih himhim a omkei uh, khat leng a omkei uh.”

¹³“A gawl uh han kihong ahi a; a lei un zekhemna thu a gen uhi.” “A kam sung uah gul gu a om hi.”

¹⁴“A kam uh hamse lohna leh thukha in a dim hi.”

¹⁵“A khe uh sisan suah ding in a kin suan uhi;

¹⁶A lampi uah manthatna leh gimthuakna a om a;

¹⁷Khamuanna lampi a theikei ua,

¹⁸A mit uah Pathian launa a omkei,” chih gelh bang in.

¹⁹Dan in bangpeuh a gen, danthuthu a omte kiang ah a gen ahi chih i thei uhi; kam chiteng a hum theihna ding in leh khovel a mi tengteng Pathian vaihawm a a om theihna ding un.

²⁰Huchi in “Dan thilhihte ziak in mi kuamah a mitmuh in siamtang in a omkei ding uhi;” dan tawn in khelhna theihna a hongom hi.

²¹Himahleh tun bel dan leh zawlneite na theihsak Pathian dikna dan tellou a hihlat in a omta hi;

²²Huai tuh Jesu Khrist gintak ziak a, a gingtate tengteng adia Pathian diktatna ahi. Lamdanna himhim a omkei:

²³Mi tengteng in thil a hihkhelh ziak ua Pathian thupina a tan zohlouh nung un,

²⁴Khrist Jesu a om tatna ziak in, hehpihna a a thawna siamtansak in a om uhi.

²⁵Amah tuh a sisan ziak a thuphatawina hi in, ginna a muh ding in Pathian in a luikheta hi. Hiai tuh Pathian dikna latsakna ding ahi, aman a dohtheihna ziak a nidanglai khelhnate a Paikan tak ziak in;

²⁶Huan amah ngei a dik a, chih leh Jesu a ginna neimi siam a tangsak chih chetna ding in.

²⁷Na kiotsakna uh koi a om ahia leh? Pawsiah in a omta hi. Bang dan in ahia leh? Thilhihna dan in hia? Hilou hial, ginna dan in ahizaw hi.

²⁸Huchi in dan thilhihte ziak hilou in, ginna in min siamtansak in a om chi in i sep uhi.

²⁹Pathian, Judate Pathian kia hia? Jentelte Pathian leng ahi sam ka hia? Hi e, Jentelte Pathian leng ahi.

³⁰Pathian khat kia a hih ziak in; aman zeksumte a ginna ziak un, zeksumlouhte a ginna ziak un siam a tangsak ding hi.

³¹Huchi ahihleh dan bangmahlou in i bawl ua hia? Bawllou hial. Dan tuh i hihkip zaw uhi.