Read Paite Chin ROMTE 4 Bible Online

ROMTE 4 - Paite Chin bible

ROMTE 4

¹Ahihleh Abraham, sa dan a i pu un, bang ahia a muh i gen ding?

²Abraham in thilhih ziak a siam a tan ngalleh suan ding a nei ahi, Pathian ma ah zaw hi hetlou in.

³Laisiangthou in bang a gen a? Abraham in Pathian a gingta a, huan huai ginna tuh a dikna a seh ahi chi in a gen ahi.

⁴Huan nasemmi loh tuh hehpihna a seh ahi kei a, bat a seh ahizaw hi.

⁵Himahleh nasem lou a, Pathian limsaklou siamtangsakpa gingta zaw mi ginna amah diktatna a seh ahi.

⁶Mi a thilhih ngaihtuah lou a, Pathian in diktat a a seh, vual a zawlsak thu David in leng,

⁷“A tatleknate ngaihdam a om a, a khelhnate uh khuh a omte, a hampha uhi,

⁸Toupa’n khelhna nei a a sehlouhte a hampha uhi,” chi a a gen bang in.

⁹Ahihleh huai vualzawlna zeksumte kia tung ah hia a om, zeksumloute tung ah leng? Abraham ginna a diktatna a seh ahi, i chi ngal ua.

¹⁰Huai bangchi seh ahia? A zeksum nung in hia, a zeksum ma in? A zeksum nung in ahi kei a, a zeksum ma in ahizaw hi.

¹¹Huchi in a zeksum ma in ginna ziak a diktatna a mu chih chiamtehna ding in zeksum thu a mu hi. Huchi a amah tuh zeksum lou, himahleh a gingtate diktatna sehsak a omte tengteng pa a hih theihna ding in.

¹²Huchi mah bang a zeksumte kia hilou a, zeksum hilou a, i pa uh Abraham in zek a sum ma a ginna a neih bang ginna neite pa a hihtheihna ding ahi.

¹³Abraham leh a suante kiang a khovel gouluah ding ahi ding uh chih thuchiam zaw dan a kinga ahi kei a, ginna ziak a diktatna a kinga ahizaw hi.

¹⁴Dan neimite gouluahte hi ding hile ubel, ginna bangmah in a phatuam kei a, thuchiam leng thuchiam ahita kei hi.

¹⁵Dan in thangpaihna a tun nak ngal a; himahleh dan omlouhna ah tatlekna leng a omkei hi.

¹⁶Huaiziak in thuchiam hehpihna a piak a hihtheihna ding in ginna a kinga ahi, a suante tengteng in thuchiam pellou a a luah theihna ding un. Dan neimite kia’n a luah kei ding ua, Abraham neih bang ginna neite’n leng a luahsam ding uhi; amah i vek ua pa ahi.

¹⁷“Nam tampite pa in k’on bawlta” chi a gelh bang in, misite hihhing pa leh thil omloute om bang a genpa a gin Pathian mitmuh ah eite pa a bawl in a omzaw hi.

¹⁸Lamet tuak a a omlouh in leng aman zaw lamen tak in a gingta a, “Chi tampite pa a hong hih theihna ding in: Tua bang in na suante a honghi ding uh,” chi a hilh a a om bang in.

¹⁹Huan ginna kiplou tuanlou in, a pumpi sisa bang a om tuh a ngaihtuah a, amah kum za vel mi ahi ngal a, Sarah ching leng a ngaihtuah sam hi.

²⁰Pathian thuchiam ginglel in ginna tasam in a omkei a, Pathian a pahtawi hi.

²¹A thuchiam a lohching sakthei chih a gingtaa, a ginna a hongkip zawta hi.

²²Huaiziak in a ginna a diktatna a seh ahita hi.

²³Huchi in a ginna a diktatna a seh ahi chih amah ziak kia a gelh ahi kei a, eite ziak in leng ahi.

²⁴Jesu i Toupa misi lak a kipan a kaithoupa gingtate i hi. I ginna tuh diktatna a seh ahi ding hi.

²⁵Jesu i tatlekna ziak a matsaka om, siam i tanna ding a kaihthoh a om ahi.