Read Paite Chin ROMTE 5 Bible Online

ROMTE 5 - Paite Chin bible

ROMTE 5

¹Huaiziak in, ginna ziak a siamtansak a om in i Toupa Jesu Khrist pansan in Pathian toh kilem in i om uhi.

²Amah tawn mah in hiai hehpihna ah i lut ua; huai ading in Pathian thupina i tan ding lametna ah kipak in i om uhi.

³Huai kia leng hilou in, i gimthuakna ah leng kipak in i om uh, gimthuakna in kuhkalna a tun hi.

⁴Kuhkalna in theihtelna a tun a, theihtelna in lametna a tun chih thei in.

⁵Huan lametna in a hon zahlaksak kei a, huai Kha Siangthou i kiang ua honpiak tawn a Pathian itna i lungtang ua sun a a omtak ziak in.

⁶I hat nailouh lai in a huntak in Khrist Pathian limsakloute sih sik in a hong sita hi.

⁷Mi dik sik a sih, mi a ut ngelkei hial ding ua, mi hoih sik in bel mi kuahiam bek in sih a ngap khamawh kei ding hi.

⁸Himahleh Pathian in mikhialte i hih lai a Khrist i sik a a sihna ah a hon itna a langsakta hi.

⁹Huchi in a sisan a siamtansak a i omkhit nung in, amah ziak in Pathian hehna , a kipan hotdam in i om ngei ding uhi.

¹⁰Melma i hihlai a bawn a Tapa sihna ziak a Pathian toh na kitam khin i hih ngal un tuh, kitam a i omkhit nung un a hinna ziak in hotdam in i omsem ding uhi.

¹¹Huchi kia leng ahi kei a, kitamna tua hon musakpa i Toupa Jesu Khrist ziak in Pathian ah leng i kipak ahi.

¹²Huchi in mi khat ziak in khelhna khovel ah a lut a, khelhna ziak in sihna a lut a, mi tengteng a khelh ziak un sihna in mi tengteng a zelsuak hi.

¹³Dan om ma in khovel ah khelhna a om khin ngal a; dan a omlouh lai in khelhna tuh khelhna a sim ahi kei hi.

¹⁴Himahleh Adam om a kipan Mosi om pha in Adam tatlekna bang a thil hihkhialloute tung ah leng sihna in vai a hawm zel hi. Adam tuh hongpai ding tehpihna ahi.

¹⁵Himahleh thilthawnpiak zaw tatlekna toh a kibang kei. Mi khat tatlekna ziak a mi tampi a sih ua leh Pathian hehpihna leh mi khat Jesu Khrist hehpihna thawnpiak a kiching zawsem a mi tampi tung a vuh in a om hi

¹⁶Huan thilthawnpiak mi khat tatlekna gah toh leng a kibang sam kei hi. Mi khat tatlekna tung a vaihawmna in siamlouh tansakna a tun a, mi tampi tatlekna tung a thilthawnpiak in bel siamtansakna a tun hi.

¹⁷Mi khat tatlekna ziak a sihna in huai mi khat mah pansan a vai a hawm leh, hehpihna kiningching mahmah leh diktatna thawnpiak tangte’n mi khat Jesu Khrist pansan in hinna a vai a hawm zawsem ding uhi.

¹⁸Huan mi khat tatlekna in mi tengteng ading a siamlouh tansakna a tut mah bang in, mi khat diktatna thilhih in mi tengteng ading in suahtakna leh hinna a hontun hi.

¹⁹Bangziak hiam i chih leh, mi khat thumanlouhna ziak a mi tampi mikhial a bawl a hih bang un, mi khat thumanna ziak in mi tampi mi diktat a bawl ahi ding uhi.

²⁰Khelhna latsak semna ding in Dan a hongom behlap a; himahleh khelhna a khanna peuh ah hehpihna a khang sem,

²¹Huchi a khelhna in sihna a vai a hawm mah bang, hehpihna in leng i Toupa Jesu Khrist pansan a diktatna ziak a tangtawn hinna dong a vai a hawm theihna ding in.