Read Paite Chin ROMTE 6 Bible Online

ROMTE 6 - Paite Chin bible

ROMTE 6

¹Bang i genta dia leh? Hehpihna a khansem theihna ding in khelhna ah i om nilouh ding ua hia?

²Om nilouh lou hial ding. Eite khelhna lam a sisa, khelhna ah bangchi’n i hing thei lailai dia?

³Eite Khrist Jesu a baptist lut a om tengteng a sihna ah baptist lut in i om chih na theikei ua hia?

⁴Huaiziak in a sihna a baptist lut a om in amah toh vuikhawm in i om uhi, huchi a Pa thupina in misi lak a kipan a Khrist a kaihthohtak bang a eite leng hinna thak a i khosak theihna ding in.

⁵A sihna kibatpih a amah toh i kizopkhit ngal leh, a thohnawnna kibatpih in leng i kizom sam ding hi.

⁶I mihing lui a kiang ah kilhden in a om samta chih i thei; huchi a khelhna pumpi hih manthat a a om theihna ding leh tua kipan a khelhna sikha a i om louhna ding in.

⁷Kuapeuh sisa khelhna lak ah a suakta ta hi.

⁸Huan Khrist toh i sihsam leh, a kiang ah i hingsam ding chih gingta uhi;

⁹Khrist misi lak a kipan kaihthoh in a omta, a si nawn kei ding chih i thei ngal uhi; sihna in amah tung ah thu a neita kei hi.

¹⁰A sihna khelhna lam thu ah tangtawn adin khatvei kia a si ahi, a hinna bel Pathian lam thu ah a hing ahi.

¹¹Huchi mah bang in, nou leng khelhna lam thu ah sisa in kisep unla, Pathian lam thu ah bel Khrist Jesu ah hing in kisep un.

¹²Huaiziak in na pumpi uh duhgawlna thumang ding in na pumpi si thei uah khelhna vaihawmsak kei un.

¹³Na pumpi hiangte uh leng diktatlouhna vanzat ding in khelhna kiang ah pe phal sam kei un; himahleh misi lak a kipan hing nawn bang in Pathian kiang ah kipia unla, na pumpi hiangte uh leng diktatna vanzat ding in Pathian kiang ah pe phal zaw un.

¹⁴Noute danthunuai om hilou a, hehpihna a nuai a om na hih ziak un khelhna in na tung uah thu a nei nawn kei ding hi.

¹⁵Bangchi’n ahi dia leh? Dan thunuai a om i hi kei ua, hehpihna nuai a om i hih zawk ziak in i khial ding uh ahi diam? Hilou hial ding.

¹⁶Kua kiang peuh ah leng a thumang ding a a sikha dia na kipiak un sihna khop a khelhna sikha hiam, diktatna khop a thumang sikha hiam, a thu na man uh sikha na hi uh chih na theikei ua hia?

¹⁷Himahleh Pathian kiang ah kipahthu om hen; noute khelhna sikha na hitamah le uchin, thuginpi a na kipiakna uh na lungtang taktak un na zuita uhi.

¹⁸Khelhna lak a kipan suahtak sak in na omta ua, diktatna sikhate na hong hita uhi.

¹⁹Na sa uh hatlouh ziak in mihing dan in thu ka gen hi; na sa hiangte uh nitna leh tatlekna ding a tatlekna kiang a sikha dia na piak phal bang un, tuin na sa hiangte uh siangthouna ding in diktatna kiang ah sikha ding in pe zaw un.

²⁰Khelhna sikhate na hihlai un diktatna lak ah na siang uhi.

²¹Tua na thil zahpih sate uah, huailai in gah bang ahia na muhzel uh? Huai thilte tawpna zaw sihna ahi.

²²Tun ah bel khelhna lak a hihsiang a om in, Pathian sikhate na hong hih un, siangthouna mu khop in na gah uh na nei uh a kei hiam, huai tawpna tangtawn a hinna toh.

²³Khelhna man sihna ahi ngal a, Pathian thilthawnpiak bel i Toupa Khrist Jesu ziak in tangtawn a hinna ahi.