Read Paite Chin ROMTE 7 Bible Online

ROMTE 7 - Paite Chin bible

ROMTE 7

¹Ahihleh unaute aw, dan in mi a damsung teng a tung ah vai a hawm nak chih na theikei ua hia? Dan thei mite kiang ah ka gen ahi.

²Numei, pasal nei a pasal a damsung teng a pasal dan a hen in a om a; himahleh a sih in bel pasal lam ah dan a kipan khah in a om ahi.

³Huchi in a pasal damsung a midang a kitenpih leh, Angkawm, chih ahi ding hi; a pasal a sih in bel huai dan a kipan khah in a om a, huchi in midang nei leh leng angkawm ahi kei hi.

⁴Ka unaute aw, Pathian lam a i gah theihna ding in midang, misi lak a kipan kaihthoh ngeingei na kitenpih theihna ding un, Khrist pumpi pansan in danlam ah sihsakin na omta uhi.

⁵Sa a i omlai un dan ziak a khelhna utna hong suakte’n, i sahiangte ah sihna khopa gah ding in a semnak hi.

⁶Tuin bel hon lenpa lak ah sikhinin, dan a kipan khah in i omta, laigelh lui bang hilou a, Kha a hinna thaka na i sep theihna ding in.

⁷Bang i genta dia leh? Dan khelhna hia? Hilou hial. Himahleh, dan tawn a theih hi kei leh khelhna theilou ding hi’ng a; dan in, “Eng ken” chi kei leh, eng chih theilou ding hi’ng a.

⁸Himahleh khelhna in, thupiak ziak in, lemtan lai mu in enna chiteng ka sung ah a omsak hi.

⁹Dan lou in khelhna si ahi. Tuma lam in kei danlou in ka hing a; himahleh thupiak a hongom tak in khelhna a honghalh a, kei ka sita hi.

¹⁰Huan hinna thuchiam nei thupiak kei adin sihna a honghi chih ka na theita hi.

¹¹Khelhna in thupiak ziak in, lemtan lai mu in honkhem a, thupiak zang in a hon hihlumta hi.

¹²Huchi in dan a siangthou hi, thupiak leng a siangthou a, a dik a, a hoih ahi.

¹³Ahihleh thil hoih kei adin sihna a honghi ahia? Hilou hial. Khelhna kei din sihna a honghi zaw ta ahi. Huchi in khelhna, khelhna ahi chih a lat theihna ding in thil hoih zang in a honthat ahi; thupiak ziak a khelhna, khelhna thupitak a honghih theihna ding in.

¹⁴Dan khalam thil ahi chih i thei ngal ua, kei bel sami, khelhna a khotsa ka hi.

¹⁵Thil ka hih pen, a dan ka theikei; ka thilhih zel pen, ka thilhih utlam ahi ngal kei a, ka thil huatlam tak ka hih zawnak hi.

¹⁶Ka hih utlouh lam ka hih ngal in, dan a hoih chih pompih ka hi ta hi.

¹⁷Huaichiang in, ka thilhihpen keimah hih ahita kei a, khelhna keimah a om hih ahizaw hi.

¹⁸Keimah ah, huai bel ka sa ah, thil hoih himhim a teng kei chih ka thei: thil hoih hih utna keimah ah a om na a, thil hoih ka hihthei kei.

¹⁹Hoihna hih ka ut pen ka hih kei a, khelhna hih ka utlouhpen, ka hih zawnak hi.

²⁰Ka utlouh lam pen ka hih ngal chiang in, a hihpa kei ka hita kei a, khelhna keimah a om pen ahizaw hi.

²¹Huchi in hiai dan k’on theita hi; thil hoih hih ka ut lai in gitlouhna ka kiang ah a hongom nak ahi.

²²Ka lungsim taktak in Pathian dan tung ah ka kipak ngal nak hi;

²³Himahleh ka sahiangte ah dan tuam a om chih ka thei, huai in ka lungsim dan a dou a, ka sahiangte a khelhna dan om kiang ah sal in a honpi hi.

²⁴Mi genthei hina lawmlawm ing e! Hiai sihna pumpi apan kuan ahia hon suakta sak ding?

²⁵Jesu Khrist i Toupa ziak in Pathian kiang ah kipahthu ka gen ahi. Huchi in keimah takinzaw ka lungsim in Pathian dan ka sem a, ka sa in gitlouhna dan a sem hi.