Read Paite Chin ROMTE 8 Bible Online

ROMTE 8 - Paite Chin bible

ROMTE 8

¹Huaiziak in, tun ah zaw Khrist Jesu a omte ading in siamlouh tansakna himhim a omta kei hi.

²Khrist Jesu a Hinna Kha dan in khelhna leh sihna dan a kipan hon suaktasak ta ngal a.

³Sa ziak a dan a hatlouh a, ahihtheih vuallouh, Pathian in, amah Tapa ngei, khelhna sa gilou bang pu in, khelhna thoihna dia honsawl in, sa a khelhna om tuh siamlouh a tangsak ta hi,

⁴Sa dan zuilou a Kha dan zui zawte eimah a dan in a ngiat diktatna tangtun a a om theih na ding in.

⁵Sa dan a omte’n sa lam thilte a lunggulh nak uh; Kha dan a omte’n bel Khalam thilte a lunggulh nak uhi.

⁶Sa thilte deih zaw sihna ahi ngal a, Kha thil deih bel hinna leh khamuanna ahi;

⁷Sa deihdan zaw Pathian douna a hih ziak in. Huai Pathian dan in a om ngalkei a, om leng a om theikei him ahi.

⁸Huchi in, sa a omte’n Pathian a kipaksak theikei uhi.

⁹Himahleh Pathian Kha noumau a a omtaktak leh, sa a om na hi kei ua, Kha a om na hi zaw uhi. Himahleh, kuapeuh Khrist Kha neilou zaw amah a ahi kei.

¹⁰Khrist Kha noumau a a om ngal leh, khelhna ziak in pumpi a si ahi; kha tuh dikna ziak in a hing ahi.

¹¹Himahleh misi lak a kipan Jesu kaithou nawnpa Kha noumau a a om leh, misi lak a kipan Khrist Jesu kaithou nawn pa’n, noumau a om a Kha pansan in na pumpi sitheite uh a hihhing sam ding hi.

¹²Huaiziak in unaute aw, bat i nei; sa dan a om ding in sa lak ah bel ahi kei;

¹³Sa dan a na om uleh, na si mahmah ding uhi; himahleh pumpi thilhihte Kha a na hihlup zel uleh na hing ding uhi.

¹⁴Pathian Kha pi a om peuhmahte zaw, Pathian tate ahi ngal uhi.

¹⁵Lau a omnawn ding in sikha hihna kha na tang uh ahi ngal kei a; ta hihna kha na tang uh ahizaw. “Abba, Pa!” chi a i kikou chiang in,

¹⁶Kha mahmah in, eimah kha toh, Pathian tate i hi chih hon theisak hi;

¹⁷Huan tate i hihleh gouluahpihte i hi uhi; Pathian gouluahte, Khrist luahpihte i hi ua; a kiang a pahtawi a i omsam theihna ding a amah i thuakpih taktak leh.

¹⁸Tulai a thuaknate denchiang a i tung a thupina hihlat a om ding toh tehpih tham in ka sep kei hi.

¹⁹Thilsiam tengteng in, lamen mahmah in, Pathian tate honglatna a ngaklah mahmah uhi.

²⁰Thilsiam tengtengte thil thulimlou thuthu a omsak in a omta uh; a ut ua om ahi kei ua, lametna a a omsakpa ziak ahizaw hi;

²¹Thilsiam tengteng leng siatna sikha a kipan suahtaksak in a om ding ua, Pathian tate noplenna thupi ah a lut ding uhi.

²²Thilsiam tengteng tutan in thum leh nauvei na thuak in a om uh chih i thei ngal uhi.

²³Thilsiamte kia hilou in, eite ngei, Kha gahmasa tengte leng, ta hihna kilatna, i pumpi tatna ngak in i lungsim in i mau sam ngal uhi.

²⁴Hiai lametna a hotdam i hi ngal ua. Himahleh muhtheih gige lametna zaw lametna ahi kei. Kuan a muhtheih gige a lamen a?

²⁵I muhlouh pen i lamet lebel i ngak teitei hi.

²⁶Huai bang in, Kha in i hatlouhna ah hon huh zel a; bangchi a thum ding ahia chih i thei ngal kei ua; himahleh Kha in mauna gen vuallouh in hon thumsak zel hi.

²⁷Pathian deihlam bangzel a misiangthoute a thum sak zel ziak in, lungtang enpan Kha deihlam a thei hi.

²⁸Pathian in a itte, aman a seh bang a a sapte adin, a hoihna ding un bangkim in a sepsak chiat chih i thei hi.

²⁹A theihkholhte amah Tapa bangtak a om ding in a sepkhol a, a Tapa unau tampite lak a ta masapen a hong hih theihna ding in.

³⁰Huan a sehkholhte a sam a; huan a sapte siam a tangsak lai a; siam a tansakte a pahtawi lai hi.

³¹Huai thu ah bang i genta dia leh? Pathian eilam a apan leh kuan ahia honzou thei ding?

³²Amah Tapa ngei leng hawilou a, i vek ua ding a pepan thil tengteng a thawn in a honpe tawk kei dia hia?

³³Pathian mitelte kuan ahia hek ding? Siamtangsakpa Pathian ahi ngal a.

³⁴Kuan ahia siamlouh tangsak ding? Si pen Khrist Jesu ahi ngal a; ahi, a thounawn zawta a, Pathian taklam a om a hon gensakpa ahi.

³⁵Khrist itna a kipan kuan ahia honkhen ding? Gimthuakna in hia, lungngaihna in hia, sawina in hia, taam in hia, vuaktanna in hia, lauhhuaina in hia, namsau in hia honkhen ding?

³⁶“Nangmah ziak in nitum in thah in ka om uh; belam goh dingte bang a sim ka hi uh” chih gelh bang in.

³⁷Khenlou hial ding, huaite tengteng ah, hon itpa ziak in, vualtungtuangte sang a tungtuang zaw i hi hi.

³⁸Sihna hiam, hinna hiam, angelte hiam, thupinate hiam, thil omlelte leh thil hongom dingte hiam thilhihtheihna leh,

³⁹Sanna, thukna leh thilsiam dangte himhim in leng, i Toupa Khrist Jesu a om Pathian itna a kipan, honkhen theikei ding chih diktak in ka thei hi.