Read Paite Chin ROMTE 9 Bible Online

ROMTE 9 - Paite Chin bible

ROMTE 9

¹Khrist ah thu taktak ka gen ahi, ka zuau kei, Kha Siangthou ah ka sialehpha theihna in leng hon theihpih hi,

²Ka lungtang ah haksatna thupitak leh lunggaihna dai theilou ka pai ahi.

³Ka unaute salam a ka chipihte sik in, kei pen Khrist a kipan hihtuam khop hial in hamsethuak in om leng ka chi hi.

⁴Israel mi ahi ngal ua; ta hihna, thupina leh thukhun tengteng, dan piakna leh Pathian nasepna a thuchiam tengteng amau a ahi;

⁵Pipute leng amau a ahi ua, salam thu ah Khrist leng amau a kipan a hongpawt ahi a; amah thil tengteng tung a om, tangtawn a phattuak Pathian ahi. Amen.

⁶Himahleh Pathian thu bangmahlou bang a omta ahi kei hi. Israel suante Israel mi ahivek kei uhi;

⁷Abraham suante a hih ziak un avek un a tate leng ahi kei uhi; “Isak ah na suante a kiminloh ding” chih ahizaw hi.

⁸Huai sa tate Pathian tate ahi kei ua, thuchiam tate Abraham suan a seh ahizaw uh, chihna ahi.

⁹Thuchiam pen hiai ahi: “Tu hun bang in ka hong dia, Sarah in tapa a nei ding.”

¹⁰Huai phet ahi kei Rebeka in leng i pu Isak lak a nau a pailai in,

¹¹Naupangte a pian ma un, sialehpha a theihma un, thilhih ziak hilou in, a sampa deih ziak hi zaw in, tel lam thu ah Pathian thu seh a kip theihna ding in a kiang ah;

¹²“A upa zaw in a naupang zaw nna a sem ding” Pathian in a chi hi.

¹³“Jakob ka it a, Esau zaw ka hua” chih gelh bang in.

¹⁴Bang i genta ding ua leh? Pathian ah diktatlouhna a om ahia?

¹⁵Omlou hial. Aman, “Ka hehpih peuhmah ka hehpih dia, zah ka ngaihna tung peuhmah ah zah ka ngai ding” chi in, Mosi kiang ah a genta hi.

¹⁶Huaiziak in, a deihpa ziak ahi kei a, a taipa ziak leng ahi sam kei a, a hehpihpa Pathian ziak ahizaw hi.

¹⁷Laisiangthou in Pharo kiang ah, “Hiai ziak tak in ahi k’on tunding, nang a ka thilhihtheihna ka taklat theihna ding leh leitung tengteng a ka min a than theihna ding in” a chi hi.

¹⁸Huchi in Pathian in a ut peuhmah a hehpih a, a ut peuhmah a genhak sak hi.

¹⁹Nou ka kiang ah, bangdia mawh a hondem ahia? A deihlam kuan kalh ahia? honchi ding na hih tuak uhi.

²⁰Ahi a, mihing aw, nang Pathian nial vialpa kua na hia leh? Thilsiam in a siampa kiang ah “Bang achia hichibang a hon siam” a chi dia hia?

²¹Bellei tang khat apan bel khat kilawm tak, manphatak a zat ding leh manphalou deuh a zat ding bawl din belvelpa’n bellei tung ah thu a neikei ahia?

²²Pathian in a hehna leh a thilhihtheihna latsak a ut a, a hehna thuak ding a hihsiat a om ding a a bawlkholhte tung a a hehpihna hauhdan a latsak a a thuakzoh teitei leh bang a poi a?

²³Huchi a a thupina hauhsaknate, a zahngaihna thupina tang ding a a bawlkholhte tung a a sunbuak leh a latsak theihna ding in,

²⁴Huaite tuh eite i hi ua, huai hehpihna belte Judate lak a kipan kia hilou a, Jentelte lak a kipan a leng sapte ahi.

²⁵Hosea laibu ah: “Ka mite hi ngeilou, ka mite, ka chi dia; it ngeilouhnu leng itnu, ka chita ding hi.

²⁶“Huan hichi a honghi ding a, a kiang ua, ka mite na hi kei uh a chihna mun ngei ah Pathian hing tate chih in a om ding uh, chih gelh bang in.

²⁷Isai in leng Israel mite thu kikou pih in, “Israel mite zaw tuipi piaunel zah in tam mahle uh, a sibang kia hotdam in a om ding uh.

²⁸Toupa’n kintak a hihzou vek in leitung ah a gawt ding thu a tangtun dek ngal a” a chi hi.

²⁹Isai in, Mipite “Toupa’n chisuah ding hon na hawi saklou hileh Sodom khua bang in i na omta ding ua, Gomorrah khua bang a bawl in i na omta ding uh” chi a a genkholh bang in.

³⁰Bang i genta dia leh? Jentel, diktatna delhloute’n, ginna ziak a diktatna tuh a na phata uhi.

³¹Israel, diktatna dan delhte’n, diktatna pen a pha zouta kei uh.

³²Bangziak in ahia? Ginna in a delhkei ua, thilhih a muhtheih bang in a delh ziak uh ahi. Pukna suang ah a pukta uhi.

³³Laisiangthou in: “Ngai in, Zion ah kisuihna suang leh pukna suangpi ka koih a, kuapeuh amah gingta tuh a zahlak kei ding” chih gelh bang in.