Read Paite Chin 1 KORINTHTE 1 Bible Online

1 KORINTHTE 1 - Paite Chin bible

1 KORINTHTE 1

¹Paul, Pathian deihlama Jesu Khrist sawltak hi ding a sap leh i unaupa Sostheni in,

²Korinth khua a Pathian saptuam omte, Khrist Jesu a sehtuam siangthoute, misiangthou hi ding a sapte leh gamchih a i Toupa, amau leh eite Toupa, Jesu Khrist minlou tengteng kiang ah:

³Pathian i Pa leh Toupa Jesu Khrist kiang a kipan hehpihna leh lemna na kiang uah om hen.

⁴Khrist Jesu a Pathian hehpihna noute kiang a hong kipiak ziak in na tungthu uah Pathian kiang ah kipahthu ka gen gige hi;

⁵Bangkim ah thugen peuhmah ah leh theihna chiteng ah, amah a hihhauh in na om uhi.

⁶Huchi in Khrist thu ka theihsak pen noumau ah hihkip in a om hi;

⁷Huan i Toupa Jesu Khrist kilakna ngakkawm in, khalam thilpiak himhim na tasam kei uhi;

⁸Aman i Toupa Jesu Khrist ni chiang a gensiat bei a na omna ding un, a tawppha in a hon hihkip behlap ding hi.

⁹A Tapa Jesu Khrist i Toupa toh kithuahna nei ding a nou honsam lutpa, Pathian a muanhuai hi.

¹⁰Huan unaute aw, na vek un thu kibang na gen ua, nalak ua kikhenna himhim a omlouhna ding in lungsim munkhat leh ngaihtuah munkhat a diktak a na kizop chinten zawkna ding un Toupa Jesu Khrist min in k’on ngen ahi.

¹¹Ka unaute aw, na tungtangthu uh, nalak uah kiselna a om chih Kloi inkuanpihte’n honhilh uhi.

¹²Hiai ka chihna ahi, nou sung a mi tengteng in, “Kei Paul pawl ka hi,” “kei Apollos pawl ka hi,” “kei Kifa pawl ka hi,” “kei zaw Khrist pawl ka hi,” na chih uh.

¹³Khrist khenzak in a om ahia? Paul na sik un kilhden in a om ahia? Ahihkeileh Paul min a baptist in na om ua hia?

¹⁴Khrispa leh Gaias loungal nalak uah mi kuamah k’on baptist louh ziak in Pathian kiang ah kipahthu ka gen ahi;

¹⁵Huchi hi kei leh zaw min keimah min a baptist na hi uh a chi kha ding uhi.

¹⁶Stephen inkuanpihte bel ka baptist ngei a, tuate louzaw midang ka baptist hia ka theikei.

¹⁷Khrist in baptist ding in a honsawl kei a, Tanchinhoih gen ding in a honsawl ahi; thupil a genlou in, huchilou in zaw Khrist Kros thilhihtheihna bangmahlou a suaksak kha ding uhi.

¹⁸Kros thu zaw mangthang lelte adin haina ahi ngal a; ei hotdam lelte adin bel Pathian thilhihtheihna ahizaw hi.

¹⁹“Mi pil pilna ka hihmang ding a, lemthei lemtheihna leng ka paikhe ding” chih gelh ahi.

²⁰Mi pil koi ah ahia? Laigelhmi koi ah ahia? Hiai khovel a selhatmi koi ah ahia? Pathian in khovel pilna haihuai ahi chih a theisak kei ahia?

²¹Pathian pilna ah bel, khovel in a pilna zang a Pathian a theihtheih louh nung in thugen haihuai zang a a gingtate hotdam a kipahlam ahi.

²²Judate’n chiamtehnate a phut ua, Grikte’n pilna’n a zong uhi.

²³Eite’n bel Khrist kilhden thu i gen ua; huai tuh Judate adin pukna, Jentelte adin haina ahi;

²⁴Himahleh Judate leng hi hen aw, Grikte leng hi heh, sapte adin zaw Khrist, Pathian thilhihtheihna leh Pathian pilna pen ahi.

²⁵Pathian haina mihing sang in a pilzaw a, Pathian hatlouhna leng mihing sang in a hatzaw hi.

²⁶Unaute aw, a hon sapna ngaihtuah dih ua, salam a mi pil tampite, mi hat tampite, mi hoih pipite, sap a hihlouh dan uh:

²⁷Himahleh Pathian in khovel thilhaite a tel a, mipilte a zahlaksak theihna ding in; huan Pathian in khovel thilhatloute a tel a, a hatte a zahlak sak theihna ding in;

²⁸Khovel thil niam leh thil siammawhhuaite, thil omloute tan in Pathian in a tel a, thil omte bangmahloua a bawl theihna ding in;

²⁹Huchi in Pathian ma ah mi kuamah a kiuangsak theikei ding uh.

³⁰Amah Khrist a noute hinna nak ahi; Pathian in Khrist i pilna, i diktatna, i sianthouna leh i tatna hi ding in a bawlta hi;

³¹Huaiziak in gelh a hih bang in, “A suang peuhmah in Toupa suang hen.”