Read Paite Chin 1 KORINTHTE 10 Bible Online

1 KORINTHTE 10 - Paite Chin bible

1 KORINTHTE 10

¹Unaute aw, hiaite na theihlouh uh ka deihkei, huchi a i pipute tengteng mei nuai a a omvek ua, avek ua tuipi leng a kan ua,

²Avek ua mei leh tuipi a Mosi a baptist lut a a omvek ua,

³Avek ua khalam an kibang a nek chiat ua,

⁴Avek ua khalam dawn ding kibang a dawn chiat uhi. Amaute zui, khalam Suangpi apan a dawn chiat ngal ua; huai Suangpi Khrist ahi.

⁵Himahleh a lak ua mi tamzaw tung ah Pathian a lunghita kei a; gamdai ah a puklum uhi.

⁶Huan huai thilte ei ding a etton ding ahi, thil gilou a lunggulh bang ua i lunggulh sam louhna ding in.

⁷A lak ua khenkhat milim bemi a hihbang un milim bemi hi kei un. “Mipite ne ding leh dawn ding in a tu ua, lam ding in ading nawn chiat uh” chih gelh bang in.

⁸A lak ua khenkhat in nungak a ngai ua, ni khat in sing nih leh sang thum in a puklup loh bang un, i kingai sam kei ding uh,

⁹A lak ua khenkhat in Toupa a ze-et ua, gul a hihman a a om bang un, Toupa zaw i ze-et kei ding uh.

¹⁰A lak ua khenkhat a phun ua, hihmangthangpa hih manthat a a om bang un, phun sam kei ni.

¹¹Huan, huaite vaukholhna ding in a tung uah a hongtung hi; eite, hun tawp hong tunnate, hon thuhilhna ding a leng gelh ahi uhi.

¹²Huaiziak in ding a kingaihtuah pilvang hen, huchilou in zaw a pukkha ding hi.

¹³Mihing thuaktheih val khemna himhim na tuang uah a tung ngeikei hi. Pathian zaw a muanhuai hi, aman na thuaktheih val uh khemna na tuah uh a phalkei ding; na thuaktheihna ding un khemna peuh ah taikhiakna lampi a bawl zaw ding hi.

¹⁴Huaiziak in ka deihtakte aw, milim biak taisan un.

¹⁵Mipilte kiang a gen bang a ka thugente ngaihtuah un.

¹⁶Vualzawlna nou a k’on vualzawl uh, Khrist sisan kikoppihna ahi ka hia? Tanghou ka balkhap uh Khrist pumpi kikoppihna ahi ka hia?

¹⁷Eite mi tampi tanghou beukhat, pumkhat i hi uhi; i vek un tanghou beu khat ah i tangchiat uhi.

¹⁸Salam a Israelte en dih ua; kithoihna sa nete’n maitam thilte a kikoppih kei ua hia?

¹⁹Bang ka genna ahia le? Milim lak a kithoihna leh milim leng banghiam tak ahi chih ka genna hia?

²⁰Jentelte kithoihna, Pathian lak ah hilou in dawite lak ah a kithoih uh ahi chih ka genzaw ahi; noute zaw dawite toh na kithuah uh hon deihlou ka hi.

²¹Toupa nou leh dawi nou na dawn khawm theikei ding uh; Toupa dohkan leh dawi dohkan ah na nekhawm thei sam kei ding uh.

²²Ahihkeileh Toupa hazatna tohthoh i tum uh ahi maw? Amah sang in i hatzaw ua hia?

²³“Thil bangkim hih a sianga” himahleh thil bangkim hih a hoihkei hi. “Thil bangkim hih a sianga” himahleh thil bangkim hih in mi a bawlhoih kei hi.

²⁴Kuapeuh in amah hoihna ding zong lou in midang hoihna ding zongzaw hen.

²⁵Sa dawla a zuak peuhmah uh na sia leh phatheihna ziak un bangmah donglou in ne un.

²⁶“Lei leh asung a tengteng Toupa a ahi ngal a.”

²⁷Ginglou mi lak a kuahiam in nou honsap a, hoh na ut ngal un, sialehpha theihna ziak ua bangmah donglou in, a hon lui peuh uh ne un.

²⁸Himahleh kuahiam in “Hiai zaw kithoihna ahi chi a a honhilh leh sialehpha theihna ziak leh nou a hon hilhpa ziak in nekei un.”

²⁹Nangmah sialehpha theihna ka chi kei a, amah sialehpha theihna pen ahi ka chih zawk. Bang a chia midang sia leh phatheihna in ka noplenna thunun ahia?

³⁰Kipaktak a ka tan leh a tung a kipahthu ka genna tung ah bang ding a gensiat a om ka hia?

³¹Huchi in na nek uhiam na dawn uhiam, na hihpeuhmah uh, Pathian thupina ding ngen in hih un.

³²Judate ding hiam, Grikte ding hiam, Pathian saptuamte ding hiam in a pukna ding uh bangmah hih kei un,

³³Ken keimah phattuamna zong lou a, hotdam a hihtheihna ding ua mi tampi phattuamna zong a, mi tengteng bangkim a ka kipahsak bang in.