Read Paite Chin 1 KORINTHTE 11 Bible Online

1 KORINTHTE 11 - Paite Chin bible

1 KORINTHTE 11

¹Hon enzuite hi un, keileng Khrist enzuipa ka hih mah bang in.

²Huan bangkim a n’on theihgige ziak un leh thukhah k’on hilh bang a na vom chinten ziak un k’on phat ahi.

³Himahleh pasal peuhmah lutang Khrist ahi, numei lutang pasal ahi, Khrist lutang Pathian ahi chih na theih uh ka deih hi.

⁴Pasal a lu khuhkawm a thum hiam, thugen hiam peuhmah in, a lu a selphou hi.

⁵Himahleh numei a lu khuhlou a thum hiam, thugen hiam peuhmah in a lu a selphou ahi; metmai toh kibang ahi.

⁶Numei a lu khuhlou a a om ngal leh met vanglak hen. Himahleh, numei ading a sam met leh metmai a zumhuai leh a lu khuh hen.

⁷Pasal zaw Pathian batpih leh thupina a hih ziak in a lu a khuh ding hilou himhim ahi; numei bel pasal thupina ahi.

⁸Pasal numei a kipan a pawt ahi kei a; numei bel pasal a kipan a pawt ahizaw hi:

⁹Pasal numei adia siam ahi kei a; numei bel pasal adia siam ahizaw hi:

¹⁰Huaiziak in, angelte ziak in numei in pasal thuneihna chiamtehna a khuk ding ahi.

¹¹Himahleh Toupa thilgel dan ah, numei pasal lou in a om theikei a, pasal leng numei lou in a om thei sam kei hi.

¹²Numei pasal a kipan a pawt a hih bang in, pasal leng numei lak a piang ahi ngal a; himahleh bangkim Pathian a kipan a pawt vek ahi.

¹³Noumau kingaihtuah dih ua, numei in a lu khuhlou a Pathian kiang a thum a kilawm hiam?

¹⁴Pasal in samsau a neih leh amah ading in a zumhuai ahi chih na lungtang pianpih un leng a hon theisak kei ahia?

¹⁵Numei in bel samsau a neih leh amah ding in thupina ahizaw; a sam khuhna ding a piak a hih ziak in.

¹⁶Himahleh mi kuahiam hiai thu a a genhak leh huchibang paidan himhim i neikei uh, Pathian saptuam pawlte’n leng a neisam kei hi.

¹⁷Himahleh nou hiai thu k’on hilhna ah k’on phat theikei, na hoihsemna ding uh hilou in, na siatsemna ding ua na kikhop nak ziak un.

¹⁸A masapen in saptuamte na kikhop un, nalak uah kilangkhenna a om chih ka za a; gin leng ka gingta sim hi.

¹⁹Nalak ua a taktakte a lattheihna ding un, nalak ua gintuamna leng a omsam ding him ahi.

²⁰Na hong kikhop ua na nekkhawm uh Toupa Nitakan ahi kei hi:

²¹Michih in na nek chiang un noumau nitakan na ne masa zel ngal ua; huchi in mi khat gil a kial a, a dang in a kham uhi.

²²Bangchidan ahia? Nek leh dawnna ding inn na neikei ua hia? Ahihkeileh Pathian saptuamte musit in, bangmah neiloute na selphou ua hia? Na kiang uah bang ka genta dia? K’on phat dia hia? Hiai lam thu ah k’on phat theikei hi.

²³Ka thu honhilh sawn Toupa kiang a kipan a ka muh ahi a, huchi a Toupa Jesu’n matsak a a om zan a, tanghou a lak a,

²⁴Kipahthu a genkhit a a balkhap a, “Hiai ka pumpi nou adia piak ahi, Keimah theihgigena in hiai hih zel un,” a chih.

²⁵Huchi mah bang a nitakan a nekkhit a nou leng a lak a, “Hiai nou ka sisan a thukhun thak ahi, na dawn teng un keimah theihgigena in hih zel un,” a chih.

²⁶Huai tanghou na nek ua, nou na dawn teng un a hongpai nawn masiah, Toupa sihna na phuangzak uhi.

²⁷Huaiziak in kuapeuh kilawmloutak a tanghou ne hiam, Toupa nou dawn hiam in Toupa sapum leh sisan tung ah siamlouh a tang ding hi.

²⁸Huchi in michih amah ki enchian zaw hen, huchibang in tanghou ne in nou dawn hen.

²⁹A ne leh dawn in Toupa pumpi ngenteltak a a ngaihtuah kei leh amah tung a vaihawmna ding in a ne in a dawn hi.

³⁰Hiaiziakin nalak ua mi tampi na hatkei ua, na zawngkhal uhi, tampi’n na sih loh uhi.

³¹Himahleh ngenteltak in eimah kingaihtuah zel lehang, vaihawmsak a om naklou ding i hi uhi.

³²Himahleh vaihawmsak a i om in leng khovel toh siamlouhtang a i omlouhna ding in Toupa taihilh in i om zel ahi.

³³Huaiziak in ka unaute aw, ne ding a na kikhop un kingak chiat un.

³⁴Na kikhop uh vaihawmna na thuakpihlouhna ding un, kuapeuh in a gil a kial leh a in lam ah ne masa hen. Huan thu dang zaw ka hongpai chiang in ka bawllem ding hi.