Read Paite Chin 1 KORINTHTE 12 Bible Online

1 KORINTHTE 12 - Paite Chin bible

1 KORINTHTE 12

¹Tuin unaute aw, khalam thilpiak thute na theihlouh uh ka ut kei hi.

²Jentelte na hihlai un bangchidan peuh a honpi lai un leng, huai milim pautheiloute lam ah pimang in na om uh chih na thei uhi.

³Huaiziak in kuamah in, Pathian Kha a thugen in, “Jesu hamsiat in om hen” a chi ngeikei. Huan kuamah in, Kha Siangthou kia loungal in, “Jesu Toupa ahi” a chi ngeikei uh chih k’on theisak hi.

⁴Huan thilpiak tuamtuam a om a, Kha bel kikhat ahi.

⁵Nasepna tuamtuam leng a om, himahleh Toupa khat ahi.

⁶Nasepsakna tuamtuam leng a om, himahleh Pathian khat ahi, mi tengteng a bangkim sempa ahi.

⁷Himahleh Kha theihsakna michih kiphattuampih chiatna ding in piak ahi.

⁸Mi khat kiang ah Kha in pilna thu a pia hi; midang kiang ah, huai Kha mah in theihna thu a pia hi;

⁹Huan midang kiang a, huai Kha mah in, ginna a pia hi; midang kiang ah hihdam theihna a pia hi;

¹⁰Midang kiang ah thillamdang hihtheihna, midang kiang ah thugen theihna, midang kiang ah khate theihkak theihna, midang kiang ah pau chi tuamtuamte, midang kiang ah paute hilhchetna.

¹¹Himahleh hiaite tengteng Kha khat leh a kikhat mah in, michih kiang ah a deih bangzel a hawm in a sem hi.

¹²Sapum i chih khat ahi a, hiang a nei a, sapum hiangte tengteng, tam mahle uh, pumpi khat ahi a; Khrist huchibang mah ahi.

¹³I vek un sapum khat a om ding in Kha khat a baptist in i omta ua, Judate hiam, Grikte hiam, sikhate hiam sikha lou hiam; huan i vek un Kha khat a kipan dawnsak in i omta uhi.

¹⁴Sapum i chih hiang khat kia hilou in tampi ahizaw hi.

¹⁵Khepek in, “Khut ka hihlouh ziak in sapum a pang ka hi kei” chileh, huai thu ziak in sapum a panglou ahi tuankei hi.

¹⁶Huan bil in, “Mit ka hih louh ziak in sapum a pang ka hi kei” chileh, huai thu ziak in sapum a panglou ahi tuankei hi.

¹⁷Sapum tengteng mit hi vek leh gingzakna koi ah a om dia? Avek in gingzakna hileh, gimzakna koi ah a om dia?

¹⁸Himahleh Pathian in hiang khempeuh sapum ah a utna peuh ah a omsak chiatta hi.

¹⁹Huchi in huai tengteng hiang khat kia hileh sapum pen koi ah a om dia?

²⁰Himahleh hiang tampi ahizaw uh, himahleh sapum khat kia ahi.

²¹Huan mit in, khut kiang ah, “Bangmah in k’on deihkei” a chi theikei; lu in leng khepekte kiang ah, “Bangmah in k’on deihkei” a chi thei sam kei hi.

²²Huchih naksang in, sapum hiang hat dia kilawmlou pente a kiphamoh zaw mahmah uhi;

²³Huchi in sapum hiang pahtawi thamlouh zaw a i sehte, huaite ngei i pahtawi zaw uhi; huan i hiang kilawmloute’n kilawmna thupizaw a mu zel uhi;

²⁴I hiang kilawm te’n bel huchibang a hih a kiphamoh kei uhi. Pathian in, kilawmna neilou hiang pahtawi zawk ding in, sapum a lemkhawm hi.

²⁵Huchi a sapum a kikhenna omlou a, a hiangte’n kibang tak a a kibuaipih tuah theih zawkna ding un.

²⁶Huchi in hiang khat in a thuak leh hiang tengteng in a thuakpih a, hiang khat pahtawi a a om leh hiang dangte’n a kipahpih zel uhi.

²⁷Huchi in noute Khrist Sapum na hi ua, a hiangte na hi chiat lai uhi.

²⁸Huan Pathian in khenkhat saptuam lak ah a honkoih a, a khatna ah sawltakte, a nihna ah thugenmite, a thumna ah heutute a koih a; huai nung in thillamdang hihte a om a; huai nung in hihdamtheihna thilpiakte, panpih theihna thilpiakte, vaihawm siamna thilpiakte, pautheihlouh chi tuamtuam a thugen theihna thilpiakte a om nawn hi.

²⁹Avek un sawltak ahivek uhia? Avek un thugenmi ahivek uhia? Avek un heutu ahivek uhia?

³⁰Avek un thillamdang hihmi ahivek uhia? Avek un hihdam theihna thilpiakte a nei vek uhia? Avek un pautheihlouhte in thu a gen vek uhia? Avek un thu hilhchianmi ahivek uhia?

³¹Thilpiak thupipente lunggulh mahmah zaw un. Huan lampi hoihsem k’on ensak ding hi.