Read Paite Chin 1 KORINTHTE 14 Bible Online

1 KORINTHTE 14 - Paite Chin bible

1 KORINTHTE 14

¹Itna delh zel unla, khalam thilpiakte leng lunggulh gige un, himahleh thu na gentheihna ding uh lunggulh sem un.

²Paute a pau in mi kiang a thugen hilou in Pathian kiang a gen ahizaw hi, kuamah in a thugen a theikei a; himahleh kha ah thuguk a gen ahi.

³Thugenmi in bel mihing kiang ah bawlhoihna thute, hanthawnna thute, khamuanna thute a gen zawzel hi.

⁴Paute a pau in amah kia a kibawl hoih a, thugenmin saptuamte a bawlhoih zaw hi.

⁵Huan na vek un paute a na pau uh k’on deihsak a, himahleh thu na gen uh k’on deihsak sem hi; saptuamte’n kibawlhoihna a muh theihna ding un a hilhchet nawn kei leh thugenmi zaw paute a pau mi sang in a thupizaw hi.

⁶Tuin unaute aw, paute a thugen in na kiang uah hongleng, theihsakna lam hiam, thugenna lam hiam, thuhilhna lam hiam na kiang ua ka gen kei ngal leh, bang ahia k’on hih phattuamna ding om?

⁷Thil hinna neilou, gingtheite leng, tamngai hiam, kaihging hiam, gennei a a ginkei leh, bang la ahia a tum ua a kaih uh bangchi’n a theihtheih dia?

⁸Pengkul gen neilou a a mut un kua galkap din a kisa ding a?

⁹Huchi mah bang in nou leng pautheih baihlama na gen kei uleh bangthu ahia na gen uh bangchi’n a theihtheih dia? Huihkhua a paulel na hi kei ding ua hia?

¹⁰Khovel ah pau chi tuamtuam tampi a om tham a, himahleh gen neilou himhim a omkei hi.

¹¹A pau in a gen ka theih kei leh a genmi ading in kei melmak ka hi ding a; a genmi leng kei ading in melmak ahi ding.

¹²Huchi in noute’n khalam thilpiakte na lunggulh mah bang un saptuam bawlhoihna ding in theihtawp suah in zang un.

¹³Huaiziak in paute a thugen in a hilhchet theihna din thum hen.

¹⁴Paute a ka thum leh ka kha in zaw a thum ngei a, ka theihna bel a phatuam tuankei hi.

¹⁵Bangchi’n ahita dia le? Kha in ka thum dia, theihna in leng ka thum ding; kha in la ka sa dia, theihna in leng la ka sa ding hi.

¹⁶Hichilou in, Kha in vualzawl mahle chin a thei nailoute’n na thugen theilou pi in na kipahthugen uh bangchi’n, Amen, a chithei ding ua?

¹⁷Nang zaw chihtak in kipahthu na gen hoih a, midang a bawlhoih tuankei hi.

¹⁸Noumau tengteng sang in paute a thu ka gen tamzawk ziak in Pathian kiang ah kipahthu ka gen hi:

¹⁹Himahleh saptuamte kikhopna ah paute a thu sing khat gen sang in midangte ka hilh theihna ding in ka theihtheihna in thumal nga kia gen ka utzaw ahi.

²⁰Unaute aw, ngaihtuahna ah naupang kei un; himahleh gilou ah zaw naungek unla, lungsim ah piching un.

²¹Dan laibu ah: “Paute leh gamdang mite muk in, hiai mite kiang ah thu ka gen ding a; huchi in leng a hon ngaikhe tuankei ding uhi, Toupa’n a chi” chih gelh ahi.

²²Huaiziak in paute zaw gingtate din chiamtehna ahi kei a, gingloute din ahizaw, thugen bel gingloute adin chiamtehna ahi kei a, gingta te ding in ahizaw hi.

²³Huaiziak in saptuam tengteng kikhawm a na vek ua, paute a na pau uleh thei nailoute leh gingloute honglut leh a hai uh honchi kei ding ua hiam?

²⁴Na vek ua thu na gen uleh ginglou hiam, thei nailou hiam honglut leh a siamlouhdan uh na vek ua ma ah hihlat ahi ding;

²⁵Huchi in a lungtang thugukte uh hihlat in a omta ding a, leisi in Pathian a be ding ua, “Pathian na lakuah a omtaktak” chih a gen ding uhi.

²⁶Unaute aw, bangchi ding ahita dia leh? Na hong kikhop un, phatna la hiam, thu kihilh hiam, theihsakna thu hiam, paute, hilhchetna hiam na neichiat zel ua. Bangkim bawlhoihna ding in hih hi hen.

²⁷Kuapeuh in paute a thu a gen uleh, nih in hiam, a tampen in thum in hiam hileh, kikhel zel in leng hi hen.

²⁸Huan mi khat in hilhchian hen; hilhchianmi a omkei leh saptuamte kikhopna ah dai in om henla, amah leh Pathian kiang ah gen hen.

²⁹Thugenmi in leng nih in hiam, thum in hiam, gen uhenla, midangte’n hoihtak in ngaihtuah uhen.

³⁰Himahleh a kiang a tu midang kiang a theihsakna thupiak a hongtun leh a masapen dai mai hen.

³¹Mi tengteng in a theihtheihna ding leh mi tengteng khamuang a a om theihna ding un, na vek un khatkhat in thu na genthei ngal ua.

³²Thugenmite khate thugenmite thuthu in a om uh ahi;

³³Pathian buaina Pathian ahi kei a, lemna Pathian ahizaw hi. Mi Siangthou saptuam pawl tengteng a om bang in,

³⁴Saptuamte kikhopna ah numeite dai dinden in om uhen; amau zaw a thugen uh phal ahi kei a; Dan gen bang in thumang in omzaw uhen.

³⁵Huan bangpeuh a theihnop uleh inn ah amau pasalte dong uhen; saptuamte kikhopna a numei thugen zaw a zumhuai hi.

³⁶Pathian thu noumau apan pawt ahi maw? Ahihkeileh noumau kiang kia a hongtung ahi maw?

³⁷Kuapeuh thugenmi hiam kha mi hiam a kisak leh na kiang ua ka gelh Toupa thupiak ahi chih a theih ding ahi.

³⁸Himahleh kuapeuh in a theihkei leh amah leng theih ahi kei hi.

³⁹Huaiziak in unaute aw, thugen lunggulh unla, paute a thugen leng kham kei un;

⁴⁰Himahleh bangkim kilawm leh diktak a hih hi hen.