Read Paite Chin 1 KORINTHTE 15 Bible Online

1 KORINTHTE 15 - Paite Chin bible

1 KORINTHTE 15

¹Huaiban ah unaute aw, Tanchinhoih k’on hilhzaw k’on theisaknawn ding a; huai Tanchinhoih na kipahpih ua, huai mah ah na ding ua;

²K’on thuhilh pen na mawk gintak uh hilou a, pom kichian na hih uleh huai mah ah hotdam in na om uhi.

³A masapen in ken ka muh sam nou k’on hilhsawn a; huchi a, Khrist Laisiangthou bangbang a i khelhnate ziak a a sih a,

⁴A vui ua, Laisiangthou bangbang a ni thum ni’n kaihthoh in a om hi.

⁵Huan Kifa kiang ah a kilak a, huaikhit a sawmlehnihte kiang a a kilak thute.

⁶Huaikhit in unau za nga sang a tamzawte kiang ah a kilak nawn a, huaite lak a mi, a tamzaw tutan in a damlai ua, khenkhat bel a ihmuta uhi.

⁷Huaikhit in Jakob leh sawltak tengteng kiang ah a kilak nawn hi.

⁸Huan a tawppen ah, a hunlou bang a piang, keimah kiang ah leng a kilak hi.

⁹Kei zaw sawltak lak a neupen, Pathian saptuamte ka sawi ziak a sawltak chih tuaklouh ka hi.

¹⁰Himahleh Pathian hehpihna ziak in ka hihhih ka hita; huan a hehpihna honpiak a thawn in a omkei a, huchih naksang in amau tengteng sang in ka semgim zaw hi; himahleh keimah kia in ka sem kei a, Pathian hehpihna ka kiang a om in a sem zaw hi.

¹¹Himahleh, ken leng, amau leng huchi in ka gen zel ua, huchi in nou leng na gingta uhi.

¹²Huan Khrist misi lak a kipan kaihthoh in a om chih a honhilh ngal uleh, bangchidan ahia na lak ua khenkhat in, misi thohnawnna himhim a omkei na chih uh?

¹³Misi thohnawnna himhim omlou ahihleh, Khrist leng kaihthoh in a omkei ding hi.

¹⁴Huan Khrist kaihthoh a a omkei leh, i thugen uh bangmahlou ahi ding a, na gin uleng bangmahlou ahi ding hi.

¹⁵Ahi, Khrist a kaithou chih Pathian i theihpih ziak in, Pathian lam thu ah theihpih zuauthei i honghi ding hi, misite kaihthoh a a omkei uleh, amah leng a kaithou kei ding hi.

¹⁶Misite kaithoha a omkei un zaw, Khrist leng kaihthoh in a omta kei ding.

¹⁷Huan Khrist kaihthoh a a omkei leh, na gin uh bangmahlou ahi ding a, na khelhna uah na om nilouh uh ahi ding.

¹⁸Huchi hileh, Khrist a ihmusate a mangthangta uh ahi ding hi.

¹⁹Tu damsung kia a Khrist tung a lametna i neih in zaw mi tengteng lak a mi hehpihhuai pen i hi ding hi.

²⁰Himahleh Khrist misi lak a kipan kaihthoh in a omtaktak ahi, ihmute lak a kipan gahmasa a na hita hi.

²¹Mi khat ziak a sihna a hongom ziak in mi khat ziak mah in misi thohnawnna leng a hong omta ahi.

²²Adam ah mi tengteng a si mah bang un, Khrist ah mi tengteng hih hin in leng a om ding uhi.

²³Himahleh amau hunchiat ah: Khrist gah masapen te ahi a; huaikhit chiang in a hong painawnna ah Khrist a te a thou ding uhi.

²⁴Huaikhit chiang in a tawp a hongtung ding; huai hun chiang in, vaihawmna tengteng, thuneihna leh thilhihtheihna tengteng a hihman nung in, Pathian kiang ah, Pa kiang ngei ah gam a pe ding hi.

²⁵A melmate tengteng a khenuai a a koih masiah aman vaihawm ding ahi ngal a.

²⁶Melma nanungpen hihmang a om ding sihna ahi.

²⁷Aman, “A khenuai ah bangkim a koih hi.” Himahleh “A khe nuai ah bangkim koih in a om” a chih in a nuai a bangkim koihpa a pang kha kei chih a kimu gige ahi.

²⁸Huan a nuai a bangkim koih a a om hun chiang in, Tapa mahmah leng a nuai a koih in a om ding a, Pathian bangkim a bangkim a hih theihna ding in.

²⁹Huchi ahihkei in, misite ading a baptisma a tansak uh bang a chihna uh hi ding ahia? Misite kaihthoh a a omlou ding a hih uleh bang a chia amau adia baptisma tansak uh ahia?

³⁰Bangziak a eite dakkal chih a sih lauhuai a om i hi ua?

³¹Unaute aw, Khrist Jesu i Toupa a k’on suanna sial in ni teng in ka si, ka chi ahi.

³²Mihing dan in gen leng Ephesa khua a gamsate kilaipih ka hihleh, kei din bang a phatuam ding? “Misi, kaihthoh a a omkei ding uleh ne in dawn leng a ke, zingchiang a si ding hive hang in.”

³³Zekhem in omkei un: “Lawm giloute’n omdan hoih a hihgawp nak uhi.”

³⁴Kizentak in halh unla, thil hihkhial kei un; khenkhat in Pa Pathian theihna himhim na neikei ua huai na zumna ding ua ka gen ahi.

³⁵Himahleh kuahiam khat in, “Misi bangchi’n kaihthoh ahi ding uh? Sapum bangchibang pu in ahia a hong thoh ding?” a chi ahi ding e.

³⁶Nang, mihai, nang mahmah in na tuh leng, a sih phot kei leh hih hin in a omsam a;

³⁷Huan chi na tuh in a sapum hongom ding pen ahi kei a, a tang lel na tuh zawnak, buh tang hiam, chi dang tang hiam ahi thei hi.

³⁸Himahleh Pathian in amah deih bangbang in sapum a pia a, haichi tang chih kiang ah amau sapum chiat a pia hi.

³⁹Sa tengteng sa chi khat ahi kei ua; mihing sa a tuam a, gamsa sa a tuam a, vasa sa a tuam a, ngasa sa a tuam hi.

⁴⁰Van sapum a om a, lei sapum leng a om hi, himahleh vanlam sapumte thupina a tuam a, leilam sapumte thupina a tuam hi,

⁴¹Nisa thupina a tuam a, khapi thupina a tuam a, aksite thupina a tuam hi; aksi leh aksi leng a thupina uh a tuam hi.

⁴²Misite thohnawnna leng tua bang ahi. Muatthei a tuh in a om a, muattheilou a kaihthoh in a om hi.

⁴³Pahtawilouh a tuh in a om a, thupitak a kaihthoh in a om hi. Hatlou a tuh in a om a, thilhihtheihna nei a kaihthoh in a om hi.

⁴⁴Sapum a tuh in a om a, kha pumpi a kaihthoh in a om hi. Sapumpi a om leh kha pumpi leng a om hi.

⁴⁵Huchi in mi masapen “Adam mihing a honghi a” chi a gelh ahi; Adam nanungpen bel hinna pepa kha a honghi hi.

⁴⁶Himahleh khalam a om masa kei a, salam a omzaw; huai zoh in khalam pen a om hi.

⁴⁷Mihing masapen lei a siam, leimi ahi a; mihing nihna pen van apan Toupa ahi.

⁴⁸Lei a siam mihing leimi a hih bang in, van a kipan mi tuh vanmi ahi.

⁴⁹Huan lei a siam mihing batna i put bang in, van a kipan hong paipa batna leng i pu sam ding uhi.

⁵⁰Unaute aw, sa leh sisan in Pathian gam a luah theikei ding a; muatthei in muattheihlouhna a luah sam kei ding chih, ka gen ahi.

⁵¹Ngai un, thuguk k’on hilh ding hi! I vek un i ihmu kholkei ding ua, himahleh i vek un pengkul nanungpen gin a chiang in, sawtloukal in,

⁵²Mitphiatkal lou in hihlamdan in i om vekta ding; pengkul ging ding ahi ngal a, huchi in misite muattheilou a kaihthoh in a om ding ua, eite leng hihlamdan in i omta ding uhi.

⁵³Hiai muatthei in muattheihlouhna a silh ding ahi a, hiai sithei in leng sihtheihlouhna a silh sam ding ahi.

⁵⁴Huchi a hiai muatthei in muattheihlouhna a silh a, hiai sithei in sihtheihlouhna a silh hun chiang in, huai hun ngeingei in, “Zohna in sihna a valh zouta” chih thugelh a hongtung ding hi.

⁵⁵“Aw sihna, na gu koi a omta ahia? Aw han, na zohna koi a omta ahia?”

⁵⁶Sihna gu khelhna ahi a; khelhna thilhihtheihna dan ahi.

⁵⁷Himahleh i Toupa Jesu Khrist ziak a zohna hon pepa Pathian kiang ah kipahthu om hen.

⁵⁸Huaiziak in ka unau deihtakte aw, kiptak in, hihlin vuallouh in, Toupa nasep phatuamngaitak a sem gige in om un, na sepgimna uh Toupa ah a thawn ngeikei chih na thei uhi.