Read Paite Chin 1 KORINTHTE 16 Bible Online

1 KORINTHTE 16 - Paite Chin bible

1 KORINTHTE 16

¹Huan misiangthoute adia thohlawm thu zaw, Galatia gam a saptuam pawlte kiang a thu ka piak bang in nou leng na hih sam un.

²Ni sagih ni masapen in michih in vualzawlna na muh bangzel un koih khawl chiat unla; ka hong chiang a thohlawm lakkhawm himhim a om louhna ding in.

³Huan na hehpih thilpiak uh Jerusalem khua a hohpih ding in ka hongtun chiang in kuapeuh hoih na chih ua lai na piak uh ka sawl ding hi.

⁴Huan kei vahoh kilawm ahihleh, kei toh a hoh ding uhi.

⁵Huan Masidonia gam ka totsuah khit chiang in na kiang uah ka hong ding a; Masidonia gam lah ka tuansuak himhim ding hi.

⁶Nou kiang ah bang tan hiam, phalbi sungteng houh ka tam nilouh kha diam, ka hohna ding peuh ah noute’n n’on khaksawn theihna ding un.

⁷Tua paikawm lel a honmuh malam ka ut kei a, Toupa’n lem a sakleh na kiang ua sawtsim tam ka lamen hi.

⁸Himahleh Pentikost ni tan in Ephesa khua ah ka tam ding hi.

⁹Kong lianpi, phatuampi sepna ding kei adin a kihong ngal a; huan doumite leng tampi a om uhi.

¹⁰Huan Timothi a hongtun leh lauthawng lou a na kiang ua a omna ding in pilvang un; ken ka sep bangmah in Toupa nna a sem hi.

¹¹Huaiziak in kuamah in musit kei uhen; ka kiang a a hong theihna ding in khamuangtak in khakhia unla; unaute toh amah muh ka lamen hi.

¹²I unaupa Apollos thu zaw, unaute toh na kiang ua hong ding in ka deih ngial hi, himahleh tun zaw hong a utkei a; a lemtan hun chiang in a hongding hi.

¹³Kiveng unla, ginna ah ding kip unla, kihihhang unla, hattak in om un.

¹⁴Na hih peuhmah uh itna a hih hivek hen.

¹⁵Unaute aw, Stephena inkuanpihte zaw Akhaia gam a gingta masate ahi ua, misiangthoute na sem ding in a kipia uh chih na thei uhi;

¹⁶Huchibang mite kiang ah leh, nasep a panpih leh, semgim peuhte kiang a lut ding in k’on hanthawn hi.

¹⁷Huan Stephenas, Fortunate, leh Akaikas a hongtun uh ka kipak hi, noute hihlouh langlou a ka taksapna hon huh ziak un.

¹⁸Amau ka lungsim leh na lungsim uh hon hihhalh ua, hichibang mite zaw kipahpih un.

¹⁹Asia gam a saptuam pawlte’n chibai honbuk uhi. Akuila, Priscilla leh a inn ua om saptuamte’n deihsaktakin Toupa ah chibai honbuk uhi.

²⁰Unau tengteng in chibai a honbuk uhi. Tawp siangthou in chibai kibuk un.

²¹Kei Paul in hiai chibai bukna keimah khut mahmah a ka gelh ahi.

²²Kuapeuh in Toupa Jesu Khrist a itkei leh hamse thuak in om hen. I Toupa a hongpai hi.

²³Toupa Jesu Khrist hehpihna na kiang uah om hen.

²⁴Khrist Jesu a ka itna na vek ua lak ah om hen. Amen.