Read Paite Chin 1 KORINTHTE 2 Bible Online

1 KORINTHTE 2 - Paite Chin bible

1 KORINTHTE 2

¹Unaute aw, Pathian thuguk nou honhilh ding a na kiang ua ka honglai in thugen thupi leh pilna thupi toh ka hongpai kei hi.

²Jesu Khrist, amah mah kilhden a om thu kia loungal nalak uah bangmah theih ka tum kei hi.

³Hatlou leh lau in, nakpitak a ling kawm in nalak uah ka om hi.

⁴Ka paukam suak leh ka thugente thupil a khemna thu ahi kei a, Kha leh thilhihtheihna theihsakna in ahizaw hi.

⁵Huchi a na ginna uh mihing pilna a kingalou a, Pathian thilhihtheihna a kinga a a om theihzawkna ding in.

⁶Himahleh pichingte lak ah ahihleh thupil i hilh zel a, himahleh hiai khovel thupil zaw ahi kei; hiai khovel vaihawmte mangthang dingte thupil leng ahi sam kei hi:

⁷Pathian pilna guk leh kisel, i thupina ding a Pathian in khovel omma a a sehkholhsa pen i hilh zawnak hi.

⁸Hiai khovel vaihawmte himhim in a theikei uhi; thei le uzaw thupina Toupa kilhden lou ding hi ve un.

⁹“Mit a muh ngeilouh, bil a zak ngeilouh, mihing lungtang a lut ngeilou, Pathian in amah itte adia a bawl,” chih gelh bang in.

¹⁰Pathian in Kha in huaite ei a hon theisakta hi; Kha in bangkim Pathian thugilte leng a suikhe vek hi.

¹¹Mihing ngaihtuahte mihing lungsim asung a om mah lou in, kuan ahia thei ding? Huchi mah bang in Pathian ngaihtuahte Pathian Kha mah lou kuamah in a theikei uhi.

¹²Huan a thawn a Pathian in thil honpiakte i theihna ding in, eite’n zaw khovel kha hilou in, Kha, Pathian a kipan ngei i mu zaw uhi

¹³Mihing pilna a sinsak thute a hilhlou in Kha sinsak in i hilhzaw ua, Kha neite kiang ah khalam thutakte i hilhchian uhi.

¹⁴Khovel min Pathian Kha thilpiakte a sang kei nak hi, amah ngaihdan in haihuai ahi ngal a, kha a theihchet a hih ziak in a theithei kei hi.

¹⁵Khami in bel thil bangkim a chian zel a, amah lah kuamah in a chian kei uhi.

¹⁶“Kuan ahia Toupa lungsim theikhin a, amah thuhilh thei ding?” Eite’n bel Khrist lungsim i pu uhi.