Read Paite Chin 1 KORINTHTE 3 Bible Online

1 KORINTHTE 3 - Paite Chin bible

1 KORINTHTE 3

¹Unaute aw, kha mite kiang a gen bang in na kiang uah thu ka gen theikei hi; samite, Khrist a naungekte kiang a gen bang in ka genzaw hi.

²An gum na nektheih nailouh ziak un, nawitui in ka honvak a, tua an gum hi tuin leng na nethei naikei lailai uh, sami na hihlai ziak un.

³Nalak uah kihazatna leh kiselna a om nak ziak in sa mi hilai in mihing bang a omlai hilou na hi u hiam?

⁴Mi khat in “Paul pawl ka hi,” midang in, “Kei zaw Apollos pawl ka hi,” na chih laiteng uh mihing lel hilai hilou na hi uhiam?

⁵Apollos kua ahia leh? Paul leng kua ahia? Nasemmi, noumau hon gingta sakmi lel eive ua, huai leng Toupa’n a piak bangzel in ahi.

⁶Ken ka suan a, Apollos in tui in a vak a, himahleh Pathian in a khangsak hi.

⁷Huchi in a khangsakpa Pathian kia loungal, a suanpa lah bangmah ahi kei a, tui a vakpa leng bangmah ahi tuankei hi.

⁸Huan a suanpa leh tui a vakpa pumkhat ahi ua, himahleh amau sepgim bangzel in, amau kipahman a mu tuaktuak ding uhi.

⁹Koute Pathian na seppihte ka hi ua, noute Pathian louma na hi ua, Pathian inlam leng na hi uhi.

¹⁰Pathian in hehpihna honpiak bangzel in inlam heutupen piltak bang in ken suangphum ka lem a, midang in a tung ah inn a lam uhi. Himahleh michih a tung a a lamdan ding uah pilvang uhen.

¹¹Suangphum lepkhitsa loungal suangphum dang kuamah in a lem theita kei ua, huai suangphum Jesu Khrist ahi.

¹²Hiai suangphum tung ah kuapeuh in dangkaeng in hiam, dangkain hiam, suang mantamin hiam, singin hiam, loupain hiam, buhpawl hiam inn lam leh; chetna ni tungding ahi.

¹³Michih nasep a honglang ding hi; ni in a hihlang ding ahi ngal a, mei a a kilak ding ziak in; mei ngeingei in michih nasep bangchibang ahia chih a enchian ding hi.

¹⁴Kua nasep leng a tung a a lampen a om gige leh huai mi in kipahman a mu ding.

¹⁵Kua nasep leng a kat leh huai mi in a tan ding hi; amah taktak zaw mei a paisuak bang in hotdam in a om ding hi.

¹⁶Pathian tempul na hih uh leh Pathian Kha noumau sung ah a teng gige chih na theikei ua hia?

¹⁷Kuapeuh in Pathian tempula hihsiat leh Pathian in huai mi a hihse ding; Pathian tempula siangthou ngal a, huai tempul noumau na hi uhi.

¹⁸Kuamah amah leh amah kikhem kei hen. Nalak ua kuapeuh hiai khovel a pil a kisak leh, a hongpil theihna ding in mihai hongsuak hen.

¹⁹Hiai khovel pilna Pathian ngaihdan in haina ahi. “Aman amaute a pil lepchiahna uah a man hi” chih gelh ahi:

²⁰Toupa’n mipilte ngaihtuahna a thawn ahi" chih a thei chi a gelh ahi nawnlai hi.

²¹Huaiziak in kuamah in mihingte suang kei uhen; bangkim nou a ahi vekta ngal a;

²²Paul hiam, Apollos hiam, Kifa hiam, khovel hiam, hinna hiam, sihna hiam, thil omsa hiam, thil hongom ding hiam;

²³Avek in nou a ahivek hi; noumau leng Khrist a na hi ua; Khrist leng Pathian a ahi.