Read Paite Chin 1 KORINTHTE 5 Bible Online

1 KORINTHTE 5 - Paite Chin bible

1 KORINTHTE 5

¹Nalak uah kingaihna nin a om chih thu a thang vengvung hi. Huchibang kingaihna nin Jentelte lak a leng om ngeilou, nalak ua mi khat in amah pa zi a kitenpih hi.

²Huai thilhihpa nalak ua kipan delhkhiak ding a lungngaih naksang in na kisaktheih pih zaw uhi.

³Kei mahmah sapum in ka pang kei na a, kha in noute lak ah ka om a, thil huchitel hihpa tuin leng Toupa Jesu min in nalak ua pang bang a kingaihtuah in thupukna ka bawlta hi,

⁴I Toupa Jesu Khrist min a na kikhop chiang un, noute lak ah kha in ka om a, Toupa Jesu Khrist thilhihtheihna leng a om hi,

⁵Mi huchibang zaw a kha Toupa ni chiang a hotdam a a om theihna ding in a sa hihmang ding in Setan kiang ah pia un.

⁶Na kisaktheihna uh hoihlou ahi. Silngou tawmchik in tanghou beu a pum in a zelsuak chih na theikei ua hia?

⁷Silngou panglou na hih mah bang un tanghou beu thak na hong hihtheihna ding un silngou luipen pai khesiang un. I Paikan Ankuangluina ding Khrist latkhiakin a omta hi:

⁸Huaiziak in Ankuanglui ni, silngou lui a Ankuang lui lou in, nunsia leh gitlouhna silngou a leng Ankuanglui samlou in, takna leh thutak tanghou silngou sohlouhin Ankuang i lui zaw ding uhi.

⁹Ka laikhak ah kingaihhatte kithuahpih lou ding in na kiang uah ka gelh hi;

¹⁰Hiai khovel a kingaihhatte hiam, huaiham leh lepgute hiam, milimbete hiam kithuahpih hetlouh ding chi ka hi kei a; huchibang hileh khovel a kipan na paikhiak uh kul ding ahi.

¹¹Tun bel kuapeuh unau min paw ngal in, kingaihhatmi hiam, mi huaiham hiam, milim bemi hiam, hanhatmi hiam, zukham hatmi hiam, lepgumi hiam hileh, kithuahpih lou ding in na kiang uah ka gelh ahi; mi huchibang kiang ah nek leng ne kei un.

¹²Pawlam mite tung a vaihawm ding ken bang ahia ka awlmoh ding om? Nou sung a mite hilou hia na ngaihtuah ding uh?

¹³Pawlam a mite tung a Pathian in vaihawm hilou hia? “Huai migiloupa na lak ua kipan koihmang un.”