Read Paite Chin 1 KORINTHTE 6 Bible Online

1 KORINTHTE 6 - Paite Chin bible

1 KORINTHTE 6

¹Na lak uah kuapeuh in midang toh thubuai neita le uchin, misiangthoute ma a tunlou in, mi diktatloute ma ah na tun ngam ding ua hia?

²Ahihleh misiangthoute’n khovel tung a vaihawm ding ahi chih na theikei ua hia? Khovel mite tung a bawn vaihawm ding na hih uleh, thil neupente leng ngaihtuah taklou na hi ua hia?

³Tulai damsung thute genlouh angelte nangawn i vaihawm ding uh ahi chih na theikei ua hia?

⁴Huchi in tulai damsung thute ngaihtuah ding na neih un bangdia saptuamte ngaihniam pente ngaihtuah sak na hi ua?

⁵Na zumna ding un ka gen ahi. A unaute kal a thu hihpuk thei mi pil, khat bek na lak uah na mu kei ua ading maw?

⁶Unau in a unau mah ginglou mite vaihawmna a a tut zawk nak!

⁷Hilou ahi, hiai na diklouhna khat uh ahipah hi, thubuai na kineih tuah nak uh. Bangdia dikloupi a hihna na thuak zaw lou? Bang a chia kizangsak zaw mailou oi?

⁸Hilou ahi, noumau ngei in na unaute uh tung ah leng na hihdik kei ua, na zangsak uhi.

⁹Ahihleh midiktatloute’n Pathian gam a luah kei ding uh chih na theikei ua hia? Zekhem in omkei un, kingaihhatte, milim bete, angkawmte leh mihukte leh tokawhukte,

¹⁰Gutate, mihuaihamte, zukhamhatte, salhhatte leh lepgute’n Pathian gam a luah kei ding uh.

¹¹Huan noute khenkhat huchibang na hi uhi; himahleh Toupa Jesu Khrist min in leh i Pathian Kha ah siansak na hita ua, hihsiangthou na hita uh, siamtang na hita uhi.

¹²“Thil bangkim hih kei ding in a sianga” himahleh thil bangkim hih a hoihkim kei hi; “Thil bangkim hih kei ding in a sianga” himahleh bangmah sikha din ka kiphal kei hi.

¹³“Nek dingte gilpi a ahi a, gilpi leng nek ding a ahi” himahleh Pathian in ahihmang tuaktuak ding. Huan sapum pen kingaihna ding ahi kei a, Toupa ading ahi; Toupa leng sapum ading ahi:

¹⁴Pathian in misi lak a kipan Toupa a kaithou a, eite leng a thilhihtheihna in a hon kaithou sam ding hi.

¹⁵Na sapum uh Khrist hiang ahi chih na theikei ua hia? Khrist hiangte laksak in kizuak hiang ding peuh in ka bawl dia hia?

¹⁶Bawllou hial ding. Ahihleh kizuak zop amah toh pumkhat ahi uh chih na theikei ua hia? “A nihun sa pumkhat a hi ding uh” a chi ngal a.

¹⁷Toupa zop bel amah toh kha pumkhat ahi uhi.

¹⁸Kingaih taisanun. Mihing thil hihkhelh chiteng sapum pawlam ah ahi; mingaihhat in bel amah sapum tung ah thil a hihkhial hi.

¹⁹Ahihleh na sapum uh, na sungua om Pathian kiang a kipan a na muh uh, Kha Siangthou tempul ahi chih na theikei ua hia? Noumaua leng na hi kei uhi.

²⁰Noute man a leisa na hihman un, na pumpi uh leh na kha Pathiana mah in, Pathian pahtawi un.