Read Paite Chin 1 KORINTHTE 7 Bible Online

1 KORINTHTE 7 - Paite Chin bible

1 KORINTHTE 7

¹Tuin, na thilgelh thute uzaw: “Pasal ading in numei khoih louh a hoih hi.”

²Himahleh kingaihna a om nak ziak in pasal chih in amah zi chiat nei henla, numei chih in leng amah pasal chiat nei hen.

³Pasal in a zi kiang ah a tan ding hun pia hen; huchi mah bang in zi in leng a pasal kiang ah a tan ding hun pe sam hen.

⁴Zi in amah sapum tung ah thu a neikei a, a pasal in thu a nei zaw hi; huchi mah bang in pasal in leng amah sapum tung ah thu a neikei a, a zi in thu a nei zaw hi.

⁵Thum ding a na kipiak theihna ding uleh, na kikholh nawn theihna ding ua sawtlou kal a dia pha nasak tuaktuak kei ngal uleh a kuamahmah kizangsak kei un, huchilou in zaw na kidek zohlouh ziak un Setan in a honkhem kha ding hi.

⁶Himahleh hiai thu thupiak dan hilou in phal lam thu in ka genzaw ahi.

⁷Ken bel, mi tengteng keimah bang a a omvek uh ka deih ahi. Himahleh michih in Pathian a kipan thilpiak amau muh lam, khat in lam tuam in khat in lam dang in a neichiat uhi.

⁸Himahleh lengkulte leh meithaite kiang ah huchi in ka chi ahi: Keimah bangtak in om le uh amau din a hoih ding hi.

⁹Kidektheihna a neihkei ua leh kiteng u hen; huk sang in kiten a hoihzaw hi.

¹⁰Huan kitengsate kiang ah thu ka pia, keimah bel hilou in, Toupa piak ahizaw; Zi in a pasal khen kei hen;

¹¹A khen vanglak leh pasal nei nawnlou in om vanglak hen, ahihkeileh, a pasal toh mah kituak nawn uheh; huan pasal in a zi ma kei hen.

¹²Midang kiang ah ahihleh Toupa hilou in keimah in ka gen: Unau kuapeuh in zi, gingloumi kitenpih leh a kiang a om gige a ut leh, ma kei hen.

¹³Huan numei pasal ginglou kitenpih in, a pasal in a kiang a om gige a ut leh ma kei hen.

¹⁴Pasal gingloumi a zi ziak in hihsiangthou in a om a, zi gingloumi leng a pasal ziak in hihsiangthou in a omsam ahi; huchi hita kei leh, na tate uh a siangthou kei ding uhi; himahleh a siangthou na uhi.

¹⁵Himahleh a ginglou pen in a khen leh khen mai hen, huchibang ah zaw unaupa hiam, unaunu hiam, hen ahita kei ding. Pathian in lemna ah a honsam hi.

¹⁶Zi aw, na pasal na hotdam ding leh ding louh bangchi’n na thei a eita? Pasal aw, na zi na hotdam ding leh ding louh bangchi’n na thei a eita?

¹⁷Himahleh, Toupa’n michih kiang a a piak bang chiat leh Pathian in michih a saplaia a omdan bangchiatin om hen. Huchibang in saptuam pawl tengteng ah ka hihkip hi.

¹⁸Zeksumsa a sapa om uhia? Zeksumlouh honghi tuankei uhen. Zeksumlouh a om sap a om uhia? Zeksum tuan dah uhen.

¹⁹Pathian thupiakte zuih lel louh ngal zeksum i chih bangmah ahi kei a, zeksum louh leng bangmah ahi kei hi.

²⁰Michih sapa a omlai ua a tan ngeina uah om chiat uhen.

²¹Sikha hisa a sap na hi hia? Khawksa tuan ken. Na suahtak theih leh sensukin.

²²Sikha hisa a om Toupa sap Toupa sikha noplen ahi a; huchi mah bang in noplen sa a sap Khrist sikha ahi.

²³Man a lei na hita ua mihingte sikha ah lut kei un.

²⁴Unaute aw, michih sapa a omlai bangbang in Pathian kiang ah om gige hen.

²⁵Huan nungak siangthou lam thu ah zaw Toupa thupiak himhim ka neikei; himahleh muanhuai a om ding in Toupa kiang a kipan zahngaihna mu ka hih ziak in ka ngaihtuah dan ka gen ding.

²⁶Tulai haksatna ziak in pasal a omdan ngeingei bang in om leh amah ading in hoih in ka gingta hi.

²⁷Zi a hen na hi hia? Kisutkhiak tum ken. Zi a henlouh na hi hia? Zi zong ken.

²⁸Himahleh zi na neih leh thil na hihkhial kei hi, nungak siangthou in leng pasal a neih leh thil a hihkhial sam kei hi. Himahleh, hichibang mite’n sa ah gimna a thuak ding uhi; himahleh ken zaw hon thuaksak louh ka ut hi.

²⁹Himahleh unaute aw, hiai ka chi ahi: hunseh a tomta; zi neite neilou bang a a om theihna ding un;

³⁰Kapte kap lou bang a a om theihna ding un leh kipakte kipaklou bang a a om theihna ding un;

³¹Khovel zangte zang law zen lou a a om theihna ding un: hiai khovel omdan lah a mangthang gige ahi.

³²Lungzinna neilou a na om uh k’on deih hi. Zi neilou pasal in Toupa lungkimsakna ding in, Toupa lam thilte a limsak hi.

³³Zinei pasal in bel a zi lungkimsakna ding in, khovel thilte a limsak hi.

³⁴Pasal neisa leh nungak siangthou kilamdanna a om hi. Pasal neilou numei in a sapum leh Kha Siangthou ding dan, Toupa lam thilte a limsak a; pasalnei numei in bel a pasal lungkimsak ding dan, khovel lam thilte a limsak hi.

³⁵Nou phattuamna ding in hiai ka gen ahi; na tung ua khamna nga hilou in, navak a na omna ding uleh Toupa kiang a na kipiakna uh bukimna ding in ahizaw.

³⁶Kuapeuh in a zikham tung a gamta diklou hi a a kigintak a, a lunggulhna a let ngal a a kul leh, hoih a sak bang in hih hen aw: kiteng uhen, khelhna ahi kei.

³⁷Himahleh kuapeuh a lungtang a thukhensat a, a loutheilou khop a kulna nei hilou a, amah kithuzohmi in a siangthouna kepbit a tup chinten leh a hih hoih ding.

³⁸Huchi in nungak kitenpih pa’n a hih hoih a; himahleh Zi neilou dia amah kikham in a hih hoih zaw ding hi.

³⁹Zi zaw a pasal a dam laiteng hen ahi; himahleh a pasal a sih a leh a deih peuh a nei thei ding a, himahleh Toupa a om mi ahi ding ahi.

⁴⁰Himahleh kei ngaihdan in, a om ngei in om gige leh nuam a sa zaw ding; ken Pathian Kha neisam in ka kithei hi.