Read Paite Chin 1 KORINTHTE 8 Bible Online

1 KORINTHTE 8 - Paite Chin bible

1 KORINTHTE 8

¹Tuin milimte kiang a kithoihna tungtang zaw: I vek un theihna i neichiat uh, chih i kithei hi. Theihna in mi a kisathei sak a itna in mi a bawl hoih hi.

²Kuapeuh in thil banghiam thei a a kingaihtuah leh, a theih ding thei nailou ahi.

³Himahleh mi kuapeuh in Pathian a it leh, huai mi mah amah theih ahi.

⁴Huchi in milimte kiang a kithoihna thilnek thu zaw, “Khovel ah milim himhim bangmah a hih louh dan uleh, khat kia loungal Pathian dang himhim a omlouh dan i thei uhi.”

⁵Van ah leh lei ah pathian minpu tampi om mahle uh, huchibang pathian tampi leh toupa tampi a om uhi.

⁶Eite ading in bel Pathian khat kia Pa, a om a amah kiang a kipan in bangkim a pawt a, eite leng amah adia om i hi uhi. Toupa khat kia, Jesu Khrist a om hi, Amah ziak in bangkim a om hi, eite leng amah ziak mah a om i hi uhi.

⁷Himahleh huai theihna mi tengteng ah a omkei hi; khenkhatte milim biakna sa a hih ziak un, milim kiang a kithoihna ahi chih thei napi in tutan in a ne uhi; huchi in a sialehpha theihna uh a hatlouh ziak in a thanghuaisak uhi.

⁸Himahleh, sanek in Pathian mit hon tungsak tuankei ding a, ne keimah lehang i se tuankei a, ne mah lehang leng i hoih tuan sam kei hi.

⁹Himahleh pilvang un, huchilou in zaw na noplenna uh bang chichi hiam in mihatloute adin pukna a honghi kha ding hi.

¹⁰Nang theihna neimi, kuapeuh in milim biakna in a Ankuang um a a honmuh ngal un, amau mihatlou na hita le uh milim kiang a kithoihna thil ne ding in a sialehpha theihna hong maingal lou ding hia?

¹¹Huchi in na theihna ziak in unau hatlou, a sih sik a Khrist in a sihsakpa, a mangthang ding hi.

¹²Unaute tung a huchibang thil na hihkhelh ua, a sialehpha theihna uh a hatlouh naklai a na liamsak behlap un, Khrist tung ah thil na hihkhial uhi.

¹³Huaiziak tak in ka sa nek in ka unau a hihpuk sang in, ka unau ka hihpuk louhna ding in kumtawn in sa himhim ka neta kei ding hi.