Read Paite Chin 1 KORINTHTE 9 Bible Online

1 KORINTHTE 9 - Paite Chin bible

1 KORINTHTE 9

¹Noplen ka hi ka hia? Sawltak ka hi ka hia? I Toupa Jesu ka muta ka hia? Noute Toupa a ka nasep gah na hi kei ua hia?

²Mi dangte adin sawltak hi keimah leng, nou ading bek in zaw ka hi; Toupa a ka sawltak hihna chiamtehna noumau na hi uhi.

³Hiai kei hondemte ka dawn na ahi,

⁴Ne ding leh dawn ding in thu ka neikei ua hia?

⁵Sawltak dangte leh Toupa unaute leh Kifa bang in zi gingtami pi vialvial ding in thu ka neikei ua hia?

⁶Ahihkeileh kei leh Barnaba kia koumau kivak kawm a khut a nasem lou ding in thu ka neilou tuam ua hia?

⁷Sepaih kua ahia amah kivak a galkap ngei? Kuan ahia a gah ne lou a grephuan bawl ngei? Ahihkeileh kuan ahia ganhon nawitui nelou a ganhon vul ngei?

⁸Huai thute mihing bang mai in ka gen ahia? Danthu mah in leng huai ngei a gen sam ka hia?

⁹Mosi dan Laibu ah, “Bawngtal in buh a chillai in a muk gak ken” chih gelh ahi. Pathian in bawngtal ading kia hia a ngaihtuah sak?

¹⁰Ahihkeileh ei ading a kigen ahi hia? Hi e, ei ading a a gelh ahi; Leiletpa’n lamet nei a leh ding ahi a, buhvawpa’n leng tanneih sam lamen in a vuak ding ahi.

¹¹Koute’n khalam thilte na kiang ua ka tuh ngal uleh, na salam thilte uh at le ung leng thil thupi ahi dia hia?

¹²Midang in bawn na tung ua thuneihna a tan uleh kou tang sem lou ding ka hi uh maw? Himahleh huai thuneihna ka zang kei uh; Khrist Tanchinhoih ka dallouhna ding un bangkim ka thuak teitei uhi.

¹³Tempula thiltan bawl vialvialte’n Pathian biakin a kipan nek a mu ua, maitam a nasemte’n maitam apan a ne uh chih na theikei ua hia?

¹⁴Huchi mah bang in, Toupa’n Tanchinhoih gente nek muhna ding in Tanchinhoih mah a sep hi.

¹⁵Himahleh ken zaw tuate khat leng ka zang kei hi; ka tung a hiaite na hih ding uh ahi chi a hiai thu gelh ka hi kei hi. Kuapeuh in ka suanpen bangmahlou a a bawl sang un, si mai leng kei ading in a hoihzaw hi.

¹⁶Tanchinhoih gen mah leng kisaktheihna ding ahi kei hi. Hihlouh theihlouh ka tung ah a kinga ahi; Tanchinhoih gen keileng ka tung gik ding ahi.

¹⁷Huai tuh keimah utthu a hih hileng kipahman ka nei hi; himahleh, keimah utthu ahihkei leh Tanchinhoih kepna nna piak a om ka hi.

¹⁸Ka kipahman bang ahia leh? Tanchinhoih ka gen in loh neilou a, Tanchinhoih a thawn a pia ka hihtheihna ahi.

¹⁹Kuamah sikha hi kei mah leng, mi tamsem ka lak theihna ding in mi tengteng sikha in ka kibawlta hi.

²⁰Huchi in Judate ka laklut theihna ding in Judate kiang ah Judami bang in ka om zel; dan nuai a omte ka laklut theihna ding in dan nuai a omte kiang ah dan nuai a om bang in ka om zel, dan nuai a om tuanlou in;

²¹Dan neiloute ka laklut theihna ding in dan neiloute kiang ah dan neilou bang in ka om zel, Pathian dan a omlou tuanlou in, Khrist dan zawm ngal in.

²²Hatloute ka laklut theihna ding in hatloute kiang ah hatlou bang in ka om zel; hihtheihna teng zang a khenkhatte ka hotdam theihna ding in mi tengteng kiang ah bangkim ka hita hi.

²³Tanchinhoih ziak in bangkim ka hih zel a, a vualzawlnate ka tansam theihna ding in.

²⁴Kitaitehte avek un a tai ua, himahleh khat kia in kipahman a mu zel chih na theikei ua hia? Na muhtheihna ding un huchi mah bang in tai un.

²⁵Huan kidemna a kimawlmi peuhmah bangkim ah mahni kithunun in a om nak uhi. Amau zaw lallukhu sethei mu ding in a hih ua, eite’n bel lallukhu setheilou mu ding in.

²⁶Huaiziak in kei ka tai a, a ziak bei hilou in; huihkhua leltak nawhlou in, ka pang hi:

²⁷Ka sapum ka hih sidup a; sikha in ka bawl zawzel hi; huchilou in zaw midangte kiang a ka tangkoupih nung in leng bangchi hiam in keimah tak kipahman mutaklou a in ka om kha ding hi.