Read Paite Chin 2 KORINTHTE 1 Bible Online

2 KORINTHTE 1 - Paite Chin bible

2 KORINTHTE 1

¹Paul, Pathian deihlama Khrist Jesu sawltak leh i unaupa Timothi in; Korinth khua a Pathian saptuam omte kiang leh Akhaia gam tengteng a misiangthou omte kiang ah:

²Pathian i Pa leh Toupa Jesu Khrist kiang a kipan hehpihna leh lemna na kiang uah om hen.

³I Toupa Jesu Khrist, Pathian leh Pa, hehpihnate Pa leh khamuanna tengteng Pathian phat in om hen.

⁴Pathian in koumau hon khamuanna ngei in gimthuakna peuhmah a omte leng ka khamuan sam theihna ding un, aman ka gimthuaknate uah a hon khamuan hi.

⁵Khrist thuaknate tampitak ka tan bang un, Khrist ziak in khamuanna leng tamsem ka tang uhi.

⁶Himahleh gimthuak a ka om uleh noumau khamuanna ding leh hotdamna ding ahi a; huan khamuan a ka om uleh ka thuak bang uh na thuak chiang ua na theih ua na khamuanna ding uh ahi.

⁷Huan gimthuakna tangsamte na hih bang un, khamuanna tang samte leng na hi uh chih ka theih un k’on lametsakna uh a kip ahi.

⁸Unaute aw, Asia gam a ka tung ua gimthuakna tung na theihlouh uh ka deihkei uhi, huchi a nakpitak a thuakzoh vuallouh leh hin leng lamet huailou khophial a delhden in ka om uhi.

⁹Ahi, sihna thupukna muta in ka kingai uhi; himahleh huai koumau kimuanglou a misite kaithoupa Pathian ka muan zawkna ding uh ahi;

¹⁰Aman huchibang sih lauhuai lak ah hon hunkheta a, a hon hunkhe nawn ding; a hon hunkhe nawnzel ding chih amah tung ah ka lametna uh ka nga uhi.

¹¹Noute’n leng thumna in n’on panpih ding uh ahi, huchi in tampite thumna dawnna vualzawlna piak a ka om chiang un koute ziak in mi tampi in kipahthu a gen ding uhi.

¹²Koute suanpen hiai ahi, sapilna ah hilou in, Pathian hehpihna hi zaw in siangthouna leh Pathian dikna nei in khovel ah ka gamta ua, nou lam ah ka gamta hoih nawn sem uh chih ka sialehpha theihna un hon theisak hi.

¹³Na simtheih uleh na theihtheih ding uh loungal thu dang himhim na kiang uah ka gelh kei uhi; a tawppha in ka thu uh na theihsiam uh ka lamen lai uhi.

¹⁴Theihsiamna tan na neihtak bang un, i Toupa Jesu ni chiang in, noute k’on suan theih bang un nouleng koute n’on suang thei sam ding uhi.

¹⁵Huan huai gintakna nei in, na kiang uah hong masa leng ka chi a, kipahna thuah nih na neih theihna ding un.

¹⁶Noumau tawn kawm in Masidonia gam ah pai zel leng la, Masidonia gam a kipan a na kiang uah hong kiheinawn in, Judia gam a ka hohna ding ah noumau hong kha le uchin ka chi hi.

¹⁷Huchibang ka ngaihtuah lai in ka lungsim kiplouhdan langsak hia ka hih? Ahihkeileh, “Ahi, chih leh, Ahi kei,” chi tuaktuak ding in, thilhih ka tup nak pen khovelmi bang in hia ka tup?

¹⁸Himahleh Pathian a muanhuai bang in noumau lam a ka thu uh, Ahi, chih leh Ahi kei, chih ahi kei hi.

¹⁹Abang abang hi hen aw, Pathian Tapa Jesu Khrist thu, kei Silvana leh Timothi in na lak ua ka gen un, “Ahi leh Ahi kei” chih ahi sam kei a, Amah ah zaw thil tengteng “Ahi” chih ahi gige hi.

²⁰Pathian thuchiamte tengteng in amah ah, “Ahi,” chih a muvek hi. Huaiziak in ahi Pathian thupina ding a amah ziak a, “Amen,” ka chih uh.

²¹Huan Khrist a noumau toh hon hihkippa leh kou hon sawlpa Pathian ahi;

²²Amah zaw hon chiamtehpa leh i lungtang a khamna Kha hon pepa leng ahi.

²³Himahleh ka kha tung a theihpih ding in Pathian ka sam ahi, noumau honhawi ding in ahi Korinth khua a ka hong taklouh zaw.

²⁴Na ginna uh hon thuneihkhum hilou in, na kipahna ding ua nou toh semkhawm ka hi zaw uhi; ginna ading kip na hi uhi.