Read Paite Chin 2 KORINTHTE 10 Bible Online

2 KORINTHTE 10 - Paite Chin bible

2 KORINTHTE 10

¹Huan kei Paul, na lak ua na mitmuh ua thunuailuttak a om a, na kiang ua omlouh tak a noumau lam a khauh in Khrist lungnemna leh nunnemna in k’on ngen ahi;

²Ahi, na kiang ua ka om chiang in khenkhat sa bang a om a honsepte tung a hangsantak a om ka tup ngamna bang in, k’on khauhkhum a kul louhna ding in k’on ngen ahi.

³Sa ah om mah leng sa kidou bang in i dou kei ua,

⁴Eite kigalvannate zaw sa leng ahi kei a, kulhpi kiptak phelna ding a Pathian ziak a thilhihtheitak galvan ahizaw hi.

⁵Lung a gel pansante leh thilsang chiteng Pathian theihna dal ding a sangtak a bawlte i phuk zel; ngaihtuahna chiteng Khrist thumanna sikha a pi in;

⁶Na thumandan uh hihkim a a om chiang in, thumanlouhna tengteng phula ding nangawn a leng mansa in ka om uhi.

⁷Noute’n pawlam muhtheih thilte kia en na hi u maw? Kuapeuh in Khrist ahi a a kigintak leh amah kingaihtuah nawn hen, amah Khrist a ahi bang in, koute leng ka hi sem uhi.

⁸Ka thuneihna uh nou hihsiatna ding ahi kei a, noumau bawlhoih zawkna ding a Toupa’n a honpiak suang mah leng ka zahlak kei ding uhi.

⁹Ka laikhakte a nou hon hihlau tum bang a ka latlouhna ding in huai ka chi ahi.

¹⁰“A laikhakte zaw a gik in a khauh a, a sa a hongom leh mi zawngkhalpi ahi a, a pau leng a deihthoh huai,” a chi uhi.

¹¹Ka omlouh chiang ua ka laikhakte ua ka thugelh uleh, huailai a na kiang ua ka om chiang ua ka hih ding uh a kibatlouhna a omkei chih huchibang mite’n a theisiam ding uhi.

¹²Khenkhat amau kiphatte lak ah ka kisim khawm ngam kei ua, amau toh leng ka kitehpih ngam sam kei uhi. Himahleh amau zaw amau leh amau kiteh in amau leh amau kitehpih in lungsim neilou in a om uhi.

¹³Kou zaw Pathian hontehna val in ka kiuangsak kei ding uhi, mohpuakna a honpiak bangzel in ka kiuangsak zaw ding uhi, noumau ngei leng huai mohpuakna in hon huamkhak na hi uhi.

¹⁴Ka thuneih phaklouhna ding tantan uh hong uk hilou in, Khrist Tanchinhoih gen in na khua ua tam in ka hongpai uhi.

¹⁵Koute ka hihna pel ua kiphat hiam, midang sepgimnate kisuanpih ka hi kei uhi; na ginna uh a khandan bangzel in, na lak ua ka nasepna uh nakpitak a hihlet in om leh chih lametna ka nei zaw uhi,

¹⁶huchi in midang nasepsa suang hilou a, nou khenlam gamte pha in Tanchinhoih ka gen theihna ding un.

¹⁷Himahleh “A suang peuh in Toupa suang hen.”

¹⁸Amah kiphat in phat a loh ngal kei a, Toupa’n a genhoih in phat a loh zaw ahi.