Read Paite Chin 2 KORINTHTE 11 Bible Online

2 KORINTHTE 11 - Paite Chin bible

2 KORINTHTE 11

¹Ka hai deuhna uah noute’n Pathian ah n’on thuaktheih uh ka ut hi: Ahi, thuak leng n’on thuak thei ta uhi.

²Pathian hawmthohna, thikthuse khop in ahi nou k’on deihthoh; Khrist kiang a nungak siangthou bang a ka honpiak theihna ding in, pasal khat k’on hawisak hi.

³Himahleh gul in a zuau pil a Evi a khem bang in, Khrist lam a takna leh siangthouna a kipan bangchi hiam in na lungsim uh a hihse kha ding, chih ka lauthawng hi.

⁴Khattei hongpai a Jesu dang, a thu ka gen ngeilouh uh, a gen a, kha lamdang na muh ngeilouh uh, leh Tanchinhoih lamdang na san ngeilouh uh, na pompah un kipe baih lua na himah kei ding ua hia!

⁵Hiai Sawltaklian thuneipen na chihte uh sang in banglam peuh ah niamzawkna nei in ka kigingta kei hi.

⁶Thugen lam ah pau zatsiam kei mah leng theihna ah zaw huchibang ka hi kei uhi; huai noute kiang ah banglam peuh leh thil tengteng ah ka kilang sak uhi.

⁷Ahihkeileh, Pathian Tanchinhoih a thawn lel a k’on hilh ziak a tawisan a na om theihna ding ua ka kihihniam in thil ka hihkhial ahia?

⁸Na nna uh ka sep theihna ding in midangte a kipan a huhna la in, saptuam pawl dangte ka lok ahi;

⁹Huan na kiang ua ka om a, ka taksap lai in, kuamah k’on hihbuai kei a; unau Masidonia gam a kipan a hongpaite’n ka taksap awng a hong huksak ngal ua: bangkim ah noumau hihbuailou in ka kibawl bang in, ka kibawl zel ding hi.

¹⁰Khrist thutak keimaha a om bang in, hiai ka kisuanna zaw Akhaia gam lam a hihdaih in a omkei ding.

¹¹Bangziak in? K’on it louh ziak hia? Pathian in k’on it a thei hi.

¹²Huan a nasep uh kisaktheihpih a, kou sep bangbang a sem kichite kichihna ka bulkalh theihna ding in ka sep tuh ka sem zom zel ding hi.

¹³Mi huchibangte zaw Khrist sawltak a kibawltawm a, sawltak takloute, nasemmi, mi khemhatte ahi uhi.

¹⁴Huai ahihleh a lamdang kei; Setan hial leng vak sawltak in a kibawl tawm nak ahi.

¹⁵Huaiziak in a nasemte leng diktatna nasemmi in kibawltawm mahle uh thillamdang ahi kei; huaite tawpna zaw a thilhih bangzel un ahi ding hi.

¹⁶Ka chi nawn: kuamah in mihai in honsep kei uhen: himahleh n’on seh vanglak uleh, ken leng neu chik bek a ka kisaktheih sam theihna ding in mihai bangtak in honpom un.

¹⁷Ka genzaw Toupa thuneihna in ka gen kei a, ka kisaktheihna mihai bangtak in ka genzaw ahi.

¹⁸Mi tampite’n khovel thilte a kisaktheihpih ziak un keileng k’ong kisathei sam ding hi.

¹⁹Nou bel mi pil na hih ziak un mihaite lungkimtakin na thuakzou zel uhi.

²⁰Mi sal a hon bawlte, hon negaite, nuamtak honsa a na tung ua kiliansak leh na mai ua hon bengte na thuakthei zel ngal ua.

²¹Huchi dia zaw hatlou lua mah kei ve ua! Kisit in ka gen ahi.

²²Hebrute ahi uhia? Keileng ka hi. Israelte ahi uhia? Keileng ka hi. Abraham suante ahi uhia? Keileng ka hi.

²³Khrist nasemte ahi uhia? Mihai bang in genta leng, ka hi sem; sepgimna ah thupi sem in, suangkulh tanna ah bang thupi sem in, vuakna ah bang a kan a val in, sih lauhuaina tamveipi ka tuak hi.

²⁴Judate lak ah vuakna khatvei a sawmli chinglou ngavei ka tuak hi;

²⁵Thumvei chiang a khet in ka om a, khatvei suang a den in ka om hi, thumvei longsiatna ka tuak, zan khat leh ni khat tuipi ah taihmang in ka om hi,

²⁶Khualzinna ah tamveipi, luite lak ah lauhuai, suammite lak ah lauhuai, ka chipihte lak ah lauhuai, Jentelte lak ah lauhuai, khopi ah lauhuai, gamdai ah lauhuai, tuipi ah lauhuai, unau takloute lak ah lauhuai;

²⁷Septawlna leh sepgimna, ihmutmohna ah tamveipi, gilkial leh dangtakna ah, anngawlna ah tamveipi, khosik leh vuaktang a omnate.

²⁸Huan hiaite ban a kigenlou saptuam pawl tengteng ka ngaihtuahna niteng a hon delh gige leng a om hi.

²⁹Mi hatlou ka awlmohpih louh kua a om a? A puksia ka lungkhampih louh kua a om ngei a?

³⁰Suang ding ka hih vanglak leh ka hatlouhna lam thilte ahi ka suan ding.

³¹Toupa Jesu Pathian leh Pa, tangtawn a hampha in, zuau ka gen louh dan a thei hi.

³²Damaska khua ah kumpipa Areta nuai a gamukpa’n hon man ding in Damaskate khopi a veng sak a;

³³Huan kulhbang tohlet ah bawm in hon khaikhia ua, huchi in a khut a kipan ka suakta hi.